Sarkisyan fakt qarşısında...

Bakı:

0 °C

80 %

10 m/s

Əlaqə

AZ RU EN

Ana səhifə / Dünya / Sarkisyan fakt qarşısında...

Sarkisyan fakt qarşısında...

16.12.2016 [10:11]

Ermənistan vətəndaşlarının mövcud rejimə qarşı etiraz aksiyaları səngimir, erməni lobbisi isə Sarkisyan hakimiyyətinə təzyiqlərini davam etdirir
Ermənistanda ictimai-siyasi kataklizmlər artıq hökumət böhranına transfer olunub. Serj Sarkisyanın rəhbərlik etdiyi hərbi xuntanın qəbul etdiyi qərarlar vətəndaşların etirazına səbəb olmaqla yanaşı, siyasi xaos və qarşıdurmaya rəvac verir. Erməni KİV-i yazır ki, iqtisadi sahədə müşahidə edilən tənəzzül daha da dərinləşib və bu, növbəti siyasi böhrana yol aça bilər. Son zamanlar keçirilən etiraz aksiyaları Sarkisyan hakimiyyətinə ciddi mesajlar verib. Hakimiyyət siyasi və iqtisadi tənəzzülün nəticələrini aradan qaldırmaq gücündə olmadığı üçün yenə də güc tətbiqinə istinad etsə də, növbəti siyasi böhranın uzaqda olmadığını təxmin etmək çətin deyil.
Yeri gəlmişkən, Ermənistanda ölkənin strateji müəssisələrindən olan “Nairit” kimya zavodunun işsiz qalan əməkdaşları yenidən etiraz aksiyası keçiriblər. Müəssisənin müflisləşməsi xəbəri işçilərin narahatlığına səbəb olub. Zavodun 260-a yaxın əməkdaşı 4 aydır ala bilmədikləri əmək haqlarını tələb edir. “Onlar bizi taleyin ümidinə buraxıblar. 4 aydır evimizə çörək pulu apara bilmirik. Əvvəl ixtisar etdikləri əməkdaşlara isə 2 ilə yaxındır alacaqlarını vermirlər. İndi də deyirlər, zavod müflis olub. Bəs bizim taleyimiz necə olacaq?” - deyə zavod əməkdaşları bildiriblər. Daha sonra əraziyə cəlb olunan polis qüvvələri ilə qarşıdurma olub.
Bundan başqa, “Tert.am” yazır ki, Sarkisyan hakimiyyəti ilə erməni diasporu arasında mövcud olan ziddiyyətlər artmaqdadır. Ermənistan hakimiyyətinin başlıca dayaq nöqtəsi olan xaricdəki erməni lobbisi də hazırkı hərbi xuntanı tənqid və qınaq atəşinə tutmaqdadır. Bu istiqamətdəki son tendensiya mövcud hakimiyyətlə xaricdə yaşayan ermənilər arasında kəskin ziddiyyət, mübahisə və mübarizənin müşahidə olunmasıdır. Belə ki, Fransa, Livan və ABŞ-dakı erməni lobbisi, demək olar ki, davamlı olaraq Sarkisyan hakimiyyətinin əleyhinə tənqidi materiallar yayır, üstəlik, lobbinin nəzarəti altında fəaliyyət göstərən əksər mətbu orqanlar da Ermənistan hakimiyyətini kəskin şəkildə tənqid edirlər. Digər tərəfdən, erməni diasporu artıq əvvəlki kimi mövcud hakimiyyətin beynəlxalq aləmdəki təbliğat maşını funksiyasını yerinə yetirmir. Eyni zamanda, diaspor Sarkisyan hakimiyyətinə etdiyi maliyyə yardımlarını da kəsmək haqqında müəyyən mesajlar verməkdədir. Bundan savayı, erməni diasporu mövcud Ermənistan hakimiyyətinə qarşı açıq-aşkar siyasi və iqtisadi təzyiqlər də etməyə başlayıb.
“Armenian Today” isə yazır ki, erməni diasporu hazırkı rejimin ölkəni sürətlə fəlakətə sürüklədiyini bəyan edib. Diaspor prezident başda olmaqla yeni yaradılan hökuməti də istefaya səsləyib. “Ermənistanda ədalət” Təşəbbüs Qrupunun üzvləri hakimiyyətin ünvanına sərt ittihamlar səsləndiriblər. Kinorejissor və ssenarist Erik Nazaryan hökumətin görməli olduğu işi diasporun yerinə yetirdiyini bildirib. Xaricdə yaşayan ermənilər mütəmadi olaraq ölkəyə külli miqdarda pul vəsaiti göndərirlər ki, kasıb əhalinin güzəranı yaxşılaşdırılsın. Amma illərdir bunun əksi müşahidə olunur. Pullar hökumət tərəfindən mənimsənilir. Amerikadakı ermənilər yeni çağırış ünvanlayıblar. Onlar hər kəsi hökumətlə mübarizə aparmağa çağırıblar. Video-konfransda xaricdə yaşayan ermənilər Ermənistanı talayan hökuməti istefaya səsləyiblər.
Bütövlükdə, Ermənistan çox ciddi siyasi, iqtisadi kataklizmlərlə qarşı-qarşıyadır. İşğalçı ölkədə dərin sosial-iqtisadi tənəzzül meyilləri Sarkisyan hakimiyyəti ilə xalq arasında uçurumu dərinləşdirməklə yanaşı, sosial gərginliyin artmasını şərtləndirib. Hakimiyyətdə olan hərbi xuntanın qəbul etdiyi qərarlar vətəndaşların etirazına, xaos və qarşıdurmaya rəvac verir. Hakimiyyət manevrləri davam etdirməyə çalışsa da, Ermənistan faktiki olaraq iflasın astanasındadır. Eyni zamanda, hakimiyyət repressiya siyasətini daha da kəskinləşdirərək müxalifətə və ictimai-siyasi fəallara qarşı davamlı təzyiqlər göstərir ki, bu da siyasi kataklizmləri şərtləndirir. Bir sözlə, Ermənistanda total böhran yaşanır.
Nurlan QƏLƏNDƏRLİ

Paylaş:

Baxılıb: 1052 dəfə