Azərbaycan-Konqo münasibətləri uğurla inkişaf edəcək

Bakı:

20 °C

73 %

7 m/s

Əlaqə

AZ RU EN

Ana səhifə / YAP xəbərləri / Azərbaycan-Konqo münasibətləri uğurla inkişaf edəcək

Azərbaycan-Konqo münasibətləri uğurla inkişaf edəcək

05.04.2024 [17:44]

Konqo Respublikasının Prezidenti Deni Sassu-Nqesso aprelin 4-də Azərbaycan Respublikasına rəsmi səfərə gəlmiş, səfər çərçivəsində Azərbaycan Respublikasının Prezidenti İlham Əliyevlə əvvəlcə təkbətək, sonra geniş tərkibdə görüşü olmuş, daha sonra iki ölkə rəhbərlərinin iştirakı ilə Azərbaycan-Konqo sənədlərinin imzalanması mərasimi baş tutmuşdur. İmzalanma mərasimindən sonra dövlət başçıları mətbuata bəyanatlarla çıxış ediblər.

Prezident cənab İlham Əliyev çıxışında həm təkbətək görüş əsnasında, həm də ki, heyətlərin iştirakı ilə görüşdə bir çox önəmli məsələlərin müzakirə olunduğunu, fikir birliyi ifadə edildiyini bildirib. Ölkə başçısı imzalanmış əməkdaşlıq haqqında Bəyannamənin iki ölkə arasında siyasi əlaqələrin bundan sonra uğurla inkişaf edəcəyini təsdiqlədiyini vurğulayıb.

“Biz bundan sonra da beynəlxalq təşkilatlar çərçivəsində qarşılıqlı dəstək əsasında qarşılıqlı fəaliyyətimizi, xüsusilə BMT-də və Qoşulmama Hərəkatı çərçivəsində davam etdirəcəyik” - deyən Dövlətimizin başçısı Qoşulmama Hərəkatına bu ilin yanvar ayına qədər 4 il uğurla sədrlik etmiş Azərbaycan Konqonun dəstəyini hər zaman hiss etdiyini qeyd edib. Prezident İlham Əliyev Parlament Şəbəkəsi, Gənclər və Qadınlar platformalarının məhz Azərbaycanın sədrliyi dönəmində yaradıldığını, bu gün Qoşulmama Hərəkatı əvvəlki dövrlərə nisbətən daha güclü təşkilat olduğunu diqqətə çatdırıb. Ölkə başçısı məlumat üçün bildirib ki, Qoşulmama Hərəkatı BMT-dən sonra ikinci böyük təsisatdır və 121 üzvü var.

Prezident İlham Əliyevin bəyanatında Qoşulmama Hərəkatına sədrlik dövründə Azərbaycanın prioritetlərindən bəhs edərək, xarici siyasət istiqamətləri arasında neokolonializmə qarşı mübarizə məsələlərinin xüsusi önəm daşıdığını bildirib.

Dövlətimizin başçısı həmkarı Deni Sassu-Nqesso ilə iqtisadi sahədə də əməkdaşlıq haqqında geniş fikir mübadiləsi apardıqlarını, nümayəndə heyətlərinin üzvlərinə konkret tapşırıqlar verildiyini, Azərbaycanın Konqoda bir çox investisiya layihələrində ilk növbədə, kənd təsərrüfatı sahəsində iştirak etmək fikrində olduğunu, bərpaolunan enerji sahəsində, energetika sahəsində, mədənçilik və digər sahələrdə əməkdaşlıq üçün çox gözəl perspektivlər olduğunu vurğulayıb.

Cənab Prezident Azərbaycanın COP29-un prezidenti kimi bu tədbirə çox ciddi hazırlaşdığını, həmkarını bu əhəmiyyətli tədbirdə iştirak etmək üçün dəvət etdiyini bildirib. Dövlətimizin başçısı burada Konqo ilə ikitərəfli formatda və çoxtərəfli formatda əməkdaşlıq etməyin, məqsədəmüvafiq ola biləcəyini qeyd edib.

Beləliklə, Konqo Respublikasının Prezidenti Deni Sassu-Nqessonun ölkəmizə ilk tarixi səfəri ölkələrimiz arasındakı əlaqələrdə yeni səhifə açmış oldu. Əminliklə demək olar bugündən sonra Azərbaycan-Konqo münasibətləri uğurla inkişaf edəcək.

Sahib Şükürov

Yeni Azərbaycan Partiyası Göyçay rayon təşkilatının sədri

Paylaş:

Baxılıb: 487 dəfə