Uğurlu siyasətin böyük nailiyyəti

Bakı:

23 °C

73 %

3 m/s

Əlaqə

AZ RU EN

Ana səhifə / Arxiv / Uğurlu siyasətin böyük nailiyyəti

Uğurlu siyasətin böyük nailiyyəti

21.09.2026 [14:37]

Sentyabrın 17-də Bakıda çox böyük beynəlxalq nüfuza malik olan Türk Dövlətləri Təşkilatı (TDT) çərçivəsində növbəti tədbirin keçirilməsi fəal qarşılıqlı əlaqələrin göstəricisidir. Eyni zamanda müxtəlif formatlarda müzakirə olunan məsələlər beynəlxalq gündəliyi, beynəlxalq təhlükəsizliyi, multikulturalizm, ticarət, nəqliyyat, ümumilikdə humanitar əməkdaşlıqla bağlı məsələləri əhatə edir. Siyasi-iqtisadi, enerji, nəqliyyat, humanitar və təhlükəsizlik sahələrində əlaqələrin genişlənməsi Türk Dövlətləri Təşkilatına (TDT) üzv dövlətlər arasında əməkdaşlığın sistemli xarakter aldığını nümayiş etdirir. Prezident İlham Əliyevin TDT-yə üzv ölkələrin təhlükəsizlik üzrə rəhbər şəxsləri ilə görüşdə vurğuladığı fikirlər də bu təşkilatın dəyişən beynəlxalq şəraitə uyğun olaraq yeni fəaliyyət istiqamətləri formalaşdırdığını bir daha təsdiqləyir.

Dövlətimizin Başçısı tədbirdə çıxışında qeyd etdi ki, Azərbaycan TDT-yə üzv ölkələrlə ikitərəfli formatda fəal əməkdaşlıq edir. Mənim təşkilata üzv ölkələrə çoxsaylı səfərlərim və TDT-yə üzv dövlətlərin başçılarının Azərbaycana səfərləri bunun parlaq göstəricisidir. Eyni zamanda, Azərbaycan Türkiyə, Qazaxıstan, Qırğızıstan və Özbəkistanla müttəfiqlik haqqında müqavilələr və bəyannamələr imzalayıb. Yəni bu, ikitərəfli qarşılıqlı əlaqələrin ən yüksək səviyyəsidir və bu müqavilələr uğurla həyata keçirilir.Qazaxıstan, Özbəkistan və Qırğızıstanla birgə investisiya fondları yaratmışıq, qarşılıqlı investisiyaların cəlb edilməsi və səfərbər olunması prosesi fəal şəkildə davam edir. Yəni ölkəmizin ikitərəfli gündəliyi ilk növbədə Türk dünyası ölkələrinə yönəlib. Bu, açıq çıxışlarımda dəfələrlə ifadə etdiyim kimi, bizim əsas xarici siyasət prioritetimizdir. O cümlədən demişəm ki, Türk dünyası bizim ailəmizdir və bizim başqa ailəmiz yoxdur.

Möhtərəm Prezidentimiz bildirdi ki, TDT-nin uğurlu inkişafının digər mühüm amili isə ondan ibarətdir ki, bu gün, necə deyərlər, xaotik dünyada ölkələrimizin ərazilərində sabitlik, sülh və təhlükəsizlik hökm sürür. Bugünkü siyasi və xarici siyasi reallıqlarda bu, inkişafın mühüm amilidir. Çünki məlumdur ki, sabitlik və təhlükəsizlik olmadan heç bir ölkənin inkişafı mümkün deyil. Bu və ya digər ölkədə sabit vəziyyət, siyasi və iqtisadi sabitlik yoxdursa, heç bir ölkəyə nə investisiyalar, nə texnologiyalar, nə də innovasiyalar gələcək. Yəni bu da bu gün ölkələrimizi yerləşdiyimiz regionlardakı digər ölkələrdən fərqləndirən mühüm amildir.Ölkələrimiz, həmçinin inamlı iqtisadi artım nümayiş etdirir. Durğunluq, iqtisadi geriləmə, digər iqtisadi və sosial çətinliklər bu gün, ümumiyyətlə müasir dünyanın reallıqlarıdır, xüsusilə də planetin müxtəlif yerlərində əks proseslərin getdiyini gördüyümüz bir vaxtda. Lakin TDT məkanında müsbət dinamikanı - həm sənaye istehsalının artımını, həm iqtisadi göstəriciləri, həm də sabit maliyyə sistemlərini görürük. Bütün bunlar ölkələrimizin və ölkələrimizdə dövlət səviyyəsində həyata keçirilən siyasətin böyük nailiyyətidir.

Mövcud beynəlxalq şərait TDT-nin təhlükəsizlik gündəliyini daha da aktuallaşdırır. Dünyanın müxtəlif bölgələrində davam edən müharibələr və münaqişələrin coğrafiyasının genişlənməsi regional sabitlik üçün yeni risklər yaradır. Belə bir şəraitdə TDT ölkələrinin yerləşdiyi geniş coğrafiyada təhlükəsizlik mühitinin qorunması xüsusi əhəmiyyət kəsb edir. Bu baxımdan təhlükəsizlik strukturları arasında koordinasiyanın gücləndirilməsi, operativ məlumat mübadiləsi, birgə fəaliyyət və mümkün təhdidlərin qarşısının alınması vacibdir. TDT daxilində bu istiqamətdə əməkdaşlığın dərinləşdirilməsi yalnız mövcud risklərə cavab verməyə deyil, potensial təhdidlərin əvvəlcədən müəyyənləşdirilməsinə və preventiv tədbirlərin əlaqələndirilməsinə də imkan yarada bilər.

Ölkə Başçısının beynəlxalq hüququn üstünlüyü ilə bağlı fikirləri də TDT-nin beynəlxalq gündəliyi baxımından əhəmiyyətlidir. Suverenlik, ərazi bütövlüyü və beynəlxalq hüququn fundamental prinsiplərinə hörmət dövlətlərarası münasibətlərin əsasını təşkil edir. Beynəlxalq hüquq normalarının pozulması isə təhlükəsizlik mühitinə və dövlətlərarası münasibətlərə mənfi təsir göstərir. Bu prinsiplərin qorunması istiqamətində TDT üzv dövlətlərinin mövqelərinin əlaqələndirilməsi təşkilatın beynəlxalq müstəvidə fəaliyyət imkanlarını genişləndirə bilər. Ümumi yanaşmanın formalaşdırılması həm üzv dövlətlərin maraqlarının müdafiəsi, həm də beynəlxalq hüququn əsas prinsiplərinə dəstəyin ifadəsi baxımından əhəmiyyətlidir. Üzv dövlətlər arasında mövcud etimad, ortaq dəyərlər, geniş coğrafi imkanlar və iqtisadi resurslar təşkilatın beynəlxalq mövqeyinin möhkəmlənməsi üçün mühüm zəmin yaradır. Bütün bunlar isə uğurlu siyasətin böyük nailiyyətidir.

Cavahir Əhmədova
YAP Qazax rayon təşkilatı ərazi partiya təşkilatının sədr müavini

Paylaş:

Baxılıb: 175 dəfə