Ermənistanda daxili siyasi vəziyyət gərgin olaraq qalır

Bakı:

25 °C

62 %

2 m/s

Əlaqə

AZ RU EN

Ana səhifə / Dünya / Ermənistanda daxili siyasi vəziyyət gərgin olaraq qalır

Ermənistanda daxili siyasi vəziyyət gərgin olaraq qalır

18.03.2021 [08:59]

Məlum olduğu kimi, məğlub Ermənistanda daxili siyasi vəziyyət gərgin olaraq qalır. Belə ki, ölkə prezidentinin bütün siyasi qüvvələrə təklif etdiyi birgə görüş baş tutmayıb, onun baş nazir və bəzi partiya rəhbərləri ilə ikitərəfli danışıqlarından hələlik ciddi nəticə əldə edilməyib. Müxalifətin birləşdiyi “Vətənin xilası naminə hərəkat” isə Paşinyanın istefası tələbindən geri çəkilmir.
Ermənistan mediası yazır ki, müxalifət təklif olunan bütün görüşlərdən imtina edir. “News.am”ın yazdığına görə, hərəkatın koordinatoru İşxan Saqatelyan isə deyib ki, prezidentin təklif etdiyi birgə görüş baş nazir vəzifəsini tutan şəxsin mövqeyinə görə alınmayıb: “Biz respublika prezidentinin təklif etdiyi formatda, amma gündəmin tərəfimizdən müəyyən edilməsi şərti ilə görüşün tərəfdarı olduq. Digər formatlardakı görüşləri mənasız hesab edirik. Bununla bağlı mövqeyimizdə dəyişiklik yoxdur”.
Paşinyan istefa verdiyi halda, seçkilərə getməyə hazır olması barədə “Çiçəklənən Ermənistan”ın lideri Qagik Çarukyanın fikirlərinə münasibət bildirən İ.Saqatelyan deyib ki, hərəkatda təmsil olunan partiyaların “şər hökuməti”ni devirmək üçün yanaşmaları fərqli ola bilər, amma Paşinyanın vəzifədən getməsinin vacibliyi barədə fikir birliyi var.
Qeyd edək ki, müxalifət növbədənkənar seçkiləri vacib hesab etsə də, Paşinyan hakimiyyəti dövründə seçki keçirilməsini məqbul saymır. Bu arada, növbədənkənar seçkilər keçirilməsi yenidən hakimiyyətin və bəzi siyasi partiyaların gündəmindədir. “Past” qəzeti yazır ki, bu günlərdə bəzi ekspertlər və siyasi dairələr daxili siyasi böhranı aradan qaldırmaq üçün növbədənkənar seçkilərin keçirilməsinin vacibliyindən danışırlar. Qəzetin yazdığına görə, hakimiyyət bu məsələ ilə bağlı öz komandasında ciddi addımlar atır: “Son günlərdə Paşinyan və lideri olduğu “Vətəndaş müqaviləsi” partiyasının bir neçə tanınmış nümayəndəsi Yerevanın inzibati ərazi orqanlarının rəhbərləri ilə, habelə qubernatorlarla görüşlər keçirir. Bu görüşlərdə onlara hakimiyyətin, konkret olaraq Paşinyanın reytinqini müəyyənləşdirmək tapşırılır. Yeri gəlmişkən, hakim komandada növbədənkənar seçkilərə qarşı çıxanlar da çoxdur”.
Nəşr öz mənbələrinə istinadən yazır ki, hakimiyyət may ayında seçkilər keçirmək niyyətindədir və baş nazir artıq 23 mart tarixinə qədər istefa vermək qərarına gəlib. “Hraparak” qəzeti isə baş nazirin Qagik Çarukyanı seçkilərin oktyabrda keçirilməsi üçün razı salmağa çalışdığı barədə məlumat yayıb.
Onu da qeyd edək ki, müxalifətin paytaxtdakı aksiyaları da müxtəlif formalarda davam edir. “Panorama.am” xəbər verir ki, müxalifət martın 17-də Təhsil, elm, mədəniyyət və idman nazirliyinin qarşısında aksiya keçirib. “Nikolsuz Ermənistan!” şüarları səsləndirən aksiya iştirakçılarının məqsədi baş nazir Paşinyanın nazirliyə gəlməsinin qarşısını almaq olsa da, binanın ətrafına əvvəlcədən çox sayda polis əməkdaşının cəlb edilməsi onların niyyətini puça çıxarıb.
Beləliklə, məğlub Ermənistanda siyasi böhran davam edir. Göründüyü kimi, Paşinyan yenidən seçki məsələsini ortaya atıb, müxalifət isə hökumətin istefası tələbindən geri çəkilmir. Ekspertlərin fikrincə, hakimiyyətin yenidən növbədənkənar seçkilər keçirilməsi məsələsini gündəmə gətirməsi sadəcə vaxt qazanmaq cəhdidir.
Qaşqay ZİYƏDDİNOĞLU

Paylaş:

Baxılıb: 912 dəfə