Vaşinqtondan Bakıya...

Bakı:

20 °C

60 %

4 m/s

Əlaqə

AZ RU EN

Ana səhifə / Gündəm / Vaşinqtondan Bakıya...

Vaşinqtondan Bakıya...

22.03.2022 [15:14]

Regional və beynəlxalq təhlükəsizlik məsələsində inam - etimad mesajları, tərəfdaşlığı gücləndirmək çağırışı

Beynəlxalq münasibətlər sistemində mühüm dəyişikliklər baş verir - Avrasiyada yeni geosiyasi proseslər cərəyan edir. Yeni dünya düzəninin yarandığı hazırkı şəraitdə regional güc mərkəzləri strateji fəaliyyətləri ilə önə çıxır, təhlükəsizlik və əməkdaşlığın təmin olunmasında müstəsna rol oynayırlar. Cənubi Qafqazın lider dövləti olan Azərbaycan bu mənada xüsusilə fərqlənir. 44 günlük müharibədə qələbə qazanaraq 100 illik regional geosiyasi arxitekturanı dəyişən ölkəmiz bölgədə yeni nizam yaradır. Ona görə də Bakı ilə strateji təmasların gücləndirilməsi – çoxşaxəli əməkdaşlığın dərinləşdirilməsi güc mərkəzləri üçün müstəsna əhəmiyyətə malikdir.

ABŞ Prezidenti Cozef Baydenin Novruz bayramı münasibətilə Prezident İlham Əliyevə göndərdiyi təbrik məktubunda əksini tapan məsələlər də bu reallığı təsdiqləyir. Əminliklə və qətiyyətlə ifadə olunur ki, Vaşinqton Bakı ilə əməkdaşlığa böyük önəm verir, tərəfdaşlığı yüksək qiymətləndirir. Azərbaycan Prezidentinin Baydenə məktubunda da ikitərəfli müstəvidə olduğu kimi, çoxtərəfli əsasda vacib məsələlərin həlli istiqamətində birgə fəaliyyətintəqdirəlayiq olması vurğulanıb. Xüsusilə də, enerji təhlükəsizliyi, beynəlxalq təhlükəsizlik, terrorizmə qarşı mübarizənin tərəfdaşlığımızı səciyyələndirən aparıcı sahələr sırasında olması diqqətə çatdırılıb. “Qlobal enerji təhlükəsizliyinin təmin edilməsi üçün böyük əhəmiyyət kəsb edən Xəzər dənizinin Azərbaycan sektorunda zəngin enerji ehtiyatlarının işlənməsi və dünya bazarlarına nəqli, irimiqyaslı transmilli enerji layihələrinin reallaşması sahəsində ABŞ-ın göstərdiyi ardıcıl dəstəyi yüksək qiymətləndiririk” ,- deyə məktubda qeyd edilib.

Xarici mediada yer alan təhlil xarakterli məqalələrdə - analitiklərin şərhlərində iki məqama xüsusi diqqət yetirilir: birincisi, Cozef Baydenin Azərbaycan ilə 30 illik diplomatik münasibətlərin qeyd olunmasını xüsusi diqqətə çatdırması, ikincisi isə, tərəflər arasında əməkdaşlığın təhlükəsizlik, o cümlədən enerji təhlükəsizliyi sahəsində genişləndirilməsinin diqqət mərkəzində olması.

Regional və beynəlxalq miqyasda enerji təhlükəsizliyi sahəsində Azərbaycanın etibarlı tərəfdaş kimi tanınması və qəbul edilməsi təsadüfi xarakter daşımır, bir sıra amillərlə şərtlənir. Əsas amillərdən biri ölkəmizin müsbət təcrübəsi – mütərəqqi nümunəsidir. Dünyanın siyasi tarixinə nəzər saldıqda bəzi xalqlar və dövlətlərin tarixi təcrübəsi - nümunəsi fonunda yeraltı sərvətlərin, xüsusilə də enerji resurslarının bədbəxtlik gətirən bəxşiş - “Troya atı” kimi çıxış etdiyini görürük. Bu, daha çox neft ehtiyatlarından milli məqsədlərə - strateji maraqlara uyğun istifadə edilə bilinməməsi ilə əlaqədardır. Tərəqqiyə xidmət edə biləcək potensialın tənəzzül mənbəyinə çevrilməsinin nümunələrini cahanın üç qitəsini - Asiya, Afrika və Avropa coğrafiyasını əhatə edən ölkələrin timsalında görmüşük, iqtisadi böhran, siyasi xaos, çevriliş, inqilab və digər çoxsaylı neqativ hallara şahidlik etmişik. Azərbaycan təcrübəsi isə fərqlidir. Yeni neft-qaz strategiyasında enerji nəqli marşrutlarının şaxələndirilməsini əsas prioritetlərdən biri kimi müəyyənləşdirən Azərbaycan regional və qlobal enerji təhlükəsizliyinə mühüm töhfələr verir. Ölkəmizin təşəbbüsü və liderliyi ilə strateji əhəmiyyətli layihələrin reallaşdırılması, yeni tərəfdaşlıq platformalarının yaradılması regionda təhlükəsizliyin möhkəmləndirilməsinə, əməkdaşlığın dərinləşməsinə mühüm töhfədir. Digər tərəfdən, geostrateji əhəmiyyətli birgə tərəfdaşlıq çərçivəsində qarşılıqlı investisiya qoyuluşunun artması, yeni əməkdaşlıq platformalarının yaradılması, enerji resurslarının, karbohidrogen ehtiyatlarının əlverişli və təhlükəsiz marşrutlarla daşınması gələcəkdə səmərəli və çoxşaxəli işbirliyinin uğurla davam etdirilməsinə etibarlı zəmin formalaşdırıb. Bununla yanaşı, regionda mühüm kommunikasiya-logistika mərkəzinə çevrilən Azərbaycan Avrasiyanın enerji və nəqliyyat xəritəsini yenidən dizayn etməkdədir. Hazırda Azərbaycan Şərq-Qərb, Şimal-Cənub nəqliyyat dəhlizlərinin yaradılmasında iştirak edən və fəal investisiya yatıran yeganə ölkədir. Nəhayət, Azərbaycanın təşəbbüsləri və liderliyi ilə enerji layihələrinin reallaşdırılması Xəzər hövzəsi regionunun geosiyasi statusunun yüksəlməsinitəmin edib.

Beləliklə, Azərbaycan ilə tərəfdaşlığın genişləndirilməsi güc mərkəzləri, eləcə də regionda vacib – həyati maraqları olan ABŞ üçün gələcək strateji prioritetlərdən biridir.Vaşinqtondan Bakıya regional və beynəlxalq təhlükəsizlik məsələsində inam - etimad mesajları, tərəfdaşlığı gücləndirmək çağırışı da bu səpkidə xüsusi əhəmiyyət daşıyır.

Nurlan QƏLƏNDƏRLİ

Paylaş:

Baxılıb: 827 dəfə