Ceyhun Bayramov: Azərbaycanla Ermənistan arasında sülh de-fakto mövcuddur

Bakı:

23 °C

88 %

7 m/s

Əlaqə

AZ RU EN

Ana səhifə / Siyasət / Ceyhun Bayramov: Azərbaycanla Ermənistan arasında sülh de-fakto mövcuddur

Ceyhun Bayramov: Azərbaycanla Ermənistan arasında sülh de-fakto mövcuddur

17.07.2026 [17:54]

Azərbaycan xarici işlər naziri Ceyhun Bayramov bildirib ki, Azərbaycanla Ermənistan arasında sülh de-fakto artıq mövcuddur və sülh prosesinin qalan mərhələlərinin başa çatdırılması Cənubi Qafqazda uzunmüddətli sabitliyi və rifahı təmin edəcək.

AZƏRTAC xəbər verir ki, Azərbaycan xarici işlər naziri bu açıqlamanı Moskvada aparılan danışıqlardan sonra Rusiya xarici işlər naziri Sergey Lavrovla birgə mətbuat konfransında verib.

C. Bayramovun sözlərinə görə, 44 günlük Vətən müharibəsi Cənubi Qafqazda beynəlxalq hüquq, ərazi bütövlüyü və tarixi ədalət prinsiplərinə əsaslanan yeni təhlükəsizlik arxitekturası yaradıb.

Nazir qeyd edib ki, Azərbaycanla Ermənistan arasında normallaşma prosesində əldə edilən son nailiyyətlər, o cümlədən sülh sazişi layihəsinin razılaşdırılması regionda möhkəm sülhün, təhlükəsizliyin və davamlı inkişafın bərqərar olması üçün unikal fürsət yaradır.

O vurğulayıb: “Əminliklə demək olar ki, bu gün Ermənistanla Azərbaycan arasında sülh de-fakto mövcuddur”.

Nazir bildirib ki, danışıqlar zamanı azad edilmiş ərazilərdə genişmiqyaslı bərpa işləri, keçmiş məcburi köçkünlərin geri qayıtması və Bakı ilə İrəvan arasında normallaşma prosesinin hazırkı vəziyyəti barədə Rusiya tərəfini məlumatlandırıb.

Azərbaycan xarici işlər naziri qeyd edib ki, etimad quruculuğu tədbirləri də daxil olmaqla, Bakının ardıcıl sülh təşəbbüsləri sülh prosesinin irəliləməsinə əhəmiyyətli töhfə verib. O bildirib ki, qalan məsələlərin yerinə yetirilməsi regionda uzunmüddətli sülhün, sabitliyin və etimad atmosferinin formalaşması üçün zəruri şərait yaradacaq.

Beynəlxalq gündəliyə toxunan Ceyhun Bayramov bildirib ki, tərəflər Yaxın Şərqdəki vəziyyəti də müzakirə ediblər. O, diplomatik dialoqun və beynəlxalq hüquqa ciddi riayət edilməsinin humanitar vəziyyətin daha da gərginləşməsinin və pisləşməsinin qarşısını almağın yeganə yolu olduğunu vurğulayıb.

Rusiya-Ukrayna münaqişəsinə gəldikdə, nazir qeyd edib ki, Azərbaycan insan tələfatına səbəb olan və regionun sabitliyinə mənfi təsir göstərən hərbi əməliyyatlardan dərin narahatlığını ifadə etməkdə davam edir. O, Azərbaycanın beynəlxalq hüquq prinsiplərinə dəyişməz sadiqliyini bir daha təsdiqləyib, gərginliyin azaldılmasına və sülh yolu ilə nizamlanmaya nail olmağa çağırıb.

Danışıqların yekunlarına dair fikirlərini ifadə edən Ceyhun Bayramov Moskvada aparılan müzakirələrin konstruktiv keçdiyinə, onların Azərbaycan-Rusiya münasibətlərində müsbət gündəliyin daha da inkişafına, həmçinin regional və beynəlxalq məsələlər üzrə qarşılıqlı fəaliyyətə töhfə verəcəyinə əminliyini bildirib.

Paylaş:

Baxılıb: 471 dəfə