Piylənməyə qarşı dərmanlarla bağlı XƏBƏRDARLIQ

Bakı:

28 °C

54 %

1 m/s

Əlaqə

AZ RU EN

Ana səhifə / Maraqlı / Piylənməyə qarşı dərmanlarla bağlı XƏBƏRDARLIQ

Piylənməyə qarşı dərmanlarla bağlı XƏBƏRDARLIQ

18.07.2026 [17:53]

Piylənməyə qarşı istifadə olunan məşhur arıqlama dərmanları artıq çəkini əhəmiyyətli dərəcədə azaltsa da, insanların həyat keyfiyyətini və xoşbəxtlik hissini gözlənilən səviyyədə artırmır.

Lent.az xarici mediaya istinadən xəbərinə görə, araşdırma aparan alimlər bildirirlər ki, artıq çəkinin sürətlə azalmasının insanı avtomatik olaraq daha xoşbəxt edəcəyi barədə geniş yayılmış fikir öz təsdiqini tapmayıb. Araşdırma göstərib ki, insanlar xeyli çəki itirsələr də, psixoloji vəziyyətləri, gündəlik həyatlarından məmnunluqları və fiziki rifah hissləri əvvəlki ilə müqayisədə nəzərəçarpacaq dərəcədə dəyişməyib.

Tədqiqat Çinin Siçuan Universitetinin Qərbi Çin Xəstəxanasının professoru Şeyyu Linin rəhbərlik etdiyi beynəlxalq alimlər qrupu tərəfindən aparılıb. Mütəxəssislər 262 klinik araşdırmanın nəticələrini təhlil edərək təxminən 100 min yetkin pasiyentin iştirak etdiyi 19 müxtəlif arıqlama preparatını qiymətləndiriblər.

Araşdırmaya əsasən, ən yüksək nəticəni tirzepatid və hələ sınaq mərhələsində olan CagriSema preparatı göstərib. Bu dərmanlardan istifadə edənlər bir il ərzində bədən çəkilərinin təxminən 15 faizini itiriblər. Məşhur Ozempic və Wegovy preparatlarının əsas təsiredici maddəsi olan semaqlutid isə orta hesabla 10 faiz, onun tablet forması isə 11 faiz çəki azalmasına kömək edib.

Alimlər müəyyən ediblər ki, tirzepatid və CagriSema qəbul edən pasiyentlərin təxminən yarısı ilkin çəkilərinin 20 faizini itirməyə nail olub. Müqayisə üçün qeyd edilir ki, yalnız idman və kalorinin azaldılması hesabına arıqlayanlarda bu nəticəyə cəmi iki faiz iştirakçı çata bilib.

Bununla belə, iştirakçıların əhvalı, enerjisi və gündəlik aktivliyini qiymətləndirən psixoloji testlər ciddi dəyişiklik qeydə almayıb. Alimlər hesab edirlər ki, sürətli arıqlamaya baxmayaraq, orqanizmin yeni vəziyyətə uyğunlaşması vaxt tələb edir və müşahidə müddəti bu təsiri qiymətləndirmək üçün kifayət etməyə bilər.

Araşdırma dərmanların əlavə təsirlərini də üzə çıxarıb. Mütəxəssislərin sözlərinə görə, ən güclü arıqlama preparatları ürəkbulanma, qusma və ishal kimi problemlərə adi pəhrizlə müqayisədə üç-dörd dəfə daha çox səbəb olur. Bir çox pasiyent güclü halsızlıqdan şikayət edib və onların əhəmiyyətli hissəsi ilk il ərzində müalicəni yarımçıq dayandırıb.

Alimlər daha bir mühüm riskə də diqqət çəkiblər. Xüsusilə tirzepatid qəbul edən insanlarda yağla yanaşı əzələ kütləsinin də sürətlə azalması müşahidə olunub. Araşdırmaya görə, bəzi hallarda quru əzələ kütləsinin səkkiz faizdən çoxu itirilib ki, bu da xüsusilə yaşlı insanlar üçün ciddi təhlükə hesab olunur.

Tədqiqatın ən müsbət nəticəsi isə semaqlutidlə bağlı olub. Məlum olub ki, bu preparat xroniki ürək-damar xəstəlikləri olan insanlarda infarkt və insult riskini təxminən 20 faiz azalda bilir.

Araşdırmanın müəllifləri sonda belə nəticəyə gəliblər ki, piylənməyə qarşı ideal dərman hələ mövcud deyil. Bəzi preparatlar çəkinin azalmasında daha effektiv olsa da, digərləri ürək-damar sağlamlığının qorunmasında daha faydalıdır. Buna görə də müalicə üsulu seçilərkən yalnız arıqlama deyil, həm də pasiyentin ümumi sağlamlıq vəziyyəti nəzərə alınmalıdır.

Paylaş:

Baxılıb: 341 dəfə