BVF Azərbaycanla məsləhətləşmələri yekunlaşdırıb

Bakı:

27 °C

45 %

4 m/s

Əlaqə

AZ RU EN

Ana səhifə / Xəbər lenti / BVF Azərbaycanla məsləhətləşmələri yekunlaşdırıb

BVF Azərbaycanla məsləhətləşmələri yekunlaşdırıb

29.12.2021 [10:53]

Azərbaycanda ÜDM-in artım tempi proqnozlardan yüksək olub

Nicat Dilqəmli

Ölkə iqtisadiyyatının 2021-ildəki göstəriciləri proqnozlardan yüksək olub. Aparılan iqtisadi islahatların nəticəsidir ki, bu gün dünyanın nüfuzlu reytinq agentlikləri Azərbaycanın inkişaf tempinə görə ön sıralarda olduğu barədə rəsmi məlumatlar dərc edirlər. Beynəlxalq Valyuta Fondunun (BVF) dəyərləndirmələri də bu baxımdan xarakterikdir. BVF 2021-ci il üçün Azərbaycan hökuməti ilə Fondun nizamnaməsinin IV maddəsi üzrə məsləhətləşmələri (“2021 Article IV Consultation”) yekunlaşdırıb. BVF-nin sənədində bildirilir ki, Azərbaycan COVID-19 pandemiyası və neft qiymətlərinin enişindən ciddi zərərlə üzləşib, lakin hökumətin böyük yardım paketi şokun iqtisadi təsirini azaltmağa kömək edib. Qeyri-neft iqtisadiyyatının pandemiyanın təsirlərindən qorunduğu üçün 2021-ci ildə bu sahədə göstəricilərin artacağı proqnozlaşdırılır.

BVF-nin proqnozlarına görə, 2021-ci ildə Azərbaycanda nominal ÜDM-in həcmi 52,645 mlrd. dollar təşkil edəcək. Beləliklə, respublikamızda ÜDM-in həcmi son 7 ildə ilk dəfə 50 mlrd. dolları ötəcək. Azərbaycanın qeyri-neft ÜDM-i isə 4,5% artacaq, 2022-ci ildə qeyri-neft ÜDM-in 3,5% artacağı proqnozlaşdırılır. Lakin daha təhlükəli COVID-19-un ştamlarının yayılması və yaxud vaksinasiyanın ləngiməsi prosesləri gecikdirə bilər. Qlobal tələbatın gözləniləndən daha asta bərpası neft sektoru üçün də risk yarada bilər.

“Digər tərəfdən, gözləniləndən daha sürətli qlobal bərpa neft və qaz qiymətlərini yüksəldə, gəlirləri artıra, fiskal və xarici tarazlığı gücləndirə bilər. Neft ehtiyatlarının tədricən tükənməsi fonunda iqtisadiyyatın şaxələndirilməsi və qeyri-neft sektorunun məhsuldarlığının yüksəldilməsi və Azərbaycanın iqtisadi perspektivlərinin gücləndirilməsi üçün sürətləndirilmiş struktur islahatlarına ehtiyac var” ,- sənəddə deyilir. Beləliklə, BVF-nin İcraiyyə Şurası qeyd edir ki, Azərbaycan üçün yaxın gələcəkdə əsas çağırış struktur problemlərinin həlli üçün zəmin hazırlayarkən, bərpa prosesini təhlükəyə atmamaq ehtiyacını tarazlaşdırmaqla, COVID-19-la əlaqəli stimullaşdırıcı paketlərin mərhələli şəkildə ləğv edilməsini düzgün şəkildə qurmaqdır. Uzunmüddətli perspektivdə isə Azərbaycanın neft ehtiyatlarının tükənməsi problem yarada bilər və bu səbəbdən iqtisadiyyat neft gəlirlərindən asılılığını aradan qaldırmalıdır. Xatırladaq ki, IV maddəyə Azərbaycan iqtisadiyyatının bütün sahələrində icmalın aparılması və sonradan ölkə hökumətinə təklif və tövsiyələrin verilməsi daxildir.

Paylaş:

Baxılıb: 991 dəfə