Nərimanov rayonunda 5 Oktyabr – Beynəlxalq Müəllimlər Gününə həsr olunmuş tədbir keçirilib

Bakı:

18 °C

94 %

4 m/s

Əlaqə

AZ RU EN

Ana səhifə / Arxiv / Nərimanov rayonunda 5 Oktyabr – Beynəlxalq Müəllimlər Gününə həsr olunmuş tədbir keçirilib

Nərimanov rayonunda 5 Oktyabr – Beynəlxalq Müəllimlər Gününə həsr olunmuş tədbir keçirilib

06.10.2026 [16:17]

YAP Nərimanov rayon təşkilatı və Peşə Təhsili üzrə Dövlət Agentliyinin birgə təşkilatçılığı ilə 5 Oktyabr – Beynəlxalq Müəllimlər Gününə həsr olunmuş tədbir keçirilib.

Tədbirdə YAP Nərimanov rayon təşkilatının sədri Elçin Quliyev, Peşə Təhsili üzrə Dövlət Agentliyinin direktoru İlqar Bayramlı, Elm və Təhsil Nazirliyinin şöbə müdiri-ƏPT sədri Rauf Orucov, elm və təhsil sahəsinin nümayəndələri, peşə təhsili müəssisələrinin rəhbərləri, qabaqcıl müəllimlər və ictimaiyyət nümayəndələri iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Vətənimizin ərazi bütövlüyü və suverenliyi uğrunda canından keçmiş şəhidlərin əziz xatirəsi ehtiramla yad edilib.

Tədbiri giriş sözü ilə Peşə Təhsili üzrə Dövlət Agentliyinin direktoru İlqar Bayramlı açaraq 5 Oktyabr – Beynəlxalq Müəllimlər Gününün əhəmiyyətindən danışıb. Bildirilib ki, müəllimlik yalnız bilik ötürmək deyil, eyni zamanda gənc nəslin dünyagörüşünün, vətəndaşlıq mövqeyinin və gələcək həyata hazırlığının formalaşmasında mühüm rol oynayan məsuliyyətli və şərəfli peşədir.

Tədbirdə “5 Oktyabr – Beynəlxalq Müəllimlər Günüdür” mövzusunda məruzə ilə çıxış edən Elm və Təhsil Nazirliyi yanında İctimai Şuranın və Respublika Təhsil Şurasının sədri, professor Hikmət Əlizadə müəllim əməyinin cəmiyyətin inkişafındakı rolundan, təhsilin qarşısında duran müasir çağırışlardan və müəllim peşəsinin məsuliyyətindən bəhs edib.

Daha sonra YAP Nərimanov rayon təşkilatının sədri Elçin Quliyev, Elm və Təhsil Nazirliyinin Maliyyə şöbəsinin müdiri, YAP Nərimanov rayon təşkilatı üzrə ƏPT sədri Rauf Orucov, Elm, ali və peşə təhsili şöbəsinin müdiri Turkan Süleyman, Strateji planlaşdırma və təhlil şöbəsinin müdiri Leyla Xəlilova-Rzazadə, Təhsilin iqtisadiyyatı şöbəsinin müdiri Leyla Abbaslı, həmin şöbənin sektor müdiri Zamin Ağayev, “Azərbaycan müəllimi” qəzetinin baş redaktoru Sarvan İbrahimov və “Peşə təhsili və insan kapitalı” jurnalının baş redaktoru Şahbaz Balakışiyev çıxış edərək müəllimləri peşə bayramı münasibətilə təbrik ediblər. Çıxışlarda müəllimlərin gənc nəslin təlim-tərbiyəsində, onların peşə və həyat bacarıqlarının formalaşmasında, ölkənin gələcək inkişafına töhfə verəcək insan kapitalının yetişdirilməsində mühüm missiya daşıdığı qeyd olunub.

Tədbir çərçivəsində YAP Nərimanov rayon təşkilatı tərəfindən Peşə Təhsili üzrə Dövlət Agentliyinin direktoru İlqar Bayramlıya təhsil sahəsində və partiyanın ictimai-siyasi həyatında səmərəli fəaliyyətinə görə Fəxri Fərman, həmçinin, fəaliyyəti ilə seçilən peşə təhsili işçilərinə Agentlik tərəfindən “Təşəkkürnamə”lər təqdim edilib.

Sonda xatirə şəkli çəkilib.

Paylaş:

Baxılıb: 89 dəfə