Azərbaycanın inkişaf perspektivləri prizmasından “İslam Həmrəyliyi İli”

Bakı:

25 °C

83 %

4 m/s

Əlaqə

AZ RU EN

Ana səhifə / Elm / Azərbaycanın inkişaf perspektivləri prizmasından “İslam Həmrəyliyi İli”

Azərbaycanın inkişaf perspektivləri prizmasından “İslam Həmrəyliyi İli”

01.02.2017 [10:20]

Yola saldığımız 2016-cı il müasir Azərbaycanın tarixində mahiyyət etibarilə bir-birini tamamlayan iki əlamətdar hadisə ilə yaddaşlara həkk olundu. Bunlardan birincisi, dövlət müstəqilliyinin bərpasının 25-ci ildönümünün qeyd edilməsi idi. İkincisi isə ölkəmizdə milli, mədəni və dini fərqliliyin qəbul edilməsi və toxunulmazlığı, o cümlədən mədəni müxtəlifliyin qorunub saxlanılması ilə səciyyələnən “Mültikulturalizm İli”nin elan edilməsi oldu. Bununla əlaqədar keçirilən çoxsaylı tədbirlər, beynəlxalq aləmə verilən mesajlar ölkəmiz üçün müstəqilliyin və demokratik inkişaf yolunun bir-birindən ayrılmaz məfhumlar olduğunu bir daha sübuta yetirdi. Məhz həmin tədbirlər vasitəsilə dünyəvi, demokratik inkişaf yolu seçmiş Azərbaycan müasir dünyamız üçün həyati əhəmiyyət daşıyan sülh və dözümlülük kimi ümumbəşəri dəyərləri əyani şəkildə təsdiq etməyə nail oldu. Xüsusilə 2010-cu ildə Avropa ölkələrində multikulturalizm siyasətinin iflasa uğraması fonunda Azərbaycanın multikultural məkan kimi önə çıxması son dərəcə böyük əhəmiyyət daşıyırdı.
Bu sözləri AZƏRTAC-a müsahibəsində Azərbaycan Milli Elmlər Akademiyası akademik Z.Bünyadov adına Şərqşünaslıq İnstitutunun şərq-qərb şöbəsinin müdiri, ilahiyyat üzrə fəlsəfə doktoru Məmmədəli Babaşlı deyib.
Şöbə müdiri qeyd edib ki, bu əlamətdar hadisələrin ardınca və malik olduğumuz tarixi miras baxımından Prezident İlham Əliyev tərəfindən Azərbaycanda 2017-ci ilin “İslam Həmrəyliyi İli” elan olunması bir çox baxımdan məntiqi və qanunauyğun bir addımdır. Belə ki, ümumislam mədəniyyətinin təşəkkülündə və inkişafında müstəsna rol oynamış Azərbaycan tarixən İslam dünyasının əsas mədəni mərkəzlərindən biri olub. İslam mədəniyyətinə və elminə böyük töhfələr verməklə yanaşı, ölkəmiz müasir dövrün çağırışları baxımından alternativi olmayan dünyəviliyə, mədəniyyətlərarası dialoqa, müasirliyə münasibətdə sözün həqiqi mənasında örnək olub. Azərbaycanın İslam aləmində qazandığı nüfuz 2009-cu ildə Bakı və 2018-ci ildə Naxçıvan şəhərlərinin İslam mədəniyyətinin paytaxtı elan olunmasında öz ifadəsini tapıb. Tarixən Azərbaycanda dini, məzhəb zəminində münaqişələrin yaşanmaması bunun əyani sübutudur. Müstəqillik illərində Ümummilli lider Heydər Əliyevin əsasını qoyduğu və bu gün Prezident İlham Əliyevin uğurla davam etdirdiyi bu siyasətin nəticəsidir ki, Azərbaycan Qərbə münasibətdə İslam dünyası üçün, Şərqə münasibətdə isə Qərb üçün nümunədir. Müstəqilliyinin bərpa edilməsindən günümüzə qədər keçən müddət ərzində Azərbaycanda müxtəlif dinlərə məxsus dini abidələrin təmir edilməsi, yeni məbədlərin inşası, dövlət tərəfindən dini icmalara maliyyə yardımının göstərilməsi bunun parlaq təzahürüdür. İslam dünyasında ilk dəfə olaraq Heydər məscidində vəhdət namazlarının qılınması milli-mənəvi birlik və qardaşlıq nümunəsi kimi müstəsna əhəmiyyət kəsb edir.
“İnanırıq ki, dövlətimizin başçısının elan etdiyi “İslam Həmrəyliyi İli” çərçivəsində həyata keçiriləcək sosial-mədəni və elmi tədbirlər, ilk növbədə, ölkə vətəndaşları, xüsusilə gənclər arasında maarifləndirmə yolu ilə radikal meyillərin qarşısının alınmasında mühüm rol oynayacaq. Ən başlıcası isə mayın 12-dən 22-dək ölkəmizdə keçiriləcək IV İslam Həmrəyliyi Oyunlarına digər islam ölkələri ilə sadəcə idman əlaqələrinin inkişafı baxımından yanaşmamalıyıq. Əsrlərlə qazanılmış mənəvi dəyərlərimizi qorumaq şərti ilə iştirakçı ölkələrlə siyasi, iqtisadi, elmi-mədəni əlaqələrin inkişafını fürsətə çevirməliyik. Təbii ki, ümummilli məsələmiz olan Qarabağ problemi ilə bağlı Azərbaycanın haqlı mövqeyinin iştirakçı ölkələrin nümayəndələrinə çatdırılması istiqamətində bütün imkanları dəyərləndirməyi bacarmalıyıq”, - deyə M.Babaşlı bildirib.

Paylaş:

Baxılıb: 1626 dəfə