Kənd təsərrüfatının inkişafı Azərbaycanın dayanıqlı gələcəyinin əsas istiqamətlərindən biridir

Bakı:

27 °C

51 %

12 m/s

Əlaqə

AZ RU EN

Ana səhifə / Arxiv / Kənd təsərrüfatının inkişafı Azərbaycanın dayanıqlı gələcəyinin əsas istiqamətlərindən biridir

Kənd təsərrüfatının inkişafı Azərbaycanın dayanıqlı gələcəyinin əsas istiqamətlərindən biridir

02.06.2026 [14:59]

Sərtac Atlas

YAP Nərimanov rayon təşkilatının məsləhətçisi

Prezident İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər bir daha göstərdi ki, aqrar sektor Azərbaycanda yalnız iqtisadi fəaliyyət sahəsi kimi deyil, həm də milli təhlükəsizlik, ərzaq təminatı və regional inkişaf məsələsi kimi qiymətləndirilir. Son illərdə həyata keçirilən genişmiqyaslı infrastruktur layihələri və dövlət dəstəyi mexanizmləri kənd təsərrüfatının inkişafı üçün yeni imkanlar formalaşdırıb.

Müşavirədə vurğulandığı kimi, regionlarda həyata keçirilən layihələr kənd təsərrüfatının inkişafına mühüm təkan verib. Yol, enerji, qaz və su təminatı sahələrində görülən işlər kənd yerlərində iqtisadi fəallığın artmasına, yeni imkanların yaranmasına şərait yaradıb. Bu baxımdan aqrar sahənin inkişafı təkcə fermerlərin fəaliyyəti ilə deyil, dövlət tərəfindən formalaşdırılan ümumi iqtisadi və sosial mühitlə də sıx bağlıdır.

Subsidiyaların və dövlət dəstəyinin əhəmiyyətinin xüsusi vurğulanması da təsadüfi deyil. Bu yanaşma onu göstərir ki, dövlət kənd təsərrüfatını iqtisadiyyatın mühüm dayaqlarından biri hesab edir və onun inkişafına uzunmüddətli investisiya kimi yanaşır. Fermerlərə göstərilən dəstək həm məhsuldarlığın yüksəlməsinə, həm də yerli istehsalın güclənməsinə şərait yaradır. Bu isə daxili bazarın etibarlı təminatı və ərzaq təhlükəsizliyinin möhkəmləndirilməsi baxımından mühüm əhəmiyyət daşıyır.

Çıxışda su ehtiyatlarının idarə olunmasına ayrıca diqqət ayrılması da mühüm məqamlardan biri idi. Şirvan və Qarabağ kanalları ilə bağlı həyata keçirilən layihələr kənd təsərrüfatının gələcək inkişafında su təminatının həlledici rol oynadığını göstərir. Xüsusilə iqlim dəyişikliklərinin təsirlərinin hiss olunduğu müasir dövrdə su resurslarından səmərəli istifadə məsələsi daha da aktuallaşır. Bu səbəbdən həyata keçirilən layihələr yalnız mövcud tələbatın deyil, gələcək ehtiyacların da qarşılanmasına hesablanmış addımlar kimi qiymətləndirilə bilər.

Bu gün Azərbaycan kənd təsərrüfatında sadəcə mövcud potensialı qorumağa deyil, onu yeni inkişaf mərhələsinə daşımağa çalışır. Müşavirədə səsləndirilən hədəflər, həyata keçirilən infrastruktur layihələri və aqrar sektora göstərilən dövlət dəstəyi onu deməyə əsas verir ki, kənd təsərrüfatı gələcək illərdə də ölkənin sosial-iqtisadi inkişafının əsas istiqamətlərindən biri olaraq qalacaq. Bu baxımdan müşavirədə müzakirə olunan məsələlər yalnız cari vəziyyətin qiymətləndirilməsi deyil, həm də aqrar sahənin gələcək inkişaf yol xəritəsinin müəyyənləşdirilməsi kimi dəyərləndirilə bilər.

Paylaş:

Baxılıb: 440 dəfə