Vüqar Hüseynov: Bu, Ermənistanın Azərbaycanın ədalətli mövqeyinə xələl gətirməyə hesablanmış növbəti təxribatıdır

Bakı:

23 °C

94 %

2 m/s

AZ RU EN

Ana səhifə / YAP xəbərləri / Vüqar Hüseynov: Bu, Ermənistanın Azərbaycanın ədalətli mövqeyinə xələl gətirməyə hesablanmış növbəti təxribatıdır

Vüqar Hüseynov: Bu, Ermənistanın Azərbaycanın ədalətli mövqeyinə xələl gətirməyə hesablanmış növbəti təxribatıdır

16.07.2020 [09:15]

“Məlumdur ki, Prezident İlham Əliyev tərəfindən may ayında Qoşulmama Hərəkatına üzv Dövlətlərin Təmas Qrupunun Zirvə görüşündə BMT Baş Assambleyasının xüsusi sessiyasının keçirilməsi təşəbbüsü irəli sürüldü. Qısa zamanda BMT-yə üzv olan 130 dövlət tərəfindən bu təşəbbüs dəstəkləndi. Bu fakt sübut edir ki, Azərbaycan ciddi siyasi çəkiyə malik olan dövlətdir. Bu təşəbbüsün əleyhinə açıq etiraz edən yalnız Ermənistan oldu və BMT Baş katibinə xüsusi məktubla bu təşəbbüsün əleyhinə olduğunu bildirdi. Bu narahatlığa səbəb isə təbii ki, bəllidir. Azərbaycanın ədalətli mövqeyi və beynəlxalq səviyyədə ictimaiyyət tərəfindən dəstəklənməsidir”.
Bu fikirləri Yeni Azərbaycan Partiyası (YAP) Göygöl rayon təşkilatı Gənclər Birliyinin sədr müavini Vüqar Hüseynov deyib.
V.Hüseynov bildirib ki, iyulun 12-də Ermənistan silahlı qüvvələrinin atəşkəs rejimini kobud şəkildə pozaraq artilleriya qurğularından istifadə etməklə Tovuz rayonu istiqamətində təxribat törətməsi Ermənistanın Azərbaycanın ədalətli mövqeyinə xələl gətirməyə hesablanmış növbəti təxribatıdır. Məlumdur ki, Ermənistan öz işğalçı obrazına bəraət qazandırmaq üçün belə bir təxribata cəhd etdi. Ermənistan tərəfindən sərhəddə törədilmiş təxribat onu göstərir ki, rəsmi Yerevan Ermənistan-Azərbaycan münaqişəsinin danışıqlar yolu ilə həllində maraqlı deyil və məqsədi Azərbaycan ərazilərini işğalda saxlamaqdan ibarətdir. Koronavirus pandemiyasına qarşı bütün dünya ölkələrinin çətin bir şəraitdə mübarizə apardıqları bir zamanda Ermənistanın bu təxribatı törətməsi təcavüzkarın əsl simasını bir daha bütün dünyaya göstərdi.
Onun sözlərinə görə, Azərbaycan silahlı qüvvələri vəziyyətə nəzarət edir: “Ermənistanın təxribatlarına sərt formada cavab verilir və veriləcəkdir. Bu gün Azərbaycan güclü orduya malikdir və Azərbaycan Ordusu Ali Baş Komandanın əmri ilə qarşısına qoyulan istənilən vəzifəni yerinə yetirməyə, o cümlədən torpaqlarımızı işğaldan azad etməyə hazırdır və buna qadirdir. Yaranmış vəziyyətə görə məsuliyyət tam şəkildə Ermənistan rəhbərliyinin üzərinə düşür. Beynəlxalq ictimaiyyət Ermənistanın Azərbaycana qarşı işğalçılıq siyasətini və sərhəddə törətdiyi təxribat əməllərini kəskin şəkildə pisləməlidir”.

Paylaş:

Baxılıb: 626 dəfə