Gürcüstan müxalifəti əsas məqsədinə nail ola bilmədi

Bakı:

15 °C

67 %

8 m/s

Əlaqə

AZ RU EN

Ana səhifə / Dünya / Gürcüstan müxalifəti əsas məqsədinə nail ola bilmədi

Gürcüstan müxalifəti əsas məqsədinə nail ola bilmədi

25.06.2009 [09:56]

Bu ölkədəki etiraz aksiyaları öz aktuallığını itirməkdədir
Gürcüstan müxalifətinin iki aydan bəri davam edən etiraz aksiyaları getdikcə öz kütləviliyini, səmərəliliyini, nizamını və əvvəlki aktuallığını itirməkdədir. Bir çox yerli və xarici siyasi müşahidəçilərin ehtimallarının əksinə olaraq Gürcüstanda növbəti “rəngli inqilab” baş vermədi. Müxalifət qarşıya qoyduğu əsas məqsədinə - prezident Mixail Saakaşvilinin istefasına nail ola bilmədi. Bu baxımdan, son vaxtlar Gürcüstanda cərəyan edən siyasi proseslərlə bağlı bəzi vacib məqamlara diqqət yetirmək maraqlı olardı. İlk növbədə, prezident M.Saakaşvili və onun başçılıq etdiyi komandanın uğurlu, məntiqli, praqmatik addımlarını, siyasi gedişlərini qeyd etmək lazımdır. Məhz bu addımların nəticəsidir ki, ölkədəki siyasi proseslər kütləvi qarşıdurmalar, anarxiya və xaos (bəzi kiçik insidentləri çıxmaq şərtilə) həddinə gəlib çıxmadı, cərəyan edən hadisələr nəzarət altında saxlandı.
M.Saakaşvili xeyli təmkin və səbir nümayiş etdirərək proseslərin sivil, demokratik məcraya yönəlməsi üçün ciddi cəhdlər göstərdi və müəyyən məqamlarda istəyinə nail ola bildi. Belə ki, müxalifətin “mitinq epopeyasının” normal gedişi üçün ölkədəki demokratik ab-hava və mühit məhdudlaşdırılmadan qorunub saxlandı. Bu da öz növbəsində radikal müxalifətin müəyyən bir qismi ilə normal siyasi dialoqun qurulması üçün əlverişli şərait yaratdı. Hakimiyyət prezidentin istefası tələbi istisna olmaqla ölkə üçün mühüm əhəmiyyət kəsb edən bütün problemləri müzakirə etmək məqsədilə bəzi müxalifət dairələri ilə siyasi dialoq qura bildi. Nəticə etibarı ilə müxalifət düşərgəsində müəyyən fikir ayrılıqları və parçalanma baş verdi. Birləşmiş radikal müxalifətin iqtidara qarşı tutduğu sərt mövqeyə gəlincə isə, bu düşərgəni təmsil elən qüvvələrin M.Saakaşvilini diktatorluqda ittiham edərək onun istefası ilə bağlı tələbləri həddən artıq absurd və qeyri-ciddi görünür.
İqtidarın yaratdığı demokratik mühitdən yararlanaraq belə məntiqsiz və qeyri-konstruktiv arqumentlər ortaya qoyan müxalifətin yersiz iddiaları indiki dönəmdə ölkə üçün yaxşı heç nə vəd etmir. Bir çox ekspertlərin rəyinə görə, radikal qüvvələrin əsas məqsədlərinə nail ola bilməməsi müxalifət və onun liderlərinin geniş kütlələr içində getdikcə nüfuzdan düşməsinə, əksinə, M.Saakaşvilinin və onun komandasının reytinqinin artmasına səbəb ola bilər. Məhz bu səbəbdən də radikal müxalifət liderləri etiraz aksiyalarını bütün yay boyunca davam etdirməklə əlavə siyasi dividentlər qazanmaq ümidindədirlər. Lakin belə bir perspektivsiz yolla müxalifətin nə əldə edəcəyi hələki bəlli deyil.
öz növbəsində, ölkədəki mövcud ictimai-siyasi durum onu göstərir ki, indiki şəraitdə bu iki tərəf qarşılıqlı güzəştli addımlar atmağa hazır olmalıdır. Yəni, dərin ziddiyyətləri aradan götürmək və qarşıdurmaya son qoymaq üçün iqtidar ilə müxalifət arasında başlanmış siyasi dialoqun davam etdirilməsi ən vacib şərtlərdən biridir. Bu baxımdan, iqtidarın mövqeyi qeyd edilən məsələ ilə əlaqədar daha məntiqli və konstruktiv görünür. Son illər Gürcüstanda yaranmış normal, sağlam siyasi iqlim də iqtidar-müxalifət ziddiyyətlərinin aradan qaldırılması üçün əlverişli zəmin ola bilər. Bunun üçün isə radikal müxalifət siyasi iradə və ciddi konstruktivlik nümayiş etdirməlidir.
Elxan RZAYEV

Paylaş:

Baxılıb: 1470 dəfə