Aslan Aslanov: Koronavirusa qarşı mübarizədə uğurlu nəticə əldə edilməsi vətəndaş məsuliyyətindən asılıdır

Bakı:

20 °C

77 %

0 m/s

AZ RU EN

Ana səhifə / YAP xəbərləri / Aslan Aslanov: Koronavirusa qarşı mübarizədə uğurlu nəticə əldə edilməsi vətəndaş məsuliyyətindən asılıdır

Aslan Aslanov: Koronavirusa qarşı mübarizədə uğurlu nəticə əldə edilməsi vətəndaş məsuliyyətindən asılıdır

21.08.2020 [09:07]

“Bütün dünyada tüğyan edən COVİD-19 pandemiyasının vurduğu zərərlər Azərbaycandan da yan keçməyib. Buna baxmayaraq, dövlətimiz bütün imkanları pandemiyanın yaratdığı fəsadların aradan qaldırılmasına yönəldib. Qeyd edim ki, virusun yayılmasının qarşısını almaq məqsədilə pandemiya başlanan vaxtdan indiyədək ölkəmizdə görülən qabaqlayıcı tədbirlər dövlətin vətəndaşlarına diqqət və qayğısının bariz nümunəsidir”.
Bu fikirləri YAP Binəqədi rayon təşkilatı Gənclər Birliyinin idarə heyətinin üzvü Aslan Aslanov deyib.
Pandemiyanın normal həyat tərzimizi dəyişdiyini deyən Aslan Aslanov bildirib ki, yeni növ koronavirus (COVİD-19) infeksiyasına qarşı mübarizədə uğurlu nəticənin əldə edilməsi vətəndaş məsuliyyətindən asılıdır: “Pandemiya bizə göstərdi ki, hər kəsin təhlükəsiz olmadığı bir yerdə, heç birimiz təhlükəsiz ola bilmərik. Sübut olundu ki, həmrəylik heç bir sərhəd və status tanımayan bu virusa qarşı müqavimət göstərməyin ən güclü və ən effektiv yoludur. Biz bu gün dünyanın ən inkişaf etmiş ölkələrinin belə virusla mübarizədə aciz olduğunu görürük. Azərbaycan isə virusla uğurla mübarizə aparan ölkələr sırasındadır. Bunun da əsasında dövlətin həyata keçirdiyi uğurlu siyasət və atılan məqsədyönlü addımlar dayanır”.
Aslan Aslanov onu da deyib ki, vətəndaşlar sosial məsuliyyətdən irəli gələrək, özünü, yaxınlarını və cəmiyyətimizin digər üzvlərini qorumaq üçün, Ümumdünya Səhiyyə Təşkilatının və Nazirlər Kabineti yanında Operativ Qərargahın tövsiyə etdiyi sanitar-gigiyenik qayda və tələblərə ciddi əməl etməli, eyni zamanda digər şəxsləri də bu qaydalara riayət etməyə səsləməlidirlər: “Lakin bəzi hallarda vətəndaşlarımızın bu qaydalara riayət etmədiyinin şahidi oluruq. İctimai nəqliyyatda maska taxmağa, sosial məsafə saxlamağa bəzi vətəndaşlarımız ciddi əməl etmirlər. Burada, vacib olan məqamlardan biri isə ictimai qınaq məsələsidir. Karantin rejiminin qaydalarına riayət etməyən şəxslərə qarşı cəmiyyətimizdə ictimai qınaq olmalı, onları bu qaydalara əməl etməyə dəvət etməliyik”.
“Unutmayaq ki, sosial məsafənin saxlanması, qapalı yerlərdə və ictimai nəqliyyatda maska taxılması, əllərin mütəmadi olaraq sabunla yuyulması və dezinfeksiya edilməsi virusun yayılmasının qarşısını almaq üçün ən effektiv yollardır. Bütün bunları nəzərə alaraq, hər birimiz dövlət tərəfindən görülən tədbirlərin ciddiliyini dərk etməli və maksimum dərəcədə vətəndaş məsuliyyəti və həmrəyliyi nümayiş etdirməliyik”, - deyə o qeyd edib.

Paylaş:

Baxılıb: 707 dəfə