Dağ-mədən sənayesinin inkişafı ölkəmizin gücünün-qüdrətinin artmasına xidmət edəcək

Bakı:

23 °C

83 %

10 m/s

Əlaqə

AZ RU EN

Ana səhifə / Arxiv / Dağ-mədən sənayesinin inkişafı ölkəmizin gücünün-qüdrətinin artmasına xidmət edəcək

Dağ-mədən sənayesinin inkişafı ölkəmizin gücünün-qüdrətinin artmasına xidmət edəcək

24.09.2026 [15:29]

Prezident İlham Əliyevin sədrliyi ilə keçirilən "Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı"na həsr olunmuş müşavirədə səsləndirilən fikirlər bu sahənin dövlətin iqtisadi siyasətinin mühüm istiqamətlərindən biri olacağına əminlik yaradır.

Sentyabrın 22-də keçirilən müşavirədə Prezident İlham Əliyevin Azərbaycan regionlarının sosial-iqtisadi inkişafına dair qəbul əvvəllər edilmiş Dövlət Proqramları nəticəsində regionlarda əsas infrastruktur layihələrinin icra edilməsinə və gələcək inkişafa zəmin yaratmasına diqqət çəkməsi təsdiq edir ki, yeni qəbul edilən Proqram dağ-mədən sənayesinin inkişafını təmin etməklə Azərbaycanın gücünün-qüdrətinin artmasına xidmət edəcək.

Bu gün qeyri-neft sektorunun inkişafı dövlətimizin həyata keçirdiyi iqtisadi siyasətin əsas tərkib hissəsidir və iqtisadiyyatın şaxələndirilməsi siyasətinin uğurla həyata keçirilməsi Azərbaycanın dayanıqlı inkişafının təmin edilməsində əsas amillərdən biridir.

Dağ-mədən və metallurgiya sənayesinin inkişafı Azərbaycanın iqtisadi potensialının daha geniş şəkildə reallaşdırılması baxımından mühüm əhəmiyyət daşıyır. Bu sahənin inkişaf etdirilməsi, ilk növbədə, ölkənin zəngin təbii resurslarından daha səmərəli istifadə olunmasına, mövcud mineral-xammal bazasının iqtisadi dövriyyəyə cəlb edilməsinə və qeyri-neft sektorunun inkişafının sürətləndirilməsinə imkan verəcək. Ən əsası odur ki, dağ-mədən sənayesi Azərbaycanın iqtisadi potensialında mühüm yer tutan və xüsusilə qeyri-neft sektorunun inkişafına ciddi töhfə verəcək istiqamətlərdəndir.

Müşavirədə Prezident İlham Əliyev təbii resurslarımızın - qızıl, mis, molibden yataqlarımızın talan edildiyini, işğal dövründə Ermənistan dövlətinin ancaq talançılıqla məşğul olmasını qeyd etdi ki, bu da real həqiqət olmaqla dünya birliyinin gözü qarşısında baş verib. Danılmaz faktdır ki, ölkəmiz yeraltı sərvətlər baxımından geniş potensiala malik olsa da uzun müddət ərzində müxtəlif səbəblərdən bu potensialdan tam istifadə etmək mümkün olmayıb. Bunun əsas səbəblərindən biri heç şübhəsiz ki, Ermənistanın 30 il davam edən işğalçılıq siyasəti olub. Nəticədə Azərbaycanın bir sıra mühüm mineral yataqlarının iqtisadi dövriyyəyə cəlb edilməsinə ciddi maneələr yaranıb. Torpaqlarımızın işğalda qaldığı dövrdə Azərbaycanın təbii ehtiyatlarının Ermənistan tərəfindən qanunsuz istismarı da ölkənin mineral resurs potensialından istifadəyə mane olan amillərdən biri olub.

Hazırda işğaldan azad edilmiş ərazilərdə suverenliyin və təhlükəsizliyin təmin olunması bu resursların yenidən araşdırılması və iqtisadi dövriyyəyə cəlb edilməsi üçün yeni imkanlar açıb. Bu baxımdan, Qarabağ və Şərqi Zəngəzurun zəngin təbii ehtiyatları regionun sosial-iqtisadi inkişafının mühüm komponentlərindən birinə çevriləcək. Reallıq budur ki, dağ-mədən və metallurgiya sənayesi ölkə iqtisadiyyatı üçün perspektivli sahələrdən biridir. Qarşıya qoyulan əsas məqsəd yalnız mövcud yataqların istismarı ilə kifayətlənmək deyil, həm də bu sahədə müasir və dayanıqlı sənaye sisteminin formalaşdırılmasıdır. Bunun üçün təbii resursların araşdırılması, hasilatı, emalı və son məhsula çevrilməsi mərhələlərinin bir-biri ilə əlaqələndirilməsi xüsusi əhəmiyyət daşıyır. Burada əsas məsələ yalnız yataqların istismarı deyil. Daha mühüm hədəf hasil olunan xammalın ölkə daxilində emal edilməsi, zənginləşdirilməsi və son məhsula qədər tam istehsal zəncirinin yaradılmasıdır. Belə yanaşma həm əlavə dəyərin ölkə daxilində formalaşmasına, həm də sənaye potensialının gücləndirilməsinə imkan verəcək. Dağ-mədən sənayesinin inkişafı yeni sənaye müəssisələrinin yaradılması ilə yanaşı, məşğulluq imkanlarının genişlənməsinə də şərait yaradacaq. Ölkədə 5 mindən çox daimi iş yerinin yaradılmasının nəzərdə tutulması da bu sektorun sosial-iqtisadi əhəmiyyətini göstərir.

Eyni zamanda, hədəf Dövlət Proqramının icrası nəticəsində 2030-cu ilədək müvafiq sahədə dayanıqlı və rəqabətqabiliyyətli istehsalın inkişaf etdirilməsidir. Bundan başqa, mineral-xammal bazasının genişləndirilməsi əsas prioritet olacaq. Müasir texnologiyalardan istifadə etməklə yeni yataqların müəyyənləşdirilməsi Azərbaycanın mineral-xammal bazasının gələcəkdə daha da genişləndirilməsi baxımından mühüm imkanlar yaradacaq. Qərb Sənaye Parkının yaradılması da bu strategiyanın mühüm elementlərindən biridir. Parkın əsas məqsədlərindən biri dağ-mədən sənayesinin inkişafını təmin etmək, hasilatdan emala və son məhsul istehsalına qədər vahid sənaye zənciriformalaşdırmaqdır. Belə bir model Azərbaycanın qeyri-neft sektorunun şaxələndirilməsinə, sənaye istehsalının genişləndirilməsinə və ixrac imkanlarının artırılmasına xidmət edəcək. Qarşıdakı illərdə dağ-mədən sənayesi qeyri-neft sektorunun inkişafına öz töhfəsini verməklə ölkə iqtisadiyyatının şaxələndirilməsində və Azərbaycanın gücünün-qüdrətinin artmasında mühüm rol oynayacaq.

Vüqar İsayev,

Yeni Azərbaycan Partiyası Göygöl rayon təşkilatının sədri

Paylaş:

Baxılıb: 189 dəfə