Ermənistanda əhalinin sayı ötən əsrin 70-ci illərindəkindən də aşağı enib

Bakı:

14 °C

72 %

9 m/s

Əlaqə

AZ RU EN

Ana səhifə / Dünya / Ermənistanda əhalinin sayı ötən əsrin 70-ci illərindəkindən də aşağı enib

Ermənistanda əhalinin sayı ötən əsrin 70-ci illərindəkindən də aşağı enib

03.11.2016 [09:52]

Serj Sarkisyan Ermənistan dövlətini məhvə aparır
İqtisadiyyatı çökmüş, əhalisinin böyük əksəriyyəti aclıq və səfalət içində yaşayan Ermənistanda vəziyyət gündən-günə pisləşir. Hakimiyyəti zəbt etmiş Serj Sarkisyanın ölkədə kriminal üsul-idarə tətbiq etməsi, korrupsiya və rüşvətxorluğun baş alıb getməsi, ölkənin xarici borclarının təqribən 6 milyard ABŞ dollarına çatması, insan hüquq və azadlıqlarının kobud şəkildə pozulması, gizli iqtisadiyyatın xüsusi çəkisinin ilbəil artması özünü sadə ermənilərin güzəranında büruzə verməkdədir. Odur ki, ölkənin ziyalı təbəqəsi, eləcə də az-çox savadı və bacarığı olan ermənilər ailələrini dolandırmaq üçün həmişəlik olaraq Rusiya və başqa ölkələrə köç edirlər. İndi Ermənistanda miqrasiyanın səviyyəsi artıq o həddə çatıb ki, Milli Statistika Xidməti ölkədə əhalinin sayı ilə bağlı rəsmi məlumatları açıqlamaq məcburiyyətində qalıb.
1 oktyabr 2016-cı il tarixinə olan rəsmi məlumata əsasən, hazırda Ermənistanda daimi yaşayan ölkə vətəndaşlarının sayı 2 milyon 993,9 min nəfər təşkil edir. “Lragir.am” saytı yazır ki, bu barədə Ermənistanın Milli Statistika Xidmətinin rəsmi açıqlamasında qeyd olunur. Ötən ilin müvafiq dövrü ilə müqayisədə, bu 10,1 min nəfər, yaxud 0,3 faiz azdır. Məlumatda həmçinin qeyd olunur ki, 2015-ci illə müqayisədə cari ildə ölkədə şəhər əhalisinin sayı 6,3 min nəfər azalaraq 1milyon 904,6 min nəfər təşkil edib ki, bunun da 1,9 milyon nəfəri paytaxt Yerevanın payına düşür. Eləcə də cari ildə kənd yerlərində yaşayan əhalinin təbii artımında da geriləmə müşahidə edilməkdədir. Belə ki, 1 oktyabr tarixinə olan rəsmi məlumatlara görə, respublika ərazisində kənd yerlərində yaşayan əhalinin sayı 1 milyon 89,3 min nəfər təşkil edib.
Milli Statistika Xidmətinin məlumatında daha sonra qeyd olunur ki, müstəqillik əldə etdikdən sonra ilk dəfə olaraq, məhz cari ildə Ermənistanda əhalinin rəsmi sayı ötən əsrin 70-ci illərindəki saydan - 3 milyon nəfərdən az olmuşdur. Bundan əlavə, cari ilin yanvar-sentyabr aylarında doğulan uşaqların sayı 29 min 914 nəfər təşkil edib ki, bu da ötən ilin müvafiq dövrü ilə müqayisədə 2,3 faiz azdır.
Yerli ekspertlərin fikrincə, son iki ildə Serj Sarkisyanın başı ölkədə qurmuş olduğu kriminal hakimiyyətinin ömrünü uzatmağa qarışdığından vətəndaşların nə güzəranı, nə rifahı, nə də ki gələcək taleyi onu heç düşündürmür. İndi onu yalnız bir məsələ maraqlandırır - 2017-ci ilin aprelində keçiriləcək parlament seçkilərini hakim Respublika partiyasının xeyrinə saxtalaşdırmaq! Hakimiyyətin bütün rıçaqları və resursları da məhz bu məqsədlə səfərbər olunub.
Ekspertlərin sözlərinə görə, ötən il Seçki Məcəlləsində edilən dəyişikliklər parlament seçkilərinin saxtalaşdırılması üçün münbit şərait yaradır. Belə ki, əvvəlki seçkilərdən fərqli olaraq gələnilki parlament seçkiləri 41 seçki dairəsi üzrə deyil, artıq mərkəzləşdirilmiş 13 vilayət seçki dairələri üzrə keçiriləcək. Bu isə seçki məlumatlarının məxfiliyini hakimiyyətin xeyrinə təmin edəcək. Başqa sözlə, seçkilərin açıq və şəffaf keçirilməsinin qarşısını alacaq.
Maraqlısı isə odur ki, parlament seçkilərindən sonra Ermənistanda anormal bir vəziyyət hökm sürəcək. Belə ki, ötən il keçirilən referendumla ölkə prezident üsul-idarəli respublikadan parlament respublikasına çevrilsə də, hakimiyyət strukturunda elə bir dəyişiklik baş verməyəcək. Başqa sözlə, Serj Sarkisyanın prezidentlik müddəti hələ 2018-ci ilin aprelində başa çatdığından sadə erməni vətəndaşları daha bir il müddətində də onun kriminal rejiminin quluna çevriləcəklər. Hər halda Prezident Administrasiyasının rəhbəri Armen Gevorkyanın noyabrın 1-də jurnalistlərə müsahibəsi belə deməyə əsas verir.
“Lragir.am” saytı yazır ki, Armen Gevorkyanın sözlərinə görə, Prezident Administrasiyasının maliyyələşməsi gələn il olduğu kimi davam etdiriləcəkdir. “Prezidentin səlahiyyətləri 2018-ci ilin aprelində başa çatacaq. Baxmayaraq ki, ölkə parlament idarəçiliyinə keçib, prezidentin səlahiyyətləri və Administrasiyasının maliyyələşməsi o vaxtadək olduğu kimi qalacaqdır. Odur ki, artıq əhali də bununla barışmalıdır”, - deyə Armen Gevorkyan vurğulayıb.
Maraqlıdır, iqtisadiyyatı çökmüş, əhalisinin böyük əksəriyyəti aclıq və səfalət içində yaşayan Ermənistanda sadə vətəndaşlar, görəsən, Serj Sarkisyan, eləcə də onun kriminal rejiminin xalqı daha neçə illər boyu belə bir vəziyyətdə yaşamağa məcbur etməsinə dözə biləcəklərmi? Bəs ölkə müxalifəti necə - Serj Sarkisyanın ötən on il boyunca öz xalqına tutduğu divanı həzm edə biləcəklərmi? Öz səbatsız siyasəti ilə ölkəni uçurumun kənarına sürükləməsini, Ermənistan dövlətini məhv olmaq təhlükəsi ilə üz-üzə qoymasını ona belə asanlıqla bağışlayacaqlarmı? Bunu zaman göstərəcək...
Səlim LOĞMANOĞLU

Paylaş:

Baxılıb: 1084 dəfə