Yeni sənaye imkanları yaradılır

Bakı:

23 °C

83 %

10 m/s

Əlaqə

AZ RU EN

Ana səhifə / Arxiv / Yeni sənaye imkanları yaradılır

Yeni sənaye imkanları yaradılır

24.09.2026 [11:03]

Azərbaycan Respublikasında 2027–2030-cu illərdə dağ-mədən və metallurgiya sənayesinin inkişafına dair Dövlət Proqramına həsr olunmuş müşavirədə Prezident İlham Əliyev dağ-mədən və metallurgiya sənayesinin Azərbaycan iqtisadiyyatı üçün perspektivli istiqamətlərdən biri olduğunu bildirdi. Qeyd olundu ki, Dövlət Proqramının 2027–2030-cu illərdə icrası çərçivəsində təbii resursların iqtisadi dövriyyəyə cəlb edilməsi ilə yanaşı, onların ölkə daxilində emal olunaraq daha yüksək əlavə dəyərli məhsullara çevrilməsi əsas hədəflərdəndir.

Prezident İlham Əliyev çıxışında Azərbaycanın son illərdə formalaşdırdığı infrastruktur və enerji potensialının yeni sənaye layihələrinin həyata keçirilməsi üçün mühüm baza yaratdığını diqqətə çatdırdı. Dövlət başçısının sözlərinə görə, ölkədə qazlaşmanın səviyyəsi 96 faizə çatıb və Azərbaycan 25 milyard kubmetrdən çox təbii qaz ixrac edir. Bu göstəricilər ölkənin enerji təhlükəsizliyi ilə yanaşı, enerji tutumlu sənaye sahələrinin inkişafı üçün də geniş imkanlar yaradır.

Müşavirədə Azərbaycanın zəngin mineral resurslarının iqtisadi dövriyyəyə cəlb olunması ilə yanaşı, işğal dövründə təbii sərvətlərə və ətraf mühitə vurulmuş zərər də diqqətə çatdırıldı. Prezident İlham Əliyev bildirdi ki, işğal dövründə Kəlbəcər, Laçın və Zəngilan rayonlarında 60 min hektar meşə fondu Ermənistan dövləti tərəfindən məhv edilib. Dövlət başçısı işğal altında olmuş ərazilərdə qızıl, mis və molibden kimi təbii sərvətlərin də qanunsuz istismar edildiyini vurğuladı.

İşğaldan azad edilmiş ərazilərdə yerləşən yataqların istismara hazırlanması Dövlət Proqramının mühüm istiqamətlərindən biridir. Kəlbəcər, Ağdərə və Zəngilan rayonlarında qızıl, mis və molibden yataqları üzrə işlərin genişləndirilməsi, mövcud ehtiyatların müasir geoloji üsullarla qiymətləndirilməsi nəzərdə tutulur. Bununla yanaşı, ölkənin digər regionlarında yerləşən perspektivli yataqların da iqtisadi potensialının araşdırılması davam etdiriləcək.

Dövlət Proqramının icrası nəticəsində dağ-mədən və metallurgiya sektorunun əlavə dəyərinin və illik ixrac potensialının artırılması, yeni istehsal güclərinin yaradılması və minlərlə daimi iş yerinin açılması nəzərdə tutulur. Dövlət Proqramı həmçinin Qarabağ və Şərqi Zəngəzur iqtisadi rayonlarının sosial-iqtisadi inkişafına, həmin ərazilərdə məşğulluğun artırılmasına və yeni sənaye müəssisələrinin yaradılmasına töhfə verəcək.

Dövlət başçısı çıxışında ekoloji məsələlərə də xüsusi diqqət yetirdi. Bildirildi ki, dağ-mədən layihələrinin həyata keçirilməsi zamanı təbiətin qorunması, ekoloji normalara riayət olunması və ən yüksək ekoloji standartların tətbiqi təmin edilməlidir. Bu baxımdan yeni sənaye layihələrinin iqtisadi səmərəliliyi ilə yanaşı, onların ətraf mühitə təsirinin minimuma endirilməsi də əsas tələblərdən biri kimi müəyyənləşdirilir.

Prezident İlham Əliyevin çıxışında vurğuladığı kimi, əsas məqsəd təbii sərvətlərin yalnız hasilatı deyil, onların ölkə iqtisadiyyatına maksimum səmərə verəcək şəkildə emal olunması və yeni sənaye imkanlarının yaradılmasıdır.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 152 dəfə