Ermənistanda siyasi qarşıdurma: işğalçı və məğlub ölkə uçuruma yuvarlanır

Bakı:

0 °C

80 %

9 m/s

Əlaqə

AZ RU EN

Ana səhifə / Dünya / Ermənistanda siyasi qarşıdurma: işğalçı və məğlub ölkə uçuruma yuvarlanır

Ermənistanda siyasi qarşıdurma: işğalçı və məğlub ölkə uçuruma yuvarlanır

03.12.2020 [10:02]

Diktator Paşinyan isə repressiya və güc tətbiqini yeganə çıxış yolu kimi görür
Məlum olduğu kimi, uzun illərdir, apardığı işğalçılıq siyasətinin ağır nəticələri ilə üzləşən Ermənistanda vəziyyət gərgin olaraq qalır. Belə ki, 20 gündən çoxdur, paytaxt Yerevan başda olmaqla, ölkənin hər yerində hökumətin istefası tələbi ilə yürüş, mitinq və vətəndaş itaətsizliyi xarakteri daşıyan digər kütləvi aksiyalar keçirilir. İstefa tələblərinə etinasız yanaşan baş nazir Nikol Paşinyan hakimiyyətin əleyhinə çıxış edənlərə güc tətbiq etmək yolunu seçib. Ermənistan mətbuatının yazdığına görə, hökumətdə təmsil olunan məmurlar və hakim partiyadan olan deputatlarla yanaşı, artıq vilayət rəhbərlərinin də istefaları başlayıb.
Etiraz aksiyalarının miqyası genişlənir
Yerevanda vətəndaş itaətsizliyi aksiyaları da davam etməkdədir. Etirazçılar “Satqın Nikol!” şüarları səsləndirərək baş nazirin istefasını tələb edirlər. Ancaq etiraz aksiyalarına polisin müdaxiləsi sərtləşib. “Aysor.am”ın Ermənistan polisinin mətbuat xidmətinə istinadən verdiyi məlumata görə, son aksiya zamanı polis N.Paşinyanın istefasını tələb edən 35 nümayişçini saxlayıb. Sayt yazır ki, polis media nümayəndələrinə də güc tətbiq edib. Belə ki, “Yerkir Media TV” şirkətinin operatoruna qarşı zorakılıq edilib, onun canlı yayım avadanlığı sıradan çıxarılıb.
Qeyd edək ki, hər gün hökumət binası və müdafiə nazirliyinin qarşısında əsgər valideynlərinin etiraz aksiyaları da davam edir. İtkin düşmüş şəxslərin yaxınları hökumətin onlara etinasız yanaşdığını bildirirlər. “News.am”ın yazdığına görə, “Daşnaksutyun” partiyasının gənclər birliyi 2 dekabrda N.Paşinyanın baş nazir postundan istefası tələbi ilə yürüş təşkil edib. Sayt yazır ki, bu günlərdə aclıq aksiyasını dayandıran “Daşnaksutyun”un funksioneri Geqam Manukyan bundan sonra da Paşinyanın istefası üçün bütün mübarizə metodlarından istifadə edəcəklər. Onun sözlərinə görə, Paşinyanın ucbatından ermənilər başlarını aşağı salaraq gəzirlər.
İstefa dalğası davam edir
Qeyd edək ki, Paşinyanın komandasında istefalar da davam edir. Bu günə qədər hökumətdə və parlament fraksiyasında istefalar müşahidə edilsə də, artıq regionlarda məmurların istefası başlayıb. “Aysor.am” yazır ki, Sünik vilayətinin qubernatoru Hunan Poqosyan istefa ərizəsi yazıb. Qubernatorun köməkçisi Armine Avakyan məlumatı təsdiq edərək deyib ki, hökumətin müvafiq qərarı çıxana qədər H.Poqosyanın vəzifələrini yerinə yetirməyə davam edəcək. “News.am” yazır ki, Şirak vilayətinin qubernator müavini Vardan Qriqoryan da istefa verib.
Qeyd edək ki, “Mənim addımım” blokunun parlament fraksiyasını daha bir deputat tərk edib. Deputat Qor Gevorkyan bəyan edib ki, indiki dövrdə ortaya çıxan müəyyən reallıqlar və bəzi məsələlər üzrə fikir ayrılıqlarına görə müstəqil deputat kimi fəaliyyət göstərəcək. “News.am” yazır ki, belə davam edərsə, parlament çoxluğu mövcud hakimiyyətin əlindən çıxa bilər. Belə ki, “Mənim addımım”ın parlamentdə 85 deputatı var, deputatların sayı 79-a ensə, Paşinyan parlamentdəki konstitusion çoxluğunu itirir. Bu vəziyyət hakim blokun qapalı toplantı keçirməsinə səbəb olub. Bu barədə məlumat yayan “Factor.am”ın yazdığına görə, fraksiya mövcud vəziyyəti və perspektiv planları müzakirə edib. İclasda 10 noyabrda döyüldükdən sonra ilk dəfə parlamentə gələn spiker Ararat Mirzoyan da iştirak edib.
Paşinyanın istefası tələb olunur
Mövcud vəziyyəti dəyərləndirən “Hraparak” qəzeti yazıb ki, artıq N.Paşinyan öz komandasının ona etimadsızlıq göstərəcəyindən qorxur: “Nikol Paşinyana inamsızlıq hər yerdə, hətta öz komandasında da hökm sürür. Buna görə də Paşinyan hərbi vəziyyəti ləğv etməkdən imtina edir. Komandanın sədaqətindən əmin olsaydı, rejimi ləğv edərdi”.
Qeyd edək ki, Ermənistan prezidentindən sonra artıq kilsə rəhbərliyi də baş nazir Paşinyanın istefasını tələb edib. Erməni apostol kilsəsinin dəftərxana rəhbəri, baş yepiskop Arşak Xaçatryan “168.am”a verdiyi açıqlamada deyib ki, Ermənistanda mövcud olan fəlakətli vəziyyətə görə əsas məsuliyyət xalqın etimadını istismar edən və müttəfiq dövlətlərlə münasibətləri korlayan baş nazirin şəxsində Ermənistanın siyasi hakimiyyətinin üzərinə düşür.
Qaşqay ZİYƏDDİNOĞLU