Paşinyanın ətrafında halqa daralır

Bakı:

15 °C

67 %

12 m/s

Əlaqə

AZ RU EN

Ana səhifə / Dünya / Paşinyanın ətrafında halqa daralır

Paşinyanın ətrafında halqa daralır

04.12.2020 [08:57]

Ermənistanda müxalifət genişmiqyaslı aksiyalara start verib
Məğlub Ermənistanda hakimiyyətsizlik və xoas vəziyyəti özünün növbəti mərhələsinə qədəm qoyub. Belə ki, müxalifətin tələbləri qarşısında mövcud hökumətin “Ermənistan Respublikasında hərbi vəziyyət elan edilməsi haqqında” qərarında dəyişikliklər etməsi kütləvi etiraz aksiyalarına qoyulan məhdudiyyəti aradan qaldırdığı üçün əhali küçələrə axışıb. Kütləvi etiraz aksiyaları təkcə Yerevanda deyil, digər şəhərlərdə də, hətta baş nazir Nikol Paşinyanın vətəni İcevanda da baş tutub və etirazçılar İcevan-Yerevan yolunu bağlayıblar.
Ermənistan mediasının yazdığına görə, kütləvi aksiyalara qoyulan qadağanın aradan qaldırılmasını fürsət bilən hökumətin əleyhdarları da artıq Paşinyanı devirmək üçün gələcək planlarını elan ediblər. “Aysor.am” yazır ki, dekabrın 2-də N.Paşinyanın istefası tələbi ilə keçirilən “Ləyaqət yürüşü” zamanı müxalifət ölkədə vətəndaş itaətsizliyi aksiyalarının genişləndirilməsinin vacibliyini bəyan edib. Bu məqsədlə dekabrın 3-dən etibarən Yerevanın müxtəlif küçələrində itaətsizlik aksiyalarına start verilib. Bu barədə məlumat verən “Daşnaksutyun” partiyasının nümayəndəsi Qor Sarkisyanın sözlərinə görə, küçələri bağlamaqla N.Paşinyana Ermənistanda ona yer olmadığını göstərmək lazımdır.
“News.am” yazır ki, sözgedən partiyanın digər nümayəndəsi Artsvik Minasyan jurnalistlərə açıqlamasında deyib ki, hədəfləri normal fəaliyyət göstərəcək keçid hökuməti qurmaqdır: “Təəssüf ki, hakimiyyət bunu anlamır, əksinə cəmiyyətdə parçalanmaya səbəb olur. N.Paşinyan özünün provokasiyaları ilə ölkəni müharibəyə cəlb etdi, bu gün özünü müdafiə üçün absurd açıqlamalar verir. Paşinyan vəzifəsini davam etdirmək üçün mümkün olan bütün məhdudiyyətləri saxlamağa hazırdır. Bizim əsas vəzifəmiz bu satqını vəzifədən kənarlaşdırmaq olmalıdır”.
Onun sözlərinə görə, xalq ardıcıl şəkildə müqavimət göstərsə, Paşinyan rejimi getməyə məcbur olacaq: “Xalq tələb edərsə, o zaman bu satqın hakimiyyətdən konstitusiya yolu ilə uzaqlaşdırılacaq və qanunla müəyyən edilmiş qaydada cinayət məsuliyyətinə cəlb olunacaq. Bundan sonra layiqli bir hökumət qura biləcəyik”. A.Minasyan növbəti mitinqdə 17 partiyanın yeni hökumətin qurulması ilə bağlı planlarının, hətta baş nazir postuna namizədin adının açıqlanacağı barədə də məlumat verib.
Digər müxalifət partiyasının nümayəndəsi isə növbəti mitinqə qədər gözləmədən Paşinyanın yerinə namizədin adını açıqlayıb. Belə ki, “Vətən” partiyasının idarə heyətinin üzvü Robert Harutyunyan Rusiyanın “RBK” telekanlına verdiyi açıqlamada deyib ki, baş nazir postuna müxalifətin yeganə namizədi keçmiş baş nazir və müdafiə naziri Vazgen Manukyan olacaq. Qeyd edək ki, müxalifətin keçid hökumətinə vahid namizədi V.Manukyan hələ 27 oktyabrda hökuməti istefaya və hakimiyyəti orduya təhvil verməyə çağırmışdı.
Onu da bildirək ki, Paşinyanın istefasını təkcə siyasi qüvvələr deyil, ictimaiyyətin nümayəndələri də tələb edirlər. Belə ki, mədəniyyət və elm xadimləri ölkədə normal hakimiyyətin mövcud olmadığını elan ediblər. “Tert.am” yazır ki, mədəniyyət xadimi Tiqran Yekekyan keçirdiyi mətbuat konfransında deyib ki, bu gün ölkədə bütün sahələrdə qeyri-müəyyənlik və mütləq bir siyasi böhran var. Onun sözlərinə görə, müharibədə məğlub olanlar, adətən, dərhal istefaya gedir: “Paşinyan - siyasi meyitdir və mütləq istefa verməlidir”.
Beləliklə, Paşinyanın istefa verməsində israrlı olan müxalifət Ermənistanın gələcəyinin onunla bağlı olmadığını iddia edir. “Joxovurd” qəzetinin yazdığına görə, Paşinyanın istefasına nail olmaq üçün müxalifət yaxın gələcəkdə taktikanı dəyişəcək. Qəzet öz mənbələrinə istinadən yazır ki, Yerevanda mitinqlərdən əlavə, xüsusi görüşlər keçirmək, mediada aktiv olmaq və kiçik qruplar halında yolları bağlamaq barədə qərara gəliblər.
Buna baxmayaraq, müşahidəçilərin fikrincə, öz hakimiyyətini ölkədə hərbi vəziyyət rejiminin saxlanması ilə qorumağa çalışan N.Paşinyan bundan sonra da güc strukturlarının köməyi ilə Ermənistanda etiraz aksiyalarının qarşısını almağa cəhd edəcək. Kütləvi aksiyalara polisin müdaxiləsinin müşayiət olunması isə onsuz da hakimiyyət böhranı baş verən işğalçı ölkədə ciddi qarşıdurmaların da gözlənildiyindən xəbər verir.
Qaşqay ZİYƏDDİNOĞLU

Paylaş:

Baxılıb: 740 dəfə