Azərbaycan üçün beynəlxalq səviyyəli investisiya reytinqi

Bakı:

16°C

67%

8m/s

Əlaqə

AZ RU EN

Ana səhifə / İqtisadiyyat / Azərbaycan üçün beynəlxalq səviyyəli investisiya reytinqi

Azərbaycan üçün beynəlxalq səviyyəli investisiya reytinqi

26.05.2010 [10:47]

“Fitch Ratings” agentliyinin respublikamızın reytinqini yüksəldərək “BBB-” səviyyəsində müəyyən etməsi, Azərbaycanın beynəlxalq maliyyə bazarlarına çıxışının asanlaşdırılmasına münbit şərait yaradacaq
Dünyanın ən nüfuzlu reytinq agentliklərindən biri olan “Fitch Ratings” təşkilatı Azərbaycanın reytinqini yüksəldib. Agentlik respublikamızla bağlı təyin etdiyi uzunmüddətli “BB+” reytinqini yüksəldərək “BBB-” səviyyəsində müəyyən edib. “Fitch Ratings” agentliyi yeni reytinqin müəyyənləşməsində ölkəmizin iqtisadi, investisiya, maliyyə sabitliyinin dözümlü olmasını, iqtisadiyyatın inkişaf dinamikasının stabil artım templəri ilə davam etməsini başlıca elementlər kimi qəbul edib. Eyni zamanda, qurum yeni reytinq təyin olunarkən neft gəlirlərinin sürətlə artmasını və həmin vəsaitlərin güclü daxili və xarici netto-kreditor mövqeyinin formalaşması məqsədilə səmərəli idarə olunmasını əsas amillər kimi nəzərə alıb.
“Fitch Ratings”in iqtisadçılarının fikrincə, bir çox ölkələr dünyada baş verən böhran meyillərinin təsirinə məruz qalsa da, Azərbaycanda antiböhran siyasətinin çevik və effektli şəkildə həyata keçirilməsi iqtisadi seqmentlər üzrə fəallığın azalmasının qarşısını alıb. Azərbaycan hökumətinin böhrana qarşı mükəmməl iqtisadi konsepsiya hazırlayaraq həyata keçirməsi makroiqtisadi sabitliyin davamlı şəkildə qorunmasına və real sektorda iqtisadi dinamizmin artmasına imkan yaradıb. Eyni zamanda, respublikamızın maliyyə sektorunun həddindən artıq dözümlü olması, valyuta-bank sisteminin sağlamlığı, real sektorun bütün bölmələrində artım tempinin davam etməsi həyata keçirilən makroiqtisadi siyasətin səmərəliliyini yüksəldib və böhranın növbəti fazasının ölkəmizə mənfi təsirlərinin qarşısını almış olub. İqtisadiyyatın əsas bölmələrində, xüsusilə də, özəl sektorda dinamizm meyilləri güclənib. 2009-cu ildə Azərbaycanda ümumi daxili məhsulun artım tempi 6 faizdən artıq olub ki, bu da ümumilikdə Avropa iqtisadiyyatının inkişaf göstəricisindən 2-3 dəfə artıq deməkdir.
“Fitch Ratings” yeni reytinqi müəyyənləşdirərkən ölkəmizdəki investisiya mühitini də ciddi şəkildə təhlil edib. Respublikamızdakı şəffaf biznes mühitini və xarici sərmayədarların fəaliyyəti üçün təmin edilmiş cəlbedici sərmayə atmosferasını dəyərləndirən agentlik bu faktorun investisiya fəallığına əlverişli zəmin yaratdığını bildirir. Agentliyin analitiklərinin fikrincə, Azərbaycanın investisiya imkanları çox cəlbedicidir. Bu, xarici sərmayə qoyuluşlarının artım dinamikası üçün əlverişli imkanlar yaradır. Analitik qrupun şərhində qeyd olunur ki, investisiya sahəsində həyata keçirilən tədbirlər və bu bölmədə sərmayə cəlbediciliyinin yüksəldilməsi Azərbaycanın maliyyə sabitliyinin möhkəmlənməsinə təkan verib, xarici investorların ölkəyə marağının artmasına zəmin yaradıb. Agentlik bu qənaətdədir ki, respublikamızda biznesə olan marağın yüksəlməsi əlverişli investisiya mühitinin formalaşmasını daha da stimullaşdırır. Dünya maliyyə böhranı bir çox dövlətlərdə iri və orta şirkətlərlə yanaşı, kiçik müəssisələrin bağlanmasına səbəb olsa da, respublikamızda bu tendensiya müşahidə olunmayıb. Azərbaycanda ötən il iqtisadi fəallıq aşağı düşməyib, əksinə, daha da yüksəlib, buna görə də, yeni yaradılmış sahibkarlıq subyektlərinin fəaliyyətini dayandırması qeydə alınmayıb.
“BBB-” ölkəmiz üçün həddindən artıq mühüm əhəmiyyət daşıyan kredit reytinqi və ölkəmizin investisiya qabiliyyətinin yüksək göstəricisi kimi səciyyələndirilə bilər. Yeni reytinq Azərbaycan üçün beynəlxalq səviyyəli investisiya reytinqi sayıla bilər. Bu, respublikamızın beynəlxalq statusa malik potensial investor və dünyada sərmayəçi ölkə kimi imicinin möhkəmlənməsinə də dərin əsaslar yaratmış olur. “BBB-” kredit reytinqinin təyin edilməsi beynəlxalq maliyyə institutlarının və investorların respublikamıza etimadının daha da yüksəlməsinə, ölkəmizin borclanma qabiliyyətinin artırılmasına, iri şirkətlər tərəfindən borclanma məqsədilə qiymətli kağızların emissiyası üçün zəruri şəraitin yaradılmasına və Azərbaycanın dünyanın ən böyük kapital bazarlarına çıxışının asanlaşdırılmasına münbit şərait yaradacaq.
Onu da qeyd edək ki, respublikamız “Fitch Ratings” beynəlxalq reytinq agentliyi tərəfindən müəyyən olunmuş yeni reytinq dərəcəsindən səmərəli istifadə etmək niyyətindədir. Azərbaycan bu reytinq ilə beynəlxalq maliyyə bazarlarında aktiv iştirakçıya çevrilmək məqsədi güdür. İlk növbədə, dünyanın ən iri fond birjalarında qiymətli kağızların emissiyası və dövlət istiqrazlarının beynəlxalq bazarlarda yerləşdirilməsi nəzərdə tutulur. Hazırda respublikamız ABŞ-ın “Citibank” və Almaniyanın “Duetche Bank” maliyyə təşkilatları ilə birgə öz qiymətli kağızlarını beynəlxalq maliyyə bazarlarına yerləşdirmək məsələləri üzərində araşdırmalar aparır.
Elbrus CƏFƏRLİ

Paylaş:

Baxılıb: 1349 dəfə