Ermənistanda hökm sürən siyasi böhran parlament daxilində də davam etməkdədir

Bakı:

21 °C

94 %

0 m/s

Əlaqə

AZ RU EN

Ana səhifə / Dünya / Ermənistanda hökm sürən siyasi böhran parlament daxilində də davam etməkdədir

Ermənistanda hökm sürən siyasi böhran parlament daxilində də davam etməkdədir

04.08.2021 [08:28]

Xəbər verildiyi kimi, Ermənistan parlamentinin avqustun 2-də keçirilən ilk iclasında müxalifət qanunverici orqanın işini pozmağa, ilk gündən böhran yaratmağa cəhd göstərib. Erməni mediasının yazdığına görə, bütün cəhdlərə baxmayaraq, həmin gün Paşinyan hakimiyyətinin namizədi Alen Simonyan Ermənistan parlamentinin spikeri seçilib. Lakin məğlub ölkədə parlament böhranı davam etməkdədir.
Belə ki, avqustun 3-də parlamentin sədr müavinlərinin seçkisi də insidentsiz ötüşməyib. “News.am” yazır ki, hakim “Vətəndaş müqaviləsi” fraksiyasından parlamentin xarici əlaqələr daimi komissiyasının sabiq sədri Ruben Rubinyan və keçmiş yüksək texnologiyalar və sənaye naziri Hakop Arşakyan, “Ermənistan” və “Şərəfim var” bloklarından “Daşnaksutyun”un üzvü İşxan Saqatelyan vitse-spiker vəzifələrinə namizəd kimi irəli sürülüblər. Müzakirələr zamanı “Şərəfim var” müxalifət fraksiyasının deputatı Anna Mkrtçyan vitse-spiker vəzifəsinə namizəd R.Rubinyanı casusluqda günahlandırıb. Buna baxmayaraq, R.Rubinyan parlamentin sədr müavini seçilib.
Bu arada, “Hraparak” qəzetinin yazdığına görə, “Ermənistan” və “Şərəfim var” blokları parlamentdəki vəzifələrin bölgüsü üzrə razılığa gəliblər: “Müxalifət üç daimi parlament komissiyasının sədri postunu götürə bilsə, onlardan biri Artur Vanetsyanın fraksiyasına veriləcək. Komissiyalardan birinin rəhbəri böyük ehtimalla “Ermənistan” blokunun nümayəndəsi, “Yüksələn Ermənistan” partiyasının rəhbəri Vahe Akopyan, digərininki isə “Daşnaksutyun”un nümayəndəsi olacaq”.
Yeri gəlmişkən, bəlli olub ki, “Ermənistan” və “Şərəfim var” parlament fraksiyaları spiker seçkilərinin nəticələrinin etibarsız sayılması tələbi ilə konstitusiya məhkəməsinə müraciət edəcəklər. “Aysor.am” yazır ki, “Ermənistan” fraksiyasının üzvü Artsvik Minasyan parlamentin ilk iclasında A.Simonyanın spiker seçilməsinin qanunsuz olduğunu bəyan edib: “Çünki spiker vəzifəsinə namizədliyi irəli sürülən həbs olunmuş deputatlar Mxitar Zakaryan və Artur Sarkisyanın iclasda iştirakları təmin edilməyib”. A.Minasyan, eyni zamanda, deputat toxunulmazlığının mövcudluğunu nəzərə alaraq həbslərin qanunsuz olduğunu qeyd edib.
Buna baxmayaraq, prezident tərəfindən baş nazir təyin edilən Nikol Paşinyan artıq hökumətin formalaşdırılması prosesinə start verib. Əvvəlcə baş nazir müavinləri və müdafiə naziri postuna namizədlərini müəyyənləşdirən Paşinyan həm komanda daxilində, həm də cəmiyyətdə ciddi etirazlara baxmayaraq, bəzi şəxslərin yüksək vəzifəyə təyinatını ölkə prezidentinə təsdiq etdirməyə nail olub. Belə ki, Ermənistan prezidenti Armen Sarkisyan hökumətdə təyinatlarla bağlı bir sıra fərmanlar imzalayıb. “Newsarmenia.am” yazır ki, həmin sənədlərə görə, ərazi idarəetmə və infrastruktur naziri postunu tutan Suren Papikyanın baş nazirin müavini, Arşak Karapetyanın müdafiə naziri, Romanos Petrosyanın ekologiya naziri, Narek Mkrtçyanın əmək və sosial işlər naziri vəzifələrinə təyinatı təsdiq olunub.
Beləliklə, uzun çəkişmədən sonra Ermənistan parlamenti yeni tərkibdə fəaliyyətə başlasa da, ölkədə mövcud olan siyasi böhran qanunverici orqanda da özünü qabarıq şəkildə göstərir. Bir sözlə, Paşinyan yeni hökumətin formalaşmasına çalışsa da, parlamentdəki qarşıdurma şəraitində hakimiyyətin normal fəaliyyət göstərəcəyi sual altındadır.
Qaşqay ZİYƏDDİNOĞLU

Paylaş:

Baxılıb: 953 dəfə