YAP-ın rayon və şəhər təşkilatlarının Gənclər Birliklərinin sədrləri üçün keçirilən seminar öz işini yekunlaşdırıb

Bakı:

29 °C

55 %

1 m/s

AZ RU EN

Ana səhifə / YAP xəbərləri / YAP-ın rayon və şəhər təşkilatlarının Gənclər Birliklərinin sədrləri üçün keçirilən seminar öz işini yekunlaşdırıb

YAP-ın rayon və şəhər təşkilatlarının Gənclər Birliklərinin sədrləri üçün keçirilən seminar öz işini yekunlaşdırıb

01.03.2012 [22:49]

Mübariz Qurbanlı: İKT sahəsində təcrübələrini artırmaqla gənclərimiz Azərbaycanın uğurları, bu uğurları ölkə daxilində və xaricində təbliğ etmək baxımından daha geniş və səmərəli fəaliyyət göstərmək imkanı qazanırlar
Məlum olduğu kimi, fevralın 29-da Yeni Azərbaycan Partiyası (YAP) Gənclər Birliyinin rayon və şəhər təşkilatları sədrlərinin ümumrespublika müşavirəsi keçirilib. Müşavirədə təşkilatın ötən bir il ərzində fəaliyyətinə nəzər yetirilib, eləcə də, qarşıda duran vəzifələr müzakirə olunub. Əsas məsələlərdən biri kimi gənclərin informasiya-kommunikasiya texnologiyalarından (İKT) səmərəli istifadəsi, sosial şəbəkələrdə fəal iştirakın zəruriliyi vurğulanıb.
Qeyd edək ki, həmin gün Yeni Azərbaycan Partiyası Gənclər Birliyinin rayon və şəhər təşkilatları sədrlərinin informasiya texnologiyaları üzrə biliklərinin təkmilləşdirilməsi istiqamətində seminara da start verilib. Dünən isə seminar-məşğələlər öz işini davam etdirib. üç qrupda təşkil edilən seminarda informasiya-kommunikasiya texnologiyaları ilə bağlı texniki, nəzəri və ideoloji məsələlərlə əlaqədar gənclərə məşğələlər keçirilib. Məşğələlərdə əsasən hər üç istiqamətdə debatlar, sorğular təşkil olunub.
Seminarda çıxış edən YAP İcra katibinin müavini, Milli Məclisin deputatı Mübariz Qurbanlı belə tədbirlərin əhəmiyyətindən bəhs edib. O bildirib ki, YAP gənclərin biliklərini, siyasi təcrübələrini artırmaq üçün müxtəlif layihələr həyata keçirir. “Bu layihə çərçivəsində isə gənclər rəqəmsal dünyanın yeni nailiyyətlərini daha dərindən mənimsəmək, sosial şəbəkələrdə fəaliyyəti səmərəli şəkildə qurmaq, elektron ünsiyyəti intensivləşdirmək və s. bağlı təcrübə qazanırlar. Hesab edirəm ki, bu, hər bir gənc üçün faydalıdır. Partiyamızda Azərbaycan gənclərinin böyük hissəsi təmsil olunur. Gənclərimiz yüksək intellektə malikdirlər. İKT sahəsində təcrübələrini artırmaqla gənclərimiz Azərbaycanın uğurları, bu uğurları ölkə daxilində və xaricində təbliğ etmək baxımından daha geniş və səmərəli fəaliyyət göstərmək imkanı qazanırlar”, - deyə YAP İcra katibinin müavini vurğulayıb.
Seminar-məşğələlərdə YAP Gənclər Birliyinin üzvləri İKT mövzusunda ətraflı fikir mübadiləsi, müzakirələr aparıb və yeni biliklərə yiyələniblər.
Tədbir barədə fikirlərini bildirən YAP Gənclər Birliyinin sədr müavini Samirə Quliyeva deyib ki, partiyanın gəncləri üçün keçirilən seminarlar böyük əhəmiyyətə malikdir. çünki müasir dövrdə informasiya texnologiyaları sürətlə inkişaf edir və bu texnologiyaları mənimsəmək, biliklərə yiyələnmək günümüzün tələbləridir. S.Quliyeva qeyd edib ki, YAP üzvlərinin 40 faizini gənclər təşkil edir və gənclərin partiya sıralarına axını geniş vüsət alıb. Gənclərin intellektual potensialının yüksək səviyyədə olduğunu deyən S.Quliyevanın sözlərinə görə, onlar ictimai-siyasi proseslərdə də fəal iştirak edirlər: “Partiyamız gənclər siyasətinə böyük əhəmiyyət verir. Bu mənada, gənclərlə bağlı həyata keçirilən layihələr xüsusi qeyd olunmalıdır. Hazırkı seminarlar da partiyamızın gənclərinin İKT-nin imkanlarından daha səmərəli istifadə etmək üçün təcrübələrinin artırılmasına xidmət edir. Nəzərə alsaq ki, müasir dünyada İKT-nin inkişafı böyük vüsət alıb, onda gənclərin bu texnologiyaları mənimsəməsi, sosial şəbəkələrdə fəal iştirak etmələri günümüzün aktual məsələlərindəndir. Fəaliyyətində hər zaman yeniliklərə üstünlük verən partiyamızın həyata keçirdiyi bu layihələr gənclərimiz tərəfindən rəğbətlə qarşılanır. İnanıram ki, gənclərimiz bu seminar vasitəsilə öz bilik və bacarıqlarını artıracaq, öz fəaliyyətlərində İKT-nin imkanlarından daha geniş şəkildə yararlanacaqlar”.
“Yeni Azərbaycan Partiyasının və partiyanın Gənclər Birliyinin həyata keçirdiyi maarifləndirici layihələr yüksək qiymətə layiqdir”. Bunu isə YAP Ağdam rayon təşkilatının Gənclər Birliyinin sədri Amil Cavadov deyib. O bildirib ki, belə bir seminarın təşkil olunması həm də gənclərin sosial şəbəkələrdə Azərbaycan haqqında həqiqətlərin dünyaya çatdırılmasındakı rolunu artıra bilər. A.Cavadovun sözlərinə görə, ölkəmizdə gənclərin öz bilik və bacarıqlarını, potensiallarını üzə çıxarmaq, müxtəlif sahələrdə onların bu imkanlarından yararlanmaq üçün bütün şərait mövcuddur: “Sadəcə, öz fəaliyyətimizə məsuliyyətlə yanaşmalı və dövlətimiz, partiyamız tərəfindən bizə göstərilən etimadı layiqincə doğrultmalıyıq. ölkə həyatının bir çox sahələrini əhatə edən məqsədyönlü dövlət proqramlarının, sosialyönümlü layihələrin həyata keçirilməsində gənclərin rolu əvəzsizdir. Fikrimcə, bu seminarlar gənclərin İKT sahəsində biliklərini daha da artıracaq”.
YAP Şəki rayon təşkilatı Gənclər Birliyinin sədri Daşqın Mikayılov isə deyib ki, partiyamız gənclərin bilik və bacarıqlarının artırılması üçün bütün imkanları yaradıb. Bu səbəbdən də Azərbaycan gəncliyinin böyük əksəriyyəti partiyamızın sıralarına qoşulur. D.Mikayılov bildirib ki, təşkil olunmuş seminar gənclərin İKT-nin imkanlarından daha səmərəli istifadə etməsi baxımından önəmlidir: “Biz təcrübəmizi artıraraq sosial şəbəkələr vasitəsilə Azərbaycan həqiqətlərinin dünyada yayılması üçün səylərimizi daha da artıracağıq”.
Seminarda iştirak YAP Oğuz rayon təşkilatı Gənclər Birliyinin nümayəndəsi Elnur Əliyev bildirib ki, hazırda inkişaf edən Azərbaycan gəncləri də artıq sosial şəbəkələrin üstünlüklərindən faydalanmaqdadır: “Bu, insanların sosial şəbəkəni necə, hansı limitdə, hansı məqsədlə istifadə etməsindən asılıdır. Əlbəttə, öz inkişafları üçün istifadə edirlərsə, niyə olmasın? Xüsusilə, hazırda ölkəmizə qarşı qərəzli mövqedən çıxış edən qüvvələrin faəliyyətini neytrallaşdırmaq üçün sosial şəbəkələrdə öz gücümüzdən istifadə etməliyik”.
YAP Xocalı rayon təşkilatı Gənclər Birliyinin sədri Pərviz Məmmədov da seminar-məşğələlərin əhəmiyyətli olduğunu deyib: “Bu gün dünyada sosial şəbəkələr vasitəsilə bir çox məsələləri beynəlxalq birliyə çatdırmaq mümkündür. Bu baxımdan, biz sosial şəbəkələr vasitəsilə Ermənistanın Azərbaycana qarşı işğalçı siyasətini dünyaya tanıtmaq üçün səylərimizi gücləndirəcəyik”.
Qeyd edək ki, seminar dünən öz işini yekunlaşdırıb.
Nardar BAYRAMLI

Paylaş:

Baxılıb: 1381 dəfə