YAP Saatlı rayon təşkilatı Qarabağa səfər təşkil edib

Bakı:

21 °C

88 %

6 m/s

Əlaqə

AZ RU EN

Ana səhifə / YAP xəbərləri / YAP Saatlı rayon təşkilatı Qarabağa səfər təşkil edib

YAP Saatlı rayon təşkilatı Qarabağa səfər təşkil edib

20.07.2026 [12:17]

Yeni Azərbaycan Partiyası (YAP) Saatlı rayon təşkilatı tərəfindən Qarabağ iqtisadi rayonuna maarifləndirici səfər təşkil olunub.

Səfərdə YAP Saatlı rayon təşkilatının sədri Elşən Əzizov, rayon təşkilatının əməkdaşları, ərazi partiya təşkilatlarının sədr və müavinləri, gənc partiya üzvləri və fəalları iştirak ediblər.

Səfərin ilk ünvanı Ağdam şəhəri olub. İştirakçılar işğaldan azad olunmuş şəhərdə həyata keçirilən genişmiqyaslı bərpa və yenidənqurma işləri, müasir infrastruktur layihələri, yeni yaşayış məhəllələri və abadlıq tədbirləri ilə yaxından tanış olublar. Bildirilib ki, Ağdamın yenidən qurulması dövlətimizin işğaldan azad edilmiş ərazilərdə həyata keçirdiyi genişmiqyaslı bərpa və quruculuq siyasətinin uğurlu nəticəsidir.

Daha sonra iştirakçılar Əsgəran qalasını ziyarət ediblər. Onlara XVIII əsr Azərbaycan memarlığının nadir nümunələrindən olan qalanın tarixi, memarlıq xüsusiyyətləri və Qarabağ xanlığının müdafiəsində oynadığı mühüm rol barədə ətraflı məlumat verilib. Qeyd olunub ki, Əsgəran qalası xalqımızın zəngin tarixi-mədəni irsinin və dövlətçilik ənənələrinin mühüm rəmzlərindən biridir.

Səfər çərçivəsində Xocalı şəhəri də ziyarət olunub. Burada iştirakçılar şəhərdə aparılan bərpa və yenidənqurma işləri, yaradılan yeni infrastruktur və həyata keçirilən layihələr barədə məlumatlandırılıblar.

Daha sonra Xankəndi şəhərinə səfər edən iştirakçılar burada həyata keçirilən genişmiqyaslı quruculuq işləri, yenilənən şəhər infrastrukturu və formalaşdırılan müasir yaşayış mühiti ilə yaxından tanış olublar. Bildirilib ki, həyata keçirilən layihələr bölgənin sosial-iqtisadi inkişafına və dayanıqlı gələcəyinin təmin olunmasına mühüm töhfə verir.

Səfərin son ünvanı Azərbaycanın mədəniyyət paytaxtı Şuşa şəhəri olub. İştirakçılar şəhərin zəngin tarixi-mədəni irsi ilə yaxından tanış olaraq Yuxarı Gövhər Ağa məscidini, Cıdır düzünü, Molla Pənah Vaqifin məqbərəsini və digər tarixi məkanları ziyarət ediblər. Onlara Şuşada aparılan genişmiqyaslı bərpa və yenidənqurma işləri, şəhərin tarixi simasının qorunaraq bərpası istiqamətində görülən tədbirlər barədə ətraflı məlumat verilib.

Səfərin sonunda vurğulanıb ki, belə maarifləndirici səfərlər işğaldan azad olunmuş ərazilərdə aparılan bərpa-quruculuq işlərini yaxından izləmək, tarixi-mədəni irsimizi daha dərindən öyrənmək, milli həmrəyliyin və vətənpərvərlik ruhunun möhkəmləndirilməsi baxımından mühüm əhəmiyyət daşıyır.

Paylaş:

Baxılıb: 572 dəfə