Yeravanda polis qüvvələri ilə etirazçılar arasında toqquşmalar baş verib

Bakı:

23 °C

83 %

2 m/s

Əlaqə

AZ RU EN

Ana səhifə / Dünya / Yeravanda polis qüvvələri ilə etirazçılar arasında toqquşmalar baş verib

Yeravanda polis qüvvələri ilə etirazçılar arasında toqquşmalar baş verib

23.04.2021 [08:14]

Növbədənkənar seçkiyə hazırlaşan məğlub ölkədə müxalifət itaətsizlik aksiyalarına, hakimiyyət isə kütləvi həbslərə başlayıb
Məğlub Ermənistanda 5 aydan çoxdur davam edən siyasi xaos yeni mərhələyə qədəm qoyub. Belə ki, növbədənkənar parlament seçkilərinin tarixi elan olunduqdan sonra, ölkədə siyasi qarşıdurma bir qədər səngisə də, son günlər yenidən kütləvi vətəndaş itaətsizliyi aksiyaları müşahidə edilib. Vəziyyətin birdən-birə gərginləşməsinə səbəb baş nazir Nikol Paşinyanın regionlara səfərə çıxması olub.
Ermənistan mediasının yazdığına görə, Qafan, Qacaran, Mehri və digər şəhərlərdə baş nazir yerli sakinlərin etiraz aksiyaları ilə qarşılaşıb. Regionların əhalisinin baş nazirin səfərinə qarşı çıxması Paşinyan tərəfindən qəzəblə qarşılanıb və artıq kütləvi itaətsizlik aksiyalarının əsas təşkilatçılarının cəzalandırılmasına başlanılıb. “Aysor.am”ın yaydığı məlumata görə, Paşinyan təhlükəsizlik xidmətinin direktoru Armen Abazyandan və polis xidmətinin rəisi Vahe Kazaryandan regionlarda keçirilən etiraz aksiyalarının bütün fəallarının və təşkilatçılarının həbs olunmasını tələb edib.
Bu arada hakimiyyət elan edib ki, etiraz aksiyalarını təşkil edən Sünik vilayətinin keçmiş qubernatoru, “Zəngəzur” mis-molibden kombinatının baş direktorunun müavini, “Yüksələn Ermənistan” partiyasının lideri Vahe Hakobyan olub. Məlumatda bildirilir ki, aksiya iştirakçılarının əksəriyyəti V.Hakopyanın partiyasının üzvləridir. “Panorama.am”ın yazdığına görə, aksiyaların digər bölgələrə də keçməsinin qarşısını almaq üçün kütləvi həbslər aparılıb. Eyni zamanda, Mehri şəhərinin meri Mxitar Zakaryan həbs edilərək Yerevana gətirilib. Yeri gəlmişkən, qeyd edək ki, vəziyyətin bu dərəcədə gərginləşməsi paytaxt Yerevanda müxalifəti hərəkətə keçirib. Belə ki, “Vətənin xilası naminə hərəkat”ın rəhbərlərinin təşəbbüsü ilə aprelin 22-nə keçən gecə Yerevanda sadə vətəndaşlar baş nazirin iqamətgahını mühasirəyə alıblar. Gecə boyunca polis qüvvələri ilə etirazçılar arasında toqquşmalar baş verib, bir çox iştirakçı həbs olunub. “News.am” yazır ki, aprelin 22-də səhər isə “Azadlıq” təşəbbüs qrupunun üzvləri olan və “Nikol xaindir!” şüarını səsləndirən gənclər özlərini Ermənistan hökumətinin binasının girişindəki darvazaya zəncirləyiblər. Qeyd edək ki, aksiyaçılar arasında özünü qapıya zəncirləyən bir qadın da olub.
Yerli media yazır ki, regionlardakı etirazlardan və paytaxtdakı qarşıdurmadan sonra artıq siyasi dairələrdə ölkədə yaranmış vəziyyətə görə Paşinyanın seçkilərdən imtina edəcəyi barədə söz-söhbətlər gəzir. “Panorama.am”ın yazdığına görə, “Vətənin xilası naminə hərəkat”ın koordinatoru İşxan Saqatelyan deyib ki, müxalifət Paşinyanın yaxın günlərdə seçki keçirməkdən imtinasını istisna etmir. Paşinyanın etiraz aksiyalarının təşkilatçılarını cəzalandırmağın zəruriliyinə dair açıqlamalarına gəlincə, müxalifətçi qeyd edib ki, regionlarda kütləvi həbslər davam edərsə, müxalifət kütləvi aksiyalarla sərt cavab vermək niyyətindədir.
Qaşqay ZİYƏDDİNOĞLU

Paylaş:

Baxılıb: 955 dəfə