YAP Nərimanov rayon təşkilatının Qadınlar Şurası Xocalı faciəsinin 25-ci ildönümünə həsr olunmuş anım mərasimi keçirib

Bakı:

25 °C

78 %

8 m/s

AZ RU EN

Ana səhifə / YAP xəbərləri / YAP Nərimanov rayon təşkilatının Qadınlar Şurası Xocalı faciəsinin 25-ci ildönümünə həsr olunmuş anım mərasimi keçirib

YAP Nərimanov rayon təşkilatının Qadınlar Şurası Xocalı faciəsinin 25-ci ildönümünə həsr olunmuş anım mərasimi keçirib

23.02.2017 [10:07]

Dünən Yeni Azərbaycan Partiyasının (YAP) Nərimanov rayon təşkilatının Qadınlar Şurası Xocalı faciəsinin 25-ci ildönümünə həsr olunmuş anım mərasimi keçirib. Əvvəlcə Xocalı soyqırımı zamanı qətlə yetirilmiş həmvətənlərimizin və Vətən uğrunda canlarını fəda etmiş bütün şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan YAP Nərimanov rayon təşkilatının Qadınlar Şurasının sədri Məhəbbət İbrahimova Xocalı faciəsi barədə ətraflı məlumat verib. O, Azərbaycan tarixində ən qanlı hadisələrdən biri olan, erməni silahlı dəstələri tərəfindən xalqımıza qarşı törədilən bu cinayət hadisəsi zamanı dinc əhalinin xüsusi qəddarlıqla qətlə yetirildiyini, əsir götürülən insanların isə dəhşətli işgəncələrə, zülm və təhqirlərə məruz qaldıqlarını qeyd edib.
Nərimanov rayon İcra Hakimiyyəti başçısının müavini İradə Mahmudova erməni qəsbkarları tərəfindən zaman-zaman xalqımızın başına gətirilən müsibətləri barədə danışaraq, Prezident İlham Əliyevin inamla həyata keçirdiyi daxili və xarici siyasətin, erməni qəsbkarlığının ifşasına yönəlmiş uğurlu addımların öz bəhrəsini verdiyini, Xocalı soyqırımı haqqında həqiqətlərin dünya ictimaiyyətinə çatdırılması, Azərbaycan xalqı və ümumən insanlıq əleyhinə törədilmiş bu son dərəcə ağır hərbi cinayətin beynəlxalq miqyasda siyasi-hüquqi qiymət alması məsələsinin dövlət siyasətinin mühüm istiqamətini təşkil etdiyini diqqətə çatdırıb.
Xocalıdan olan məcburi köçkün, şəhid ailəsi Mehriban Əliyeva çıxışında Xocalıda erməni vandallarının törətdiyi qətliamı tarixdə ən dəhşətli faciə kimi qiymətləndirib, cinayətkarların gec-tez ədalət məhkəməsi qarşısında cavab verəcəklərini qeyd edib.
YAP Nərimanov rayon təşkilatı Qadınlar Şurasının sədr müavini Məhbubə Məmmədova çıxışında bildirib ki, Xocalı soyqırımı təkcə Azərbaycanın deyil, XX əsrdə bütün bəşəriyyətin üzləşdiyi ən dəhşətli faciəli hadisədir. Bu, bütün bəşəriyyətə olan qəsddir və erməni vandalizminin, erməni vəhşiliyinin açıq-aydın göstəricisidir.
Tədbirdə çıxış edən fəal gənclərdən Günay İmanova da Xocalı soyqırımının bəşəri bir faciə olduğunu vurğulayıb. O qeyd edib ki, bu günün gəncləri Xocalı faciəsini heç vaxt yaddan çıxarmayacaqlar və Azərbaycanın ərazi bütövlüyünün bərpası naminə hər an döyüşə atılmağa hazırdırlar. Azərbaycan gənclərinin üzərinə düşən əsas vəzifələrdən biri də məhz Xocalı faciəsini dünya ictimaiyyətinə çatdırmaqdır.
Çıxışlarda qeyd olunub ki, Xocalı soyqırımının dünyada tanıdılmasında Heydər Əliyev Fondunun vitse-prezidenti Leyla xanım Əliyevanın təşəbbüsü ilə həyata keçirilən “Xocalıya ədalət!” kampaniyası mühüm rol oynayır.
Sonda 291 saylı Ekologiya Liseyinin şagirdləri tərəfindən Xocalı faciəsinin 25-ci ildönümünə həsr olunmuş bədii kompozisiya nümayiş olunub.

Paylaş:

Baxılıb: 950 dəfə