Azərbaycan regional əməkdaşlığa yeni töhfələr verir

Bakı:

20 °C

94 %

3 m/s

Əlaqə

AZ RU EN

Ana səhifə / Arxiv / Azərbaycan regional əməkdaşlığa yeni töhfələr verir

Azərbaycan regional əməkdaşlığa yeni töhfələr verir

13.10.2026 [13:47]

Azərbaycanın Mərkəzi Asiya ölkələri ilə münasibətlərinin inkişafı Prezident İlham Əliyevin həyata keçirdiyi uzaqgörən siyasətin mühüm istiqamətlərindən biridir. Oktyabrın 8-də Türkmənbaşı şəhərində keçirilən Azərbaycan və Mərkəzi Asiya Dövlət başçılarının 8-ci Məşvərət görüşündə dövlət başçısının səsləndirdiyi fikirlər bu əməkdaşlığın artıq yeni mərhələyə qədəm qoyduğunu göstərir. Prezident Azərbaycanın bu formatda tamhüquqlu iştirakına göstərilən dəstəyə görə həmkarlarına təşəkkürünü bildirərək bunun tarixi qərar olduğunu vurğuladı. Bu addım ölkəmizin Mərkəzi Asiya ilə əlaqələrinin möhkəmlənməsinə və regional əməkdaşlığın daha geniş imkanlar qazanmasına xidmət edir.

Dövlət başçısının çıxışında iqtisadi əlaqələrin yalnız ticarətlə məhdudlaşmaması fikri xüsusi diqqət çəkir. Prezident İlham Əliyev qeyd etdi: “Biz qarşılıqlı ticarətin artırılması ilə məhdudlaşmamalıyıq; biz birlikdə investisiya qoymalı, birlikdə istehsal etməli və birlikdə xarici bazarlara çıxmalıyıq.” Bu fikir ölkələr arasında əməkdaşlığın mahiyyətini aydın ifadə edir. Birgə müəssisələrin yaradılması, sənaye kooperasiyasının genişləndirilməsi və investisiya imkanlarından səmərəli istifadə edilməsi regionun iqtisadi potensialını daha da gücləndirə bilər.

Prezident İlham Əliyev nəqliyyat və enerji sahələrində əməkdaşlığın əhəmiyyətinə də toxundu. Xəzər dənizinin Mərkəzi Asiya ilə Azərbaycan arasında əlaqələrin inkişafında rolunun artdığını vurğulayan dövlət başçısı Orta Dəhlizin əhəmiyyətinin getdikcə yüksəldiyini diqqətə çatdırdı. Bu marşrut üzrə yükdaşımaların artması Azərbaycanın beynəlxalq nəqliyyat və logistika sistemindəki mövqeyini daha da möhkəmləndirir. Eyni zamanda, Qazaxıstan və Özbəkistanla yaşıl enerji dəhlizinin yaradılması istiqamətində görülən işlər gələcək əməkdaşlıq üçün yeni perspektivlər açır.

Çıxışın ən mühüm məqamlarından biri isə Prezidentin sülh və sabitliklə bağlı fikirləri idi. Dövlət başçısı bildirdi ki, sülh, təhlükəsizlik, siyasi və iqtisadi sabitlik bütün nailiyyətlərin təməlini təşkil edir. Bu yanaşma göstərir ki, Azərbaycanın regional siyasəti yalnız iqtisadi maraqlara deyil, həm də davamlı təhlükəsizliyin və qarşılıqlı etimadın möhkəmləndirilməsinə əsaslanır. Azərbaycanın 2027-ci ildə bu əməkdaşlıq formatına sədrlik edəcək olması ölkəmizə yeni təşəbbüslərlə çıxış etmək və qardaş dövlətlərlə əlaqələri daha da inkişaf etdirmək üçün əlavə imkanlar yaradacaq.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 19 dəfə

Xəbər lenti

Hamısına bax