Gəncəlilər əlavə və dəyişikliklərə "hə" deyəcək

Bakı:

26 °C

44 %

6 m/s

Əlaqə

AZ RU EN

Ana səhifə / Gündəm / Gəncəlilər əlavə və dəyişikliklərə "hə" deyəcək

Gəncəlilər əlavə və dəyişikliklərə "hə" deyəcək

11.03.2009 [15:56]

Martın 10-da “Yeni Azərbaycan” və “Şəhər” təşviqat qruplarının Azərbaycan Texnologiya Universitetində və Nizami adına kitabxanada Gəncə şəhər sakinləri ilə görüşü keçirilib. Görüşü “Yeni Azərbaycan” təşviqat qrupunun Gəncə şəhər şöbəsinin sədri İsrafil İsmayılov açaraq bildirib ki, martın 18-də keçiriləcək referendum xalqın arzu və istəyinin nəticəsidir: “Azərbaycan Respublikası hazırda öz inkişafının elə bir mərhələsinə çatıb ki, onun iqtisadi potensialı və dövlətin siyasi iradəsi indiyə qədər ölkə Konstitusiyasında təsbit olunmuş insan hüquq və azadlıqları ilə yanaşı, hər bir vətəndaşa layiqli həyat səviyyəsini təmin etmək vəzifəsini də irəli sürməyə imkan verir”.
“Yeni Azərbaycan” təşviqat qrupunun səlahiyyətli nümayəndəsi, millət vəkili, Azərbaycan Tibb Universitetinin rektoru, akademik Əhliman Əmiraslanov qeyd edib ki, ölkə Konstitusiyasına təklif olunan əlavə və dəyişikliklər insan hüquqlarının qorunub saxlanmasına, dövlətin konstitusion əsaslarının daha da möhkəmləndirilməsinə xidmət edir. Əsas Qanunumuza təklif edilmiş əlavələr haqqında danışan səlahiyyətli nümayəndə bildirib ki, bütün dəyişikliklərdə əsas məqsəd xalq üçün daha xoş güzəran yaratmaq, idarəçilik sistemində mükəmməl prinsiplərə üstünlük verməkdən ibarətdir. O, qeyd edib ki, Konstitusiyanın 12-ci maddəsinə təklif edilən əlavə ilə dövlətin əsas məqsədi kimi ölkə vətəndaşlarının layiqli və firavan həyat səviyyəsinin təmin olunması göstərilir: “Ona görə də, hesab edirəm ki, gəncəlilər ümumxalq səsverməsində fəal iştirak edərək əlavə və dəyişikliklərə “hə” deyəcəklər”.
“Yeni Azərbaycan” təşviqat qrupunun səlahiyyətli nümayəndəsi, millət vəkili Asəf Hacıyev deyib ki, Azərbaycan Respublikası Konstitusiyasına təklif edilən dəyişikliklərin hər biri dövlətimizin istər siyasi, istərsə də iqtisadi inkişafı üçün xüsusilə vacibdir. Səlahiyyətli nümayəndə Ali Qanunun əhəmiyyəti barədə açıqlama verərək bildirib ki, Konstitusiyaya təklif olunan əlavə və dəyişikliklərin əsasında dövlətin qüdrətlənməsi, ölkə vətəndaşlarının hüquq və azadlıqlarının mükəmməl qorunması, dövlət rəmzlərinə hörmət və ehtiramla yanaşılması kimi ali məqsədlər dayanır: “Əminəm ki, Gəncə vətəndaşları həmrəylik və birliklərini ümumxalq səsverməsində də göstərəcəklər”.
Sonra çıxış edən “Yeni Azərbaycan” təşviqat qrupunun üzvü, Gəncə Dövlət Universitetinin rektoru, professor Elman Məmmədov, referendumun keçirilməsini qanunauyğun bir proses kimi dəyərləndirib: “12-ci maddədə qeyd olunduğu kimi dövlət-vətəndaşlarına layiqli həyat səviyyəsinin təmin edilməsi kimi vacib məsələni özünün ali məqsədi hesab edir. Mən inanıram ki, Gəncə şəhər əhalisi də martın 18-də Əsas Qanunumuza edilən əlavə və dəyişikliklərin lehinə səs verəcəklər”.
çıxış edən “Şəhər” təşviqat qrupunun səlahiyyətli nümayəndəsi, Azərbaycan Kənd Təsərrüfatı Akademiyasının rektoru, professor Mirdamət Sadıqov martın 18-də keçiriləcək ümumxalq səsverməsi ilə bağlı ölkəmizdə həyata keçirilən bütün tədbirlərin istiqamətinin cəmiyyətin maarifləndirilməsinə yönəldiyini vurğulayıb. O, Azərbaycan Respublikası Konstitusiyasının 15-ci maddəsinə təklif olunmuş əlavə və dəyişikliklə əlaqədar olaraq bildirib ki, Azərbaycan dövləti sosialyönümlü iqtisadiyyatın inkişafına şərait yaradır, ölkəmizdə azad sahibkarlığın inkişafı istiqamətində kompleks tədbirlər həyata keçirilir: “Dövlətimizin sahibkarlara yaratdığı münbit şərait, Azərbaycan Respublikası iqtisadiyyatının bazar münasibətləri əsasında sürətli inkişafı deməkdir. Bu baxımdan martın 18-də keçiriləcək ümumxalq səsverməsi ölkə ictimaiyyəti tərəfindən yüksək dəyərləndirilir”.
Azərbaycan Texnologiya Universitetinin rektoru, professor Telman Məlikov qeyd edib ki, müasir dövrdə hər bir dövlətin demokratik və hüquqi cəmiyyət quruculuğu onun insan hüquq və azadlıqlarına münasibəti əsasında müəyyən olunur: “Konstitusiyaya təklif olunan əlavə və dəyişikliklər insan hüquqlarının qorunub saxlanmasına, dövlətin konstitusion əsaslarının daha da möhkəmlənməsinə xidmət edir. Mən sizin hamınızı referendumda fəal iştirak etməyə dəvət edirəm”.
Sonda görüşdə çıxış edən seçicilər Referendum Aktını dəstəklədiklərini bildiriblər.
Fazil İSMAYILOV,
“Yeni Azərbaycan” qəzetinin bölgə müxbiri

Paylaş:

Baxılıb: 1799 dəfə