"Vaqner" qayıdır…

Bakı:

28 °C

65 %

9 m/s

Əlaqə

AZ RU EN

Ana səhifə / Analitik / "Vaqner" qayıdır…

"Vaqner" qayıdır…

12.08.2023 [14:17]

Silahlı birləşməyə Belarus da yiyə durmadı

Son dövrlərdə diqqət mərkəzində olan "Vaqner" silahlı birləşməsinin başı yenə qalmaqaldadır. Bir müddət öncə qaldırdığı silahlı üsyan səbəbilə Belarusa "sürgün" edilmiş “Vaqner”yenidən Rusiyaya qayıda bilər. Silahlı qruplaşmanın Belarusa göndərilməsinin ardından başlanan proses isə yarımçıq qalır – Şərqi Avropa ölkələri "Vaqner"in Belarusa köçünü siyasi məqsədlərdən qaynaqlandığını düşünürdü. Amma son baş verənlər göstərir ki, bu heç də belə deyilmiş.

Belə ki, yayılan məlumatlara əsasən “Vaqner” özəl hərbi şirkətinin döyüşçülərinin Belarusu tərk edərək Rusiyaya qayıdacağı güman olunur. Qeyd edək ki, hazırda “Vaqner” döyüşçüləri Belarusdan geri çəkilmənin birinci mərhələsini həyata keçirirlər. İkinci mərhələnin isə avqustun 13-dən sonra başlanması nəzərdə tutulub.

Müharibənin Öyrənilməsi İnstitutunun (ISW) analitikləri isə vaqnerçilərin Rusiyaya qayıtması ilə bağlı məlumatların Rusiya Prezidenti Vladimir Putinlə “Vaqner” RMC-nin rəhbəri Yevgeni Priqojin arasında razılaşmaların pozulacağının xəbərçisi olduğunu bildiriblər.

Belarus Prezidenti Aleksandr Lukaşenko Rusiyanın muzdluları saxlamaq üçün pul ödəməyəcəyini anlayanda "Vaqner RMC"ni maliyyələşdirməkdən imtina edib.

Yeni hesabatda deyilir ki, Putin "Vagner RMC"ni döyüş bölməsi kimi saxlamaqda maraqlıdır, lakin Priqojini təhlükə olaraq görməkdə davam edir. Bəs Lukaşenkonun “Vaqneri” maliyyə etməkdən imtina etməsinin əsl səbəbi nədir? Məsələdə dostluq yoxsa biznes əlaqələri hökm sürür?

Məsələ ilə bağlı qəzetimizə açıqlama verən politoloq Tural İsmayılov bildirib ki, bu gün bir çox qüvvələr “Vaqner”dən təzyiq və təsir vasitəsi kimi istifadə etməyə çalışırlar. Vaqnerçilərin başlatdığı qiyam isə ssenari idi – bu, Rusiyanın mərkəzdən qaçma meyillərinin qarşısını almağa yönəlmiş plan da adlana bilərdi: “Rusiya bunu qəsdən də etmiş ola bilər. Priqojinin timsalında “Vaqner”in qiyamını təşkil edərək, ordu daxilindəki zəif çatları üzə çıxarmaq mümkün idi. Eyni zamanda Lukaşenkonun “Vaqner”dən imtina etmək və ya onu qəbul etmək kimi bir səlahiyyəti yoxdur. Nəzərə almaq lazımdır ki, “Vaqner”in Belarusda peyda olmağının arxasında da dərin səbəblər dayanıb. Bu Rusiya ilə Belarus arasında gedən danışıqların nəticəsində ortaya çıxmış hadisədir və burada müəyyən məqsədlər özünü göstərir”. İlk növbədə burada Şərqi Avropa planlarına diqqət yetirmək lazımdır".

Politoloq Belarusun “Vaqner” qrupunun ərazisinə daxil olmağına şərait yaratmasının bir çox səbəblərdən qynaqlandığını düşünür. Onun sözlərinə görə, bu, yalnız Rusiya ilə aparılan danışıqlara əsaslanmırdı, həm də Belarus ilə həmsərhəd olan bəzi xarici dövlətləri çəkindirmək xarakteri də daşıya bilərdi: “Rusiya isə öz növbəsində Priqojini itirmək istəmir, çünki Afrikada “Vaqnerə” hələ də ehtiyac var. Düzdür, Rusiya müdafiə nazirliyinin Şoyqu və Gerasimovun timsalında rəhbərliyinin, eləcə də bir çox generalların “Vaqner”dən narazı olması hər kəsə bəllidir. Bu baxımdan, Vaqnerin dönüşü siyasi-hərbi elitada yeni gərginliklər başlada bilər. Beləliklə də, Rusiyada vəziyyət gərginləşər. Hesab edirəm ki, Lukaşenkonun “Vaqner”dən imtinası bu məsələdə xüsusi əhəmiyyətli rol oynamır - “Vaqner”in Rusiyadan uzaqlaşdırılması, Belarusa yerləşdirilməsi xüsusi narazılıqların, ən əsası ordudakı etirazların qarşısını almaq üçün vacib şərtə çevrilmişdi".

GÜLAY

Paylaş:

Baxılıb: 841 dəfə