Anım Günü – milli yaddaşımızın və Vətən sevgimizin rəmzi

Bakı:

20 °C

68 %

2 m/s

Əlaqə

AZ RU EN

Ana səhifə / Arxiv / Anım Günü – milli yaddaşımızın və Vətən sevgimizin rəmzi

Anım Günü – milli yaddaşımızın və Vətən sevgimizin rəmzi

25.09.2026 [12:56]

Azərbaycan xalqının tarixində elə günlər var ki, həmin tarixlər milli yaddaşımızda əbədi olaraq yaşayır. 27 Sentyabr – Anım Günü də məhz belə müqəddəs və əlamətdar günlərdəndir. Bu tarix Vətənimizin ərazi bütövlüyü və suverenliyi uğrunda canından keçən qəhrəman şəhidlərimizin əziz xatirəsinə dərin ehtiramın ifadəsidir. 2020-ci il sentyabrın 27-də Azərbaycan Ordusunun Ermənistan silahlı qüvvələrinin genişmiqyaslı hərbi təxribatlarına cavab olaraq əks-hücum əməliyyatına başlaması ilə Vətən müharibəsi başladı. 44 gün davam edən müharibə Azərbaycanın şanlı Zəfəri ilə başa çatdı. Bu tarixi Qələbə nəticəsində işğal altında olan torpaqlarımızın böyük hissəsi azad edildi, ölkəmizin ərazi bütövlüyünün bərpası istiqamətində mühüm tarixi nəticə əldə olundu. Vətən müharibəsində Azərbaycan xalqı və Azərbaycan Ordusu misilsiz həmrəylik və qəhrəmanlıq nümayiş etdirdi. Hərbçilərimiz böyük əzmkarlıq, cəsarət və fədakarlıq göstərərək doğma torpaqlarımızın azadlığı uğrunda mübarizə apardılar. Bu mübarizədə yüzlərlə igid Vətən övladı şəhidlik zirvəsinə ucaldı.

27 Sentyabr – Anım Günü Vətən müharibəsinin ilk gününü xatırlatmaqla yanaşı, şəhidlərimizin qarşısında daşıdığımız mənəvi məsuliyyəti də ifadə edir. Həmin gün Azərbaycan xalqı şəhidlərimizin xatirəsini dərin ehtiram və sonsuz minnətdarlıq hissi ilə yad edir, onların ailələrinə və yaxınlarına mənəvi dəstəyini nümayiş etdirir. Vətən müharibəsində əldə olunan Zəfər Azərbaycan dövlətinin gücünü, xalqımızın birliyini və milli həmrəyliyini bütün dünyaya nümayiş etdirdi. Müharibə dövründə ölkə daxilində və xaricində yaşayan azərbaycanlıların vahid amal ətrafında birləşməsi xalqımızın Vətən sevgisinin və milli birliyinin parlaq nümunəsinə çevrildi.

Vətən müharibəsində qazanılan tarixi Qələbə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə həyata keçirilən məqsədyönlü siyasətin, güclü ordu quruculuğunun və xalq-ordu birliyinin nəticəsi oldu. Azərbaycan dövləti uzun illər ərzində öz müdafiə qabiliyyətini gücləndirdi, müasir və peşəkar ordu formalaşdırdı və işğal faktının aradan qaldırılması üçün bütün siyasi, diplomatik və hərbi imkanlardan istifadə etdi. Şəhidlərimizin qanı bahasına əldə olunan Zəfər Azərbaycanın ərazi bütövlüyünün və milli suverenliyinin bərpası ilə nəticələndi.

27 Sentyabr həm də xalqımızın milli həmrəyliyini xatırladan bir gündür. 44 günlük müharibə zamanı Azərbaycan cəmiyyətinin nümayiş etdirdiyi birlik və həmrəylik tariximizin ən mühüm mənəvi dayaqlarından biri kimi yadda qaldı. Ölkənin müxtəlif bölgələrindən olan insanlar eyni amal – Azərbaycanın ərazi bütövlüyünün bərpası naminə bir yumruq kimi birləşdilər.

Bu gün işğaldan azad edilmiş ərazilərimizdə genişmiqyaslı bərpa və quruculuq işləri həyata keçirilir. Şəhər və kəndlər yenidən qurulur, müasir infrastruktur yaradılır, insanların doğma yurdlarına qayıdışı təmin edilir. Qarabağ və Şərqi Zəngəzurda aparılan quruculuq işləri şəhidlərimizin uğrunda canlarından keçdiyi Vətən torpaqlarının yenidən dirçəldilməsinin ən böyük göstəricilərindəndir. Azərbaycan xalqı şəhidlərinin xatirəsini yalnız müəyyən günlərdə deyil, hər zaman yaşadır. Şəhidlərimizin adları küçələrə, məktəblərə, park və digər ictimai məkanlara verilir, onların həyat və döyüş yolu haqqında məlumatlar gələcək nəsillərə çatdırılır. Bununla da qəhrəmanlarımızın Vətən qarşısındakı xidmətləri daim yaddaşlarda qorunur.

Şəhidlik Azərbaycan xalqının milli-mənəvi dəyərləri sistemində ən uca məqamlardan biridir. Şəhidlər öz canlarını Vətənin azadlığı və dövlətimizin ərazi bütövlüyü naminə fəda etdilər. Onların qəhrəmanlığı sayəsində Azərbaycan xalqı illərlə həsrətində olduğu torpaqlarına qovuşmaq imkanı qazandı. Bu səbəbdən şəhidlərimizin əziz xatirəsini yad etmək hər bir Azərbaycan vətəndaşının mənəvi borcudur. 27 Sentyabr bizə həm də Vətənin və dövlət müstəqilliyinin nə qədər böyük dəyər olduğunu xatırladır. Bu günün əsas mesajlarından biri ondan ibarətdir ki, azadlıq və suverenlik uğrunda qazanılmış Zəfərin qorunması, dövlətimizin inkişafına və güclənməsinə töhfə vermək hər birimizin vətəndaşlıq borcudur.

Şəhidlərimizin müqəddəs xatirəsi Azərbaycan xalqının qəlbində əbədi yaşayacaq. Onların qəhrəmanlıq salnaməsi gələcək nəsillər üçün Vətən sevgisinin, cəsarətin və fədakarlığın ən böyük nümunələrindən biri olacaq.

Araz Xudadanov

YAP Sabunçu rayon təşkilatının sədri

Paylaş:

Baxılıb: 108 dəfə