Məğlub Ermənistanda siyasi təlatümlər davam edir

Bakı:

16 °C

67 %

11 m/s

Əlaqə

AZ RU EN

Ana səhifə / Dünya / Məğlub Ermənistanda siyasi təlatümlər davam edir

Məğlub Ermənistanda siyasi təlatümlər davam edir

16.04.2021 [08:55]

Siyasi böhran dövrü yaşayan Ermənistanda siyasi təlatümlər davam edir. Yerli medianın yazdığına görə, növbədənkənar parlament seçkiləri keçiriləcəyinin elan olunması siyasi böhranı daha da dərinləşdirib. Müxalifətin birləşdiyi “Vətənin xilası naminə hərəkat”ın daxilində də narazılıqların yaranması vəziyyəti bir qədər də gərginləşdirib.
Yeri gəlmişkən, “Aysor.am” yazır ki, “Çiçəklənən Ermənistan” fraksiyasının deputatı Mikael Melkumyan Ermənistanda 30 ildir seçkilər zamanı seçki qutusuna atılan bülletenlər vasitəsilə siyasi hakimiyyətin dəyişmədiyini deyib.
Qeyd edək ki, “Üçüncü güc” vətəndaş təşəbbüsünün təmsilçisi, “Tovmasyan” fondunun rəhbəri Artak Tovmasyan da seçkilərdə iştirak edəcəkləri barədə açıqlama verib. “News.am”ın yazdığına görə, A.Tovmasyan gələcəkdə “Üçüncü qüvvə”nin hər hansı bir siyasi qüvvə ilə ittifaq quracağını istisna etməyib.
Xatırladaq ki, 18 martda baş nazir N.Paşinyan 20 iyun tarixində növbədənkənar parlament seçkilərinin keçiriləcəyini elan edib. Daha sonra, aprelin 1-də Ermənistan parlamenti ikinci və son oxunuşda parlament seçkilərinin yalnız proporsional seçki sistemi ilə keçiriləcəyi barədə seçki məcəlləsinə dəyişiklik edilməsini təsdiq edib. Yeri gəlmişkən, seçki məcəlləsinə edilən digər dəyişikliklərə görə, seçkidən sonrakı koalisiyaların qurulmasında iştirak edən partiyaların sayına qoyulan məhdudiyyət aradan qaldırılıb, partiya və partiya birlikləri üçün yeni keçid həddi müəyyən edilib: partiyalar üçün - 4 faiz, iki partiyanın blokları üçün - 8 faiz, üç partiyanın blokları üçün - 9 faiz, dörd və ya daha çox partiyanın blokları üçün isə - 10 faiz.
Nəhayət, əldə edilən razılaşmaya əsasən, Ermənistan baş naziri Paşinyan aprelin son ongünlüyündə istefa edəcəyini açıqlayıb. “Panorama.am” yazır ki, baş nazir ölkədə keçiriləcək parlament seçkilərinə görə proseduru sadalayarkən, parlamentdəki siyasi qüvvələri əldə edilən razılaşmanın pozulmasına qarşı xəbərdar edib. Onun sözlərinə görə, siyasi qüvvələr razılaşmalardan kənara çıxmağa çalışsalar, bu, onlar üçün “siyasi intihar”a bərabər olacaq.
Göründüyü kimi, ciddi siyasi böhranın hökm sürdüyü məğlub Ermənistanda seçkiqabağı vəziyyət gərgin olaraq qalır. Belə ki, hətta Paşinyan parlamentdəki qüvvələrdən də ehtiyat edir. Hakimiyyətə can atan qüvvələrin sayının çoxluğu, həmçinin müxalifətdəki parçalanma vəziyyəti daha da mürəkkəbləşdirir.
Qaşqay ZİYƏDDİNOĞLU

Paylaş:

Baxılıb: 774 dəfə