Ermənistanda etiraz aksiyaları genişlənir

Bakı:

0 °C

80 %

9 m/s

Əlaqə

AZ RU EN

Ana səhifə / Dünya / Ermənistanda etiraz aksiyaları genişlənir

Ermənistanda etiraz aksiyaları genişlənir

05.09.2020 [10:40]

Yalnız vədlər verməklə məşğul olan Paşinyan hökuməti isə çıxılmaz vəziyyətdədir

Ermənistanda illərdir ki, mövcud olan sosial-iqtisadi böhrana pandemiyanın da əlavə etdiyi çətinliklər işğalçı ölkədə yeni etiraz dalğasına rəvac verib. Belə ki, ölkədə fövqəladə vəziyyət rejiminin hökm sürməsinə baxmayaraq, demək olar ki, hər gün hakimiyyətdən narazı əhalinin müxtəlif etiraz aksiyalarının şahidi olmaq mümkündür. Baş nazir Nikol Paşinyanın ittihamları səngitmək üçün baş vurduğu cəhdlər də artıq fayda vermir. Yerli ekspertlərin fikrincə, sosial durumdan narazılıqların fonunda bu payız siyasi səhnədə də fəallığın artması gözlənilir.

Qeyd edildiyi kimi, işğalçı ölkədə keçirilən etiraz aksiyaları müxtəlif səbəblərdən qaynaqlanır. Məsələn, sentyabrın 3-də Ararat vilayətinin bir neçə kəndinin sakinləri Ermənistan-İran yolunu bağlayıblar. “Shamshyan.com”un yaydığı məlumata görə, vilayətdə baş verən bu fövqəladə hadisənin səbəbi kənd sakinlərinin yetişdirdikləri üzüm məhsullarını satmalarına qarşı yaradılan maneələrdir.

Ermənistan hökumətinə qarşı növbəti etiraz aksiyası isə elə həmin gün paytaxt İrəvanda baş tutub. “News.am” saytının yazdığına görə, hökumət binasının qarşısında toplaşan etirazçılar işləmək üçün Rusiyaya getmək məsələsinin həllini tələb ediblər. Daha sonra Ermənistan XİN-in binasına üz tutan aksiya iştirakçıları bu dəfə xarici işlər naziri Zöhrab Mnatsakanyanı maşına tərəf hərəkət edərkən “yaxalayıblar”. Mnatsakanyan etirazçılara deyib ki, Rusiya tərəfi ilə danışıqlar və müzakirələr diplomatik və digər kanallarla davam edir, lakin sərhədlərin nə vaxt açılacağı bəlli deyil.

Xarici işlər nazirinin etirazçılara konkret cavab verə bilməməsi aksiya iştirakçıları kimi bəzi erməni ekspertlərində də təəccüb doğurur. Onların fikrincə, dünyada pandemiyanın davam etdiyi bir vaxtda Ermənistanın əsas işçi qüvvəsinin ölkəni tərk etmək istəyi hakimiyyətə gələndən bəri repatriasiyadan, iş yerlərinin artırılmasından danışan Paşinyanın verdiyi vədlərin puçluğunu göstərir.

Bu etiraz aksiyaları fonunda son vaxtlar siyasi dairələrdə Ermənistanı “isti payız”ın gözlədiyi haqqında ehtimallar artır. Belə ki, “Past” qəzetinin yazdığına görə, bu söz-söhbətlər əsassız deyil, konkret addımlar atılır: “Mənbəmizin verdiyi məlumata görə, yaxın aylarda müxalifətin bir neçə istiqamətdə daha da aktivləşməsi gözlənilir. Siyasi qüvvələr rolları açıq şəkildə bölüşdürəcəklər”.

Politoloq Vigen Hakopyan isə “Aysor.am”a verdiyi müsahibəsində “Ermənistanın bütün keçmiş prezidentlərinin kifayət qədər aktiv fəaliyyətə başladığını nəzərə alsaq, yayda siyasət səhnəsində fəallığın müşahidə edildiyini söyləmək olar. “Vətən”, “Çiçəklənən Ermənistan”, “Daşnaksutyun” və digər partiyalar həm müstəqil, həm də bir-biri ilə əməkdaşlıq şəraitində fəallıq göstəriblər. Yəni müxalifət cəbhəsində kifayət qədər aktiv proseslər gedir”,-deyə söyləyib.Onun sözlərinə görə, hökumətin vəd etdiyi islahatlar və kadr məsələləri artıq ayrı-ayrı siyasi problemlərə çevrilir:“Bu problemlər aylardır, həll olunmur və hakimiyyət üçün xoşagəlməz məqam hər kəsin problemlərin həllini tələb etməsi ola bilər”.

Beləliklə, hakimiyyətə gələndən bəri yalnız vədlər verən Paşinyan hökumətinə qarşı ayağa qalxan sadə ermənilərə siyasi qüvvələrin də dəstək verəcəyi gözlənilir. Ekspertlərin söylədiklərinə görə, müxalifət qüvvələri payızda hakimiyyətin qarşısında dayanan mövcud və xroniki problemlərdən, o cümlədən “Amulsar” qızıl mədəninin istismarından, pandemiyaya görə mövcud olan gərgin sosial-iqtisadi vəziyyətdən və digər məsələlərdən də istifadə edərək etiraz aksiyalarına start verəcəklər.

Qaşqay ZİYƏDDİNOĞLU

Paylaş:

Baxılıb: 628 dəfə