20 Sentyabr–Xankəndi,Xocalı,Xocavənd və Ağdərə şəhərlərinin tariximizdəki yeri

Bakı:

25 °C

65 %

10 m/s

Əlaqə

AZ RU EN

Ana səhifə / Arxiv / 20 Sentyabr–Xankəndi,Xocalı,Xocavənd və Ağdərə şəhərlərinin tariximizdəki yeri

20 Sentyabr–Xankəndi,Xocalı,Xocavənd və Ağdərə şəhərlərinin tariximizdəki yeri

17.09.2026 [11:38]

Şamilli Turabəxanım,

YAP Nərimanov rayon təşkilatının gənc fəalı

20 sentyabr Azərbaycan tarixində həqiqətən də ən qürurlu və unudulmaz günlərdən biri kimi yaddaşımıza həkk olundu. Prezident İlham Əliyevin 18 sentyabr 2024-cü il tarixli Sərəncamı ilə bu tarixin rəsmi olaraq Xankəndi, Xocalı, Xocavənd və Ağdərə şəhərləri günü kimi müəyyənləşdirilməsi həm də illərlə içimizdə daşıdığımız həsrətə son qoyulduğunun rəsmi təsdiqidir. Amma etiraf edək ki, bu tarixi sadəcə təqvimdəki qırmızı rəqəm kimi qəbul etmək haqsızlıq olar. Çünki bu günün arxasında xalqımızın yaşadığı ağrılı-acılı illər, ədalətin bərpası uğrunda verilən mübarizə və Qarabağda başlanan böyük dirçəliş dövranı dayanır.

20 Sentyabrın doğurduğu yeni reallıq

Hər şeyin təməlində 2023-cü ilin sentyabr ayının 19–20-də reallaşan birgünlük lokal xarakterli antiterror tədbirləri dayanır. Ordumuzun həyata keçirdiyi bu peşəkar əməliyyat nəticəsində ölkəmizin suverenliyi tam bərpa olundu. Elə həmin ilin oktyabrında isə Xankəndi, Xocalı, Xocavənd və Ağdərə şəhərlərində üçrəngli Dövlət Bayrağımızın ucaldılması bizim üçün tamamilə yeni, şərəfli bir səhifə açdı. Artıq həmin ərazilərdə dövlət rəmzlərimiz dalğalanır və ən əsası, illərdir ev-eşiyindən didərgin düşən soydaşlarımız yurdlarına qayıdırlar.

Dörd şəhərin hərəsinin özünəməxsus tarixi və ruhu var

Bu günlə bağlı danışanda hər bir şəhərin bizim üçün nə qədər dəyərli olduğunu ayrıca dərk etmək lazımdır:

Xankəndi: Qarabağın qədim və mühüm mərkəzlərindən biri olan Xankəndi bu gün tamamilə başqa bir görkəm alır. Yadımdadır, 2023-cü ilin noyabrında Zəfərin üçüncü ildönümünün burada hərbi paradla qeyd olunması, dekabrda isə “Qarabağ” futbol klubunun matçının keçirilməsi hamımızda fəxrlə bərabər böyük bir rahatlıq hissi yaratmışdı. İndi isə bu şəhər yalnız inzibati mərkəz deyil; burada Qarabağ Universiteti fəaliyyət göstərir, hotellər, konqres mərkəzləri açılır və gənclərin şən səsi eşidilir.

Xocalı: Adını eşidəndə belə ürəyimiz sızıldayan Xocalı tariximizin ən ağır, unudulmaz yarasıdır. 1992-ci ilin fevralında baş verənlər heç vaxt yaddaşımızdan silinməyəcək. Amma bu gün Xocalıda tamamilə başqa bir ab-hava var – qayıdış ab-havası. 2024-cü ilin mayından etibarən keçmiş məcburi köçkünlərimiz doğma ocaqlarına dönməyə başlayıblar. Ballıca, Xanəbad, Təzəbinə, Şuşakənd və digər kəndlərdə artıq minlərlə insanın məskunlaşması sadəcə rəqəm deyil, həyatın qələbəsidir. Eyni zamanda, yaradılan Xocalı Soyqırımı Memorial Kompleksi tarixi yaddaşımızı əbədiləşdirən mühüm bir addımdır.

Xocavənd: Təbiəti, qədimliyi və zəngin irsi ilə seçilən Xocavənd dünya əhəmiyyətli Azıx və Tağlar mağaralarının ev sahibidir. Prezidentimizin bu bölgəyə səfərləri zamanı qədim Alban məbədlərinə, Tuğ kəndinə və digər tarixi məkanlara baxış keçirməsi onu göstərir ki, biz təkcə bu günü deyil, minillik tariximizi də bərpa edirik. Gələcəkdə bu bölgənin turizm potensialı ölkəmiz üçün böyük dəyər olacaq.

Ağdərə: 2023-cü ilin sentyabrında qanunsuz birləşmələrdən azad edilən Ağdərə də hazırda genişmiqyaslı bərpa prosesinin içindədir. Uzun illər dağıntılara məruz qalmış bu strateji ərazi indi digər rayonlarımız kimi sürətlə qurulur, infrastruktur layihələri həyata keçirilir.

Böyük Qayıdış və gələcəyə inam

Şəxsən mənim üçün bu prosesinə baxanda ən toxunverici məqam insan amilidir. Çünki torpaq yalnız daşla, divarla deyil, orada yaşayan insanların nəfəsi ilə Vətənə çevrilir. Xocalıda, Xankəndidə insanların evlərinə qayıtması, uşaqların məktəbə getməsi, küçələrdə həyatın qaynaması məhz budur – Böyük Qayıdışın real nəticəsidir. Yol çəkilir, məktəblər tikilir, xəstəxanalar, mədəniyyət ocaqları açılır. Prezidentimizin bu istiqamətdə yorulmaz səfərləri və hər bir layihənin şəxsən təməlini qoyması görülən işlərin miqyasını açıq göstərir.

Nəticə etibarilə, 20 Sentyabr – Xankəndi, Xocalı, Xocavənd və Ağdərə şəhərləri günü bizə keçmişin acılarını unutmamağı, eyni zamanda gələcəyə nə qədər güvənlə baxmalı olduğumuzu öyrədir. Bir gənc olaraq inanıram ki, bu torpaqların hər qarışı daha da gözəlləşəcək, o yerlərdə həyat heç vaxt sönməyəcək. Biz keçmişin izlərini qorumaqla yanaşı, bu torpaqlarda sülhün və quruculuğun əbədi olmasını təmin edirik.

Paylaş:

Baxılıb: 44 dəfə