Çirkli pulları yuyan maşın

Bakı:

16 °C

67 %

3 m/s

Əlaqə

AZ RU EN

Ana səhifə / Xəbər lenti / Çirkli pulları yuyan maşın - “Turan TV”...

Çirkli pulları yuyan maşın - “Turan TV”...

20.10.2022 [10:52]

Kanalın “rəhbəri” və “eksperti”, fransız nağıllarını dinləyərkən kim olduğunuzu unutmayın!

Makronun siyasi nəzakət prinsiplərinə əks olan məlum açıqlamasından sonra AXCP sədri Əli Kərimli yenidən “danışmağa” başlayıb. Və bu danışdıqları ilə özünü və maliyyə mənbəyinin yerini ifşa edib.

Belə ki, Emmanuel Makronun “fikirlərinə” dəstək verən, Azərbaycan dövlətçiliyinə qarşı asiliyini nümayiş etdirən Ə.Kərimli digər bir “ortağını” da ələ verib. Bu ortaq heç də başqa xalqın nümayəndəsi deyil - ölkəmizdən uzaqlarda özünə “studiya” qurub, türkçülük əleyhinə təbliğat maşını rolunu oynayan “Turan” kanalının “rəhbəri” Qənimət Zahiddir. Q.Zahid pulunu alır, sözünü deyir: ermənilərin lehinə, Azərbaycanın əleyhinə. “Ekspert”i isə Əli Kərimli kimi “siyasi alət”lərdir. İnternet kanalının adını Turan qoyan, amma türk dünyasına həqarətlər yağdıran Qənimətin erməni lobbisindən qopardığı “qənimətlərlə” razı olub-olmadığını söyləmək çətin deyil. Bir verilişi çox yox, 2-3 dəqiqə seyr elədikdən sonra sıravi insan belə anlayar ki, yalnız 2 məqamda belə absurd iddialar ortaya atıla bilər:

- Birincisi, həmin absurd fikirlərin sahibi dövlətinə, Vətəninə xəyanət yolunu tutduğunu açıq-aydın bəyan etmək istədikdə;

- İkincisi isə böyük pullar müqabilində.

Təbii ki, birinci variantı heç kəs etiraf etməz. Yəni, özlərinə “Vətən fədaisiyəm” deyib də təkzib edəcəklər. İkinci variantı isə təkzib etməyə nə faktları, nə də istinad nöqtələri olacaq. Hər kəsə məlumdur ki, hansısa bir media resursunun fəaliyyəti heç də az məbləğə başa gəlmir. Özü də Strasburq kimi dünyanın ən bahalı bir şəhərində yaşamaq, heç bir yerdə rəsmən işləmədən TV yaratmağı düşünəndə burada hansısa bir qüvvənin olmaması şübhə doğurur.

Əldə etdiyimiz məlumata görə, sözügedən TV Qərb və ABŞ-dakı erməni lobbisindən birbaşa maliyyələşir. Və bu maliyyələşmə də dövlətimizə qarşı aparılan çirkin siyasi kampaniyalarda istifadə olunan çirkli pullardan başqa bir şey deyil. Yəni, erməni lobbisi Q.Zahid, Ə.Kərimli kimiləri vasitəsilə həm çirkin niyyətlərini həyata keçirir, həm də bizneslərini “təmizləyərək” güclənir və Ermənistana daha böyük yardımlar göstərirlər. Bunu biz araşdırdıq. Amma sözügedən “həmvətənlərimiz” ya anti-Azərbaycan tezislərinin çoxluğuna, ya da pulların bölüşdürülməsinə başları qarışdığı ucbatından bunu araşdırmağa macal tapmırlar.

Ə.Kərimli də, ortağı Q.Zahid də kiminsə nağıllarını dinləyərkən azərbaycanlı olduqlarını unutmamalıdırlar.

P.S. “Pul əl çirkidir” deyirlər. Çirklənmiş əli də, çirkli pulu da yumaq olar. Amma xainlərin alnındakı ləkə, adındakı damğa əsla yuyularaq silinməz.

“Yeni Azərbaycan”

Paylaş:

Baxılıb: 525 dəfə