Ermənistanda qarşıdurma pik həddinə çatıb

Bakı:

24 °C

88 %

2 m/s

Əlaqə

AZ RU EN

Ana səhifə / Dünya / Ermənistanda qarşıdurma pik həddinə çatıb

Ermənistanda qarşıdurma pik həddinə çatıb

24.02.2021 [09:06]

Müxalifət partiyalarının birləşdiyi “Vətənin xilası naminə hərəkat”ın 20 fevralda keçirilən sonuncu ümumrespublika mitinqindən sonra Ermənistanda vəziyyət daha da gərginləşib. Yerli mətbuatın yazdığına görə, müxalifətin ötən şənbə elan etdiyi vətəndaş itaətsizliyi aksiyaları iki gündür Yerevanın müxtəlif yerlərində davam edir. Fevralın 23-də səhər hökumət binasının üçüncü korpusunda toplaşan etirazçılar baş nazir Nikol Paşinyanın binaya daxil olmasının qarşısını almağa çalışıblar. Əraziyə çox sayda polis qüvvələri cəlb edən hakimiyyət aksiya iştirakçılarına qarşı güc tətbiq edib və həbslər həyata keçirib.
Digər tərəfdən, Paşinyan hüquq-mühafizə orqanlarına müxalifətçilərin həbsini davam etdirməyi tapşırıb. Belə ki, 20 fevral mitinqindən əvvəl saxlanılanlardan bəziləri azad edilsələr də, müxalifət nümayəndələrinin bir çoxu məhkəmə tərəfindən həbs olunublar. Onu da xatırladaq ki, “News.am”ın hüquq müdafiəçisi Ruben Melikyana istinadən yaydığı məlumata görə, sonuncu yürüş zamanı polis xüsusi istintaq xidmətinin binasına yumurta atan yeniyetməni də həbs edib.
Medianın yaydığı digər xəbərə görə, artıq “Vətənin xilası naminə hərəkat”ın baş nazir postuna vahid namizədi Vazgen Manukyanın həbsinə də hazırlıq gedir. Baş prokurorluğun mətbuat xidmətindən “Novosti-Armenia” agentliyinə verilən məlumata görə, Ermənistan baş prokurorluğu V.Manukyanın sonuncu mitinqdə hakimiyyəti ələ keçirməklə bağlı açıqlaması ilə əlaqədar Ermənistan CM-nin 301-ci maddəsi (konstitusiya quruluşunun zorla dəyişdirilməsinə çağırışlar) əsasında cinayət işi açıb. Belə ki, 20 fevraldakı mitinq zamanı Manukyan mövcud hakimiyyətdən xilas üçün A və B planlarını təklif edib: “B planına görə, qiyamla ildırım sürəti ilə hakimiyyəti ələ keçirməyə hazır olmalısınız”.
Xatırladaq ki, V.Manukyanın açıqlaması təkcə ona qarşı cinayət işinin açılması ilə yekunlaşmayıb. Bununla bağlı hakim komandadan kəskin reaksiya gəlib. Belə ki, parlamentin müdafiə və təhlükəsizlik daimi komissiyasının sədri, “Mənim addımım” blokunun deputatı Andranik Koçaryan “Azadlıq” radiosunun erməni xidmətinə verdiyi müsahibədə bildirib ki, müxalifətçilər hökumət binalarını ələ keçirməyə cəhd edərlərsə, bu zaman dövlət atəş açmaq hüququnu özündə saxlayır: “Qoy onlar bu binaların dövlətin himayəsində olduğunu düşünsünlər. V.Manukyan başqalarını ölümə göndərməməlidir”.
“Panorama.am” isə yazır ki, ötən həftə “Çiçəklənən Ermənistan” fraksiyasını tərk edən müstəqil deputat Gevork Petrosyan da deputat A.Koçaryanın açıqlamasına münasibət bildirib: “Bunu parlamentin daimi komissiyasının sədri söyləyir. O, xalqımızı qorumaq əvəzinə, onu təhdid edir. Əgər məsələləri atəş yolu ilə həll etmək mümkün idisə, niyə 2018-ci ildə ictimai radionun binasını işğal etdiyiniz zaman sizə atəş açmadılar?”
G.Petrosyanın sözlərinə görə, parlamentin binasını mühasirəyə almaq lazımdır: “Parlamentin binasını mühasirəyə almaq, daha sonra “Mənim addımım” blokundan olan deputatları ora gətirmək lazımdır ki, indiki baş nazir N.Paşinyana etimadsızlıq göstərsinlər”.
Onu da qeyd edək ki, hakimiyyətin əhaliyə atəş açmaq barədə hədəsinin səbəbkarı olan V.Manukyan isə hakimiyyətin buna cəsarət etməyəcəyini düşünür: “Paşinyan hakimiyyəti əldə saxlamaq üçün bu addımı atmağı düşünə bilər. Ancaq buna cəsarət edə bilməz və etməyəcək”.
Mitinqdə işlətdiyi ifadələrə görə haqqında cinayət işinin başlanmasına münasibət bildirən Manukyan hakimiyyətin belə bir addım atmasının gözlənilən olduğunu qeyd edib.
Beləliklə, məğlub Ermənistanda siyasi böhran yenidən pik həddinə çatıb. Müşahidəçilərin fikrincə, istefa tələbi ilə fasiləsiz vətəndaş itaətsizliyi aksiyalarına başlayan müxalifətə qarşı hakimiyyətin repressiyaları və hədələri vəziyyətin daha gərginləşməsinə gətirib çıxaracaq.
Qaşqay ZİYƏDDİNOĞLU

Paylaş:

Baxılıb: 954 dəfə