“Marca”: Futbolun yeni panoraması Azərbaycana doğru açılır

Bakı:

28 °C

49 %

12 m/s

Əlaqə

AZ RU EN

Ana səhifə / İdman / “Marca”: Futbolun yeni panoraması Azərbaycana doğru açılır

“Marca”: Futbolun yeni panoraması Azərbaycana doğru açılır

28.05.2019 [09:38]

İspaniyada çıxan “Marca” gündəlik idman qəzetinin elektron versiyasında (Marca.com) Bakının mayın 29-da Avropa Liqasının finalında “Arsenal”la “Çelsi” klublarının oyununa ev sahibliyi edəcəyi barədə məqalə dərc olunub.
AZƏRTAC xəbər verir ki, məqalədə final oyununun keçiriləcəyi Azərbaycanın bu günlərdə özünü tamamilə futbola həsr etdiyi diqqətə çatdırılır.
Məqalədə deyilir: Təyyarə Bakıda yerə endikdən sonra qonaqlar əvvəlcə “Baku Final 2019” adlı internet şəbəkəsi ilə tanış olur, həmçinin onları hər yerdə final oyununa dair, həmçinin Obameyanq və Hazard kimi futbolçuların təsvir olunduğu nəhəng loqolar qarşılayır.
“Futbol ölkəmizin idmanında ən önəmli yerə malikdir. İnsanlar onu xüsusi entuziazmla yaşayırlar” - bu fikri oxu.az saytının baş redaktoru Elçin Şirinov qəzetin əməkdaşına müsahibəsində bildirib. Azərbaycanın “Qarabağ” və “Qəbələ” komandalarının Çempionlar Liqası və Avropa Liqasının qrup mərhələsində mübarizəsi xatırlanaraq qeyd olunur ki, Avrasiya ölkəsinin bu klubları da paytaxtdan 4000 kilometr aralıda (İraqın paytaxtı Bağdad və Madrid arasındakı məsafə qədər) yerləşən, Avropa Liqasının finalında qələbə uğrunda yarışacaq iki komandanın vətəninə - Londona gələrək mübarizə aparıblar.
“Qərbi Avropa ilə aramızdakı uzaq məsafəyə baxmayaraq, bu oyuna olan maraq dairəsi Rusiyaya qədər yox, bütün Avropa İttifaqına qədər uzanır. Bizim üçün bu oyun ölkəmizi xaricə nümayiş etdirməyin ən gözəl yollarından biridir”, - deyə azərbaycanlı müxbir Səbuhi vurğulayıb.
Bakı Olimpiya Stadionunda keçiriləcək final oyununun təşkilat rəhbəri Cavid Məmmədli “Marca”ya müsahibəsində hamını əmin edib ki, paytaxt qonaqları qarşılamağa tam hazırdır: “Son illərdə biz Avroviziya, İlk Avropa Oyunları, Formula 1 Qran-Pri, 17 yaşlı qadınlar arasında mundiala ev sahibliyi etmişik və gələn il “Avro 2020”-nin 4 oyunu ölkəmizdə keçiriləcək”.
Bu futbol bayramı siyasətdən də yan keçmədi: başlanğıcda hər komanda üçün az sayda - 6000 biletin ayrılması və Mxitaryanın Azərbaycan və Ermənistan arasındakı konflikti bəhanə edərək Bakıya gəlmək istəməməsi final oyununa kölgə salıb və insanlarda şübhə doğurub. Bu barədə danışan Azərbaycan Futbol Federasiyaları Assosiasiyasının baş katibi Elxan Məmmədov deyib: “Biletlərlə bağlı bütün məsələlər UEFA-nın öhdəliyindədir, Miki məsələsinə gəldikdə isə bizim qədər UEFA da onun təhlükəsizliyinin təmin olunacağına zəmanət verib. Mən öz adıma onun gəlməsini istərdim, lakin yenə də bu, onun şəxsi qərarıdır”.
Beləliklə, futbolun yeni panoraması Azərbaycana doğru açılır. Bakı öz qucağını açaraq, futbolun Odlar yurduna gəlişini səbirsizliklə gözləyir.

Paylaş:

Baxılıb: 1008 dəfə