Məğlub Ermənistan xaos meydanına çevrilib

Bakı:

4 °C

65 %

7 m/s

Əlaqə

AZ RU EN

Ana səhifə / Dünya / Məğlub Ermənistan xaos meydanına çevrilib

Məğlub Ermənistan xaos meydanına çevrilib

05.12.2020 [00:26]

Məlum olduğu kimi, Azərbaycanın qarşısında ağır məğlubiyyətə düçar olduqdan sonra Ermənistanda hakimiyyətə qarşı kütləvi narazılıq şiddətlənib. Artıq 25 gündür paytaxt Yerevan başda olmaqla bütün ölkəni etiraz aksiyaları bürüyüb. 17 müxalifət partiyasının birgə təşkil etdiyi mitinqlərlə yanaşı, vətəndaş itaətsizliyi aksiyaları da genişlənir.

Ermənistan mətbuatının yazdığına görə, müxalifət hansı yolla olursa-olsun, mövcud hökumətin istefasına nail olacağını bəyan edib. Artıq müxalifət partiyaları baş nazir postuna vahid namizədi də müəyyən ediblər. Belə ki, “newsarmenia.am”ın məlumatına görə, müxalifətin vahid namizədi keçmiş baş nazir və müdafiə naziri Vazgen Manukyan olacaq.

Qeyd edək ki, baş nazir postuna vahid namizədlə bağlı artıq fikir ayrılıqları da ortaya çıxıb. “Aysor.am” yazır ki, bu barədə partiyanın sədri Edmond Marukyanla “Daşnaksutyun” təmsilçisi İşxan Saqatelyanın görüşündən sonra “Maariflənən Ermənistan” fraksiyasının üzvü Gevork Qorqisyan bildirib. Onun sözlərinə görə, N.Paşinyanın istefa verməsi məsələsində 16 partiya ilə mövqeləri üst-üstə düşür, amma “Maariflənən Ermənistan” partiyasının baş nazir postuna namizədi Edmon Marukyandır: “Baş nazir vəzifəsi boş qalsa, fraksiya partiya sədri E.Marukyanın namizədliyini irəli sürəcək”.

Yeri gəlmişkən, Paşinyanın istefası tələbi ilə vətəndaş itaətsizliyi aksiyaları da davam edir. Paşinyanın istefasını tələb edənlər Yerevanın mərkəzindəki Sayat-Nova və Maştos prospektlərini bağlayıblar.

“Aysor.am”ın yaydığı məlumata görə, etiraz aksiyaları zamanı 43 nəfər saxlanılıb. Sayt yazır ki, aksiya keçirilən yerdə çox sayda təcili yardım maşınının olması diqqəti cəlb edib. Bu səbəbdən yolun açılmasını tələb edən təcili yardım maşınlarının sürücüləri ilə etirazçılar arasında mübahisə baş verib. Bundan sonra sosial şəbəkələrdə çox sayda polis əməkdaşının təcili yardım maşınlarında mitinq yerlərinə aparıldığı barədə məlumatlar ortaya çıxıb. Hətta “Çiçəklənən Ermənistan” partiyasından olan deputat Naira Zöhrabyan hakimiyyətin acınacaqlı vəziyyətdə olduğunu qeyd edərək hökumətdən polislərin təcili yardım maşını ilə nəql olunmasına rəsmi şəkildə izah tələb edib.

Hökumətin hazırkı vəziyyətinə toxunan “Hraparak” qəzeti yazır ki, Paşinyanın komandasındakı böhran getdikcə dərinləşir. Qəzetin yazdığına görə, “Mənim addımım” qruplaşması ziddiyyətli düşərgələrə bölünüb: “Hamını yalnız bir sual narahat edir: ölkənin və onların aqibəti necə olacaq? Paşinyanı açıq şəkildə və arxada qeyd-şərtsiz dəstəkləyən qrup fraksiya daxilində “intihar dəstəsi” adlandırılır. Paşinyanı məlum sənədi imzaladığına görə tənqid edən deputatlara isə “xainlər” deyilir. Çoxları ən kiçik fürsətdə fraksiya sıralarını tərk etməyə hazırdır”.

Beləliklə, Ermənistanda mövcud olan anarxiya və xaos vəziyyəti mövcud hökumət, o cümlədən baş nazir N.Paşinyanın gələcəyi üçün yaxşı heç nə vəd etmir. Hakimiyyətin etiraz aksiyalarının qarşısını almaq üçün əl atdığı vasitələr də işğalçı ölkədə durumun ağır və qeyri-müəyyən olduğunu göstərir.

Qaşqay ZİYƏDDİNOĞLU

Paylaş:

Baxılıb: 704 dəfə