Azərbaycanın müasir aqrar inkişaf modeli

Bakı:

26 °C

63 %

9 m/s

Əlaqə

AZ RU EN

Ana səhifə / Arxiv / Azərbaycanın müasir aqrar inkişaf modeli

Azərbaycanın müasir aqrar inkişaf modeli

02.06.2026 [15:18]

Kənd təsərrüfatı Azərbaycan iqtisadiyyatının strateji istiqamətlərindən biri olmaqla yanaşı, ölkənin ərzaq təminatının möhkəmləndirilməsində, regionların inkişafında və əhalinin məşğulluğunun artırılmasında mühüm rol oynayır. Son illər həyata keçirilən məqsədyönlü dövlət siyasəti nəticəsində aqrar sektor sürətlə inkişaf edərək qeyri-neft iqtisadiyyatının aparıcı sahələrindən birinə çevrilib.

Azərbaycanın müasir aqrar inkişaf modelinin təməli Ümummilli Lider Heydər Əliyevin rəhbərliyi dövründə formalaşdırılıb. Ulu Öndərin təşəbbüsü ilə kənd təsərrüfatında mühüm struktur dəyişiklikləri həyata keçirilib, torpaq islahatları aparılıb və sahibkarlığın inkişafı üçün əlverişli şərait yaradılıb. Bu siyasət hazırda Prezident İlham Əliyev tərəfindən uğurla davam etdirilir və yeni dövrün tələblərinə uyğun olaraq daha da təkmilləşdirilir.

2026-cı il mayın 25-də Prezident İlham Əliyevin sədrliyi ilə keçirilən müşavirə aqrar sahənin inkişaf perspektivlərinin müəyyənləşdirilməsi baxımından xüsusi əhəmiyyət daşıyıb. Müşavirədə kənd təsərrüfatı və su təsərrüfatı sahələrində aparılan islahatların nəticələri təhlil olunub, qarşıda duran vəzifələr müzakirə edilib və yeni inkişaf istiqamətləri müəyyənləşdirilib.

Dövlət başçısı çıxışında kənd təsərrüfatının ölkənin iqtisadi təhlükəsizliyi və sosial rifahı üçün mühüm əhəmiyyət kəsb etdiyini vurğulayıb. Bildirilib ki, fermerlərin fəaliyyətinin dəstəklənməsi, subsidiya mexanizmlərinin təkmilləşdirilməsi, güzəştli kreditlərin əlçatanlığının artırılması və müasir texnologiyaların tətbiqi aqrar istehsalın səmərəliliyinin yüksəldilməsində mühüm rol oynayır.

Hazırda kənd təsərrüfatında innovativ yanaşmaların tətbiqinə xüsusi diqqət yetirilir. Su ehtiyatlarından səmərəli istifadə, müasir suvarma sistemlərinin qurulması, rəqəmsal texnologiyaların tətbiqi və yeni texnikaların istifadəsi məhsuldarlığın artmasına mühüm töhfə verir. Bununla yanaşı, kənd infrastrukturunun yenilənməsi və sosial layihələrin həyata keçirilməsi kənd əhalisinin həyat səviyyəsinin yüksəlməsinə şərait yaradır.

Aqrar sektorun inkişafı ölkənin ixrac imkanlarının genişləndirilməsi baxımından da böyük əhəmiyyət daşıyır. Yerli istehsal olunan məhsulların beynəlxalq bazarlarda rəqabət qabiliyyətinin artırılması qeyri-neft gəlirlərinin yüksəlməsinə və milli iqtisadiyyatın dayanıqlığının güclənməsinə xidmət edir.

İşğaldan azad edilmiş ərazilərdə aparılan genişmiqyaslı yenidənqurma işləri çərçivəsində kənd təsərrüfatının inkişafı da prioritet istiqamətlərdən biri kimi müəyyənləşdirilib. Həmin ərazilərin zəngin torpaq və su ehtiyatları gələcəkdə aqrar istehsalın genişləndirilməsi üçün böyük imkanlar yaradır. Bu isə həm yeni iş yerlərinin açılmasına, həm də ölkənin ümumi ərzaq təminatının gücləndirilməsinə xidmət edəcək.

Prezident İlham Əliyevin təsdiq etdiyi “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” aqrar sahənin gələcək inkişafının əsas yol xəritəsidir. Sənəddə kənd təsərrüfatında müasir istehsal üsullarının genişləndirilməsi, yüksək əlavə dəyər yaradan təsərrüfat modellərinin tətbiqi, aqrar xidmətlərin təkmilləşdirilməsi və dəyər zəncirinin gücləndirilməsi kimi vacib istiqamətlər öz əksini tapıb.

Dövlət Proqramının həyata keçirilməsi nəticəsində kənd təsərrüfatında məhsuldarlığın artırılması, ixrac potensialının genişləndirilməsi, fermerlərin gəlirlərinin yüksəldilməsi və kənd yerlərində dayanıqlı məşğulluğun təmin olunması gözlənilir. Eyni zamanda, balıqçılıq və akvakultura sahələrinin inkişafı hesabına ərzaq təhlükəsizliyinin daha da möhkəmləndirilməsi və ekoloji tarazlığın qorunması istiqamətində mühüm nəticələrin əldə olunacağı nəzərdə tutulur.

Azərbaycanda aqrar sektorun inkişafı dövlət siyasətinin əsas prioritetlərindən biri olaraq qalır. Həyata keçirilən islahatlar və qəbul olunan strateji proqramlar kənd təsərrüfatının rəqabətqabiliyyətliliyinin artırılmasına, ərzaq təhlükəsizliyinin etibarlı şəkildə təmin edilməsinə və ölkənin davamlı iqtisadi inkişafına mühüm töhfə verir.

Türkanə Kərimova

YAP Babək rayon təşkilatının əməkdaşı

Paylaş:

Baxılıb: 428 dəfə