Alparslan Bayraktar: Türkiyə Azərbaycandakı enerji layihələrində iştirak etməkdə maraqlıdır

Bakı:

28 °C

54 %

1 m/s

Əlaqə

AZ RU EN

Ana səhifə / İqtisadiyyat / Alparslan Bayraktar: Türkiyə Azərbaycandakı enerji layihələrində iştirak etməkdə maraqlıdır

Alparslan Bayraktar: Türkiyə Azərbaycandakı enerji layihələrində iştirak etməkdə maraqlıdır

05.08.2026 [12:10]

Türkiyə ölkə xaricində, o cümlədən Azərbaycan, Bolqarıstan, İraq, Liviya, Somali və Pakistanda enerji layihələrində iştirak etməkdə maraqlıdır.

AZƏRTAC xəbər verir ki, bu barədə Türkiyənin enerji və təbii sərvətlər naziri Alparslan Bayraktar “TRT Haber” telekanalının efirində bildirib.

O, müasir Türkiyənin enerji mərkəzinə çevrildiyini qeyd edib. “Ankara ilə əməkdaşlıq və ölkəmizin infrastrukturundan istifadə bütün tərəflər üçün real fayda gətirir. Suriyaya Azərbaycan qazının tədarükü bunun bariz nümunəsidir”, - deyə enerji naziri bildirib, O, yeni qaz müqavilələrinin imzalanacağını istisna etməyib.

Nazir qeyd edib ki, Türkiyə regiondakı böhranlardan sığortalanmasa da, ölkədə enerji çatışmazlığı yoxdur. O əlavə edib: “Ankaranın düşünülmüş siyasəti enerji təchizatı məsələsini həll etməyə imkan verib. Yalnız xarici amillərlə bağlı əlavə maliyyə yükü var”.

A. Bayraktar yerli neft və qaz yataqlarında fəal kəşfiyyat işlərinin və hasilatın artırılmasının vacibliyini də vurğulayıb. Nazir qeyd edib: “Qara dənizdə ölkənin ən böyük qaz yatağı olan “Sakarya”da hasilat həcminin bu ilin sonuna qədər gündə 20 milyon kubmetrə çatacağı və 8 milyon abonentin ehtiyacını ödəyəcəyi gözlənilir. 2028-ci ilə qədər 16-17 milyon abonenti yerli istehsal olan təbii qazla təmin etməyi planlaşdırırıq”.

Türkiyəli nazir, həmçinin ölkənin cənub-şərqində neft hasilatının artmasına diqqət çəkib. O bildirib: “Bölgədə terrorizm probleminin həlli üçün atılan vacib addımlar Anadoluda kəşfiyyat işlərinin intensivləşməsinə imkan verib. Şırnak vilayətinin Qabar dağı bölgəsində neft hasilatı rekord səviyyədə - gündəlik 83.200 barelə çatıb”.

A. Bayraktar nüvə enerjisinin inkişafının vacibliyini də vurğulayıb. Onun sözlərinə görə, hazırda tikilməkdə olan “Akkuyu” Atom Elektrik Stansiyasının ilk enerji blokunun bu ilin sonuna qədər istismara verilməsi planlaşdırılır. “Türkiyə və Rusiya tərəfləri Mersində qarşıya qoyulan məqsədlərə çatmaq üçün səy göstərir. Təhlükəsizlik amili bu baxımdan xüsusi əhəmiyyət kəsb edir”, - deyə o əlavə edib.

Nazir, həmçinin Sinop və Trakyada iki yeni atom elektrik stansiyasının tikintisi ilə bağlı fəal müzakirələrin aparıldığını bildirib. “Bir neçə ölkə, o cümlədən Kanada və Cənubi Koreya ilə danışıqlar aparırıq. Həmçinin atom elektrik stansiyası layihələrinə maliyyə dəstəyi məsələsini də nəzərdən keçiririk”, - deyə o bildirib.

Paylaş:

Baxılıb: 170 dəfə