Mixail Zabelin: Azərbaycan bu gün öz gücünə, xalqın birliyinə və dövlətçilik iradəsinə söykənən inkişaf yolunda inamla irəliləyir

Bakı:

21 °C

83 %

5 m/s

AZ RU EN

Ana səhifə / Arxiv / Mixail Zabelin: Azərbaycan bu gün öz gücünə, xalqın birliyinə və dövlətçilik iradəsinə söykənən inkişaf yolunda inamla irəliləyir

Mixail Zabelin: Azərbaycan bu gün öz gücünə, xalqın birliyinə və dövlətçilik iradəsinə söykənən inkişaf yolunda inamla irəliləyir

08.10.2026 [17:26]

"Yeni Azərbaycan Partiyasının VIII qurultayı Azərbaycanın müasir siyasi tarixində yeni mərhələnin başlanğıcını ifadə edən mühüm hadisədir. Azərbaycan çoxmillətli və multikultural cəmiyyət kimi öz vətəndaşlarının birlik və həmrəyliyini dövlət siyasətinin mühüm dayaqlarından birinə çevirib. Bu baxımdan YAP-ın fəaliyyətində milli birlik, dövlətçilik və Azərbaycanın milli maraqlarının qorunması prinsipləri xüsusi əhəmiyyət daşıyır".

Bu fikirləri Milli Məclisin deputatı, YAP İdarə Heyətinin üzvü Mixail Zabelin deyib. O bildirib ki, YAP-ın yaranma tarixi Azərbaycanın ən ağır dövrünə təsadüf edib. 1992-ci ildə ölkənin siyasi böhran, iqtisadi tənəzzül və müharibə şəraitində olduğu vaxt Ulu Öndər Heydər Əliyevin ətrafında birləşən insanların təşəbbüsü ilə Yeni Azərbaycan Partiyasının əsası qoyuldu. 1993-cü ildə Heydər Əliyevin hakimiyyətə qayıdışı dövlətçiliyin qorunması, sabitliyin təmin olunması və Azərbaycanın inkişaf strategiyasının müəyyənləşdirilməsi baxımından yeni mərhələ yaratdı. Sonrakı illərdə bu siyasi xətt Prezident İlham Əliyev tərəfindən davam etdirilərək ölkəmizin ərazi bütövlüyünün və suverenliyinin bərpasına gətirib çıxardı: "Bu gün həmin tarixi nəticənin məsuliyyətini qorumaq və Azərbaycanın əldə etdiyi mövqeləri daha da möhkəmləndirmək əsas vəzifələrdəndir. Cənab Prezidentin qurultayda vurğuladığı kimi, güclü ordu və təhlükəsizlik bundan sonra da diqqət mərkəzində qalmalıdır. Dünyada müharibələrin, qarşıdurmaların və geosiyasi risklərin artdığı bir vaxtda Azərbaycan öz təhlükəsizliyini yalnız daxili sabitliklə deyil, həm də güclü müdafiə imkanları ilə təmin etməlidir. Qurultayda xarici siyasət, iqtisadi inkişaf, enerji təhlükəsizliyi, nəqliyyat dəhlizləri, investisiyaların cəlbi, Qarabağ və Şərqi Zəngəzurun bərpası, Böyük Qayıdış və sosial rifah məsələləri də qarşıdakı dövrün əsas istiqamətləri kimi təqdim edildi. Azərbaycanın müxtəlif siyasi güc mərkəzləri ilə münasibətlərini milli maraqlar əsasında qurması, beynəlxalq əməkdaşlıq imkanlarını genişləndirməsi ölkəmizin müstəqil siyasət yürütmək imkanlarını artırır".

YAP İdarə Heyəti üzvü bildirib ki, VIII Qurultayda müəyyənləşdirilən hədəflərin və vəzifələrin həyata keçməsinə YAP-ın hər bir üzvü və fəalı öz töhfəsini verəcək. "Bizim ümumi məqsədimiz birdir – Azərbaycanın müstəqilliyinin, təhlükəsizliyinin, inkişafının və rifahının daha da möhkəmləndirməkdir. Azərbaycan bu gün öz gücünə, xalqın birliyinə və dövlətçilik iradəsinə söykənərək inkişaf yolunda inamla irəliləyir", - deyə millət vəkili vurğulayıb.

P.İsmayılov

Paylaş:

Baxılıb: 231 dəfə