Azərbaycan Cənubi Qafqazda yeni siyasi reallıqları formalaşdırır

Bakı:

28 °C

54 %

5 m/s

Əlaqə

AZ RU EN

Ana səhifə / Arxiv / Azərbaycan Cənubi Qafqazda yeni siyasi reallıqları formalaşdırır

Azərbaycan Cənubi Qafqazda yeni siyasi reallıqları formalaşdırır

06.07.2026 [09:42]

Müasir beynəlxalq münasibətlər sistemində dövlətlərin nüfuzu təkcə iqtisadi göstəricilər və ya hərbi potensialla deyil, həm də regional sabitliyə verdiyi töhfə ilə müəyyən olunur. Prezident İlham Əliyevin Avropa Komissiyasının Prezidenti Ursula Fon der Lyayenlə birgə bəyanatında səsləndirilən fikirlər göstərir ki, Azərbaycan artıq Cənubi Qafqazın gələcəyini formalaşdıran əsas aktorlardan biri kimi çıxış edir. Regional təhlükəsizlik, nəqliyyat-kommunikasiya imkanlarının genişləndirilməsi və sülh gündəliyi bu siyasətin əsas istiqamətlərini təşkil edir.

Son illərdə Azərbaycanın təşəbbüsü və ardıcıl fəaliyyəti nəticəsində ölkə Avrasiyanın mühüm nəqliyyat-logistika qovşaqlarından birinə çevrilib. Şərq–Qərb və Şimal–Cənub beynəlxalq nəqliyyat dəhlizlərinin məhz Azərbaycan üzərindən keçməsi təsadüfi deyil. Uzun illər ərzində avtomobil yollarına, dəmir yolu şəbəkəsinə, dəniz limanlarına və digər logistika infrastrukturuna qoyulan böyük investisiyalar bu gün öz real nəticələrini verir. Yeni geosiyasi şəraitdə beynəlxalq yükdaşımaların həcminin sürətlə artması Azərbaycanın tranzit imkanlarına olan tələbatı daha da yüksəldir. Bu isə ölkənin yalnız regional deyil, qlobal ticarət marşrutlarında da strateji əhəmiyyətini artırır.

Azərbaycanın üstünlüyü yalnız coğrafi mövqeyi ilə məhdudlaşmır. Ölkəmiz müxtəlif regionlar arasında etibarlı körpü rolunu oynayaraq qarşılıqlı faydalı əməkdaşlıq modelini formalaşdırıb. Qonşu dövlətlərlə qurulan etimada əsaslanan münasibətlər, beynəlxalq layihələrin uğurla reallaşdırılması və yeni infrastrukturun davamlı şəkildə genişləndirilməsi Azərbaycanın uzunmüddətli inkişaf strategiyasının mühüm tərkib hissəsidir. Bu siyasət həm regional iqtisadi inteqrasiyanı gücləndirir, həm də Avropa ilə Asiya arasında etibarlı əlaqələrin möhkəmlənməsinə xidmət edir.

Prezident İlham Əliyevin bəyanatında xüsusi yer tutan digər məsələ regionda sülh və təhlükəsizlik gündəliyidir. Azərbaycan ilə Ermənistan arasında normallaşma prosesinin uğurla irəliləməsi Cənubi Qafqaz üçün yeni siyasi reallıq yaradıb. Münaqişə dövrünün arxada qalması və sülh istiqamətində atılan addımlar regionun gələcək inkişafı baxımından mühüm əhəmiyyət daşıyır. Bu proses təkcə iki ölkə arasında münasibətlərin normallaşmasına deyil, bütövlükdə Cənubi Qafqazın sabitlik və əməkdaşlıq məkanına çevrilməsinə xidmət edir.

Azərbaycan bu məqsədlə sülhün gündəlik həyatda hiss olunmasına yönəlmiş mühüm addımlar da atır. Ermənistana daşınan yüklərin Azərbaycan ərazisindən tranzitinə qoyulmuş məhdudiyyətlərin aradan qaldırılması, enerji məhsullarının tədarükünə başlanılması qarşıdurmadan əməkdaşlığa keçidin praktik nümunələridir. Bu addımlar göstərir ki, Bakı sülhü yalnız siyasi sənədlərlə məhdudlaşdırmır, onu iqtisadi əlaqələr, humanitar əməkdaşlıq və qarşılıqlı etimad vasitəsilə möhkəmləndirməyə çalışır.

Prezident İlham Əliyevin vurğuladığı kimi, Azərbaycanın əsas məqsədi əldə edilmiş sülhü uzunmüddətli və dönməz prosesə çevirməkdir. Avropa Komissiyasının bu istiqamətdə göstərdiyi dəstəyə verilən yüksək qiymət də onu göstərir ki, beynəlxalq tərəfdaşlar regionda formalaşan yeni əməkdaşlıq mühitini müsbət dəyərləndirirlər. Əgər bu siyasi iradə qorunub saxlanılarsa, Cənubi Qafqaz yaxın gələcəkdə münaqişələrin deyil, qarşılıqlı etimadın, iqtisadi inteqrasiyanın və davamlı inkişafın nümunəsinə çevrilə bilər. Bu isə Azərbaycanın həyata keçirdiyi uzaqgörən siyasətin ən mühüm nəticələrindən biri kimi tarixə düşəcək.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 392 dəfə