Azərbaycanda İKT sektorunun gəlirləri 15 faiz artıb

Bakı:

3 °C

87 %

12 m/s

Əlaqə

AZ RU EN

Ana səhifə / İqtisadiyyat / Azərbaycanda İKT sektorunun gəlirləri 15 faiz artıb

Azərbaycanda İKT sektorunun gəlirləri 15 faiz artıb

16.07.2011 [14:55]

Prezident İlham Əliyev: Həm MDB, həm də dünya miqyasında götürsək, Azərbaycanda İKT-nin inkişafı ilə bağlı çox böyük addımlar atılmışdır
Müasir dövrdə informasiya-kommunikasiya texnologiyaları (İKT) cəmiyyətin inkişafına təsir göstərən əsas amillərdən birinə çevrilərək dövlət strukturlarını, sosial-iqtisadi sahələri, elm və təhsili, bir sözlə, bütövlükdə insanların həyatını əhatə edib. İnformasiya və kommunikasiya texnologiyalarının tətbiqinin səviyyəsi hər bir ölkənin intellektual və elmi potensialının, dövlət idarəçiliyində şəffaflığın, demokratiyanın inkişafının əsas göstəricilərindən birinə çevrilib. Həmçinin, bu gün dünya bazarında elektron ticarətin rolu da artmaqdadır.
Azərbaycan dövləti də gələcəkdə İKT sektorundan əldə olunacaq gəlirlərin ölkə iqtisadiyyatının inkişafına müsbət təsirini nəzərə alaraq sözügedən sahənin inkişaf etdirilməsinə xüsusi önəm verir. Son 15 ildə sözügedən sahənin inkişafı dövlət siyasətinin əsas prioritetlərindən birinə çevrilib və bu istiqamətdə mühüm addımlar atılıb. Əlbəttə ki, bu sahədə qanuni bazanın yaradılması və müvafiq sahənin inkişaf etdirilməsi istiqamətində ardıcıl dövlət proqramlarının həyata keçirilməsi nəticəsiz qalmayıb. Xüsusilə, İKT sektorunda cari ilin birinci yarısında əldə olunan gəlirlərin həcmi ötən ilin müvafiq dövrünə nisbətən 15 faiz artıb. Bu isə ümumdünya orta göstəricisindən təxminən 2 dəfə çoxdur.
Prezident İlham Əliyev Nazirlər Kabinetinin 2011-ci ilin birinci yarısının sosial-iqtisadi inkişafının yekunlarına həsr olunmuş iclasındakı çıxışında Azərbaycanda İKT sektorunun inkişafına da toxunub: “Bu sahəyə biz çox böyük diqqət göstəririk. Həm MDB, həm də dünya miqyasında götürsək, Azərbaycanda İKT-nin inkişafı ilə bağlı çox böyük addımlar atılmışdır. Burada deyilən rəqəmlər onu göstərir ki, biz dünya miqyasında da qabaqcıl ölkələr sırasındayıq”.
Qeyd etmək lazımdır ki, 2005-2008-ci illərdə respublikada rabitə və informasiya texnologiyalarının geniş tətbiqinə imkan yaradan, habelə bölgələrdə geniş yayılmasını təmin edən mükəmməl fəaliyyət konsepsiyası rolunu oynayan Dövlət Proqramı, eyni zamanda, informasiya təhlükəsizliyini təmin edib. Bununla yanaşı, ölkənin regionlarında rəqəmsal sistemin tətbiqi, internetin, müasir rabitə və kommunikasiya texnologiyalarının inkişafı olduqca vacibdir. Bu, təkcə sosial-iqtisadi deyil, həm də mədəni-intellektual inkişafa, insan kapitalının formalaşmasına xidmət edir.
Eyni zamanda, Azərbaycanda mobil rabitə və internet xidməti də inkişaf edir. Son altı ayda mobil telefon xidmətlərinin qiyməti 30 faiz, rouminq xidmətlərinin qiyməti isə istiqamətlər üzrə 20-50 faiz azaldılıb. İndi ölkəmizdə mobil telefon xidmətlərinin qiymətləri təxminən Şərqi Avropa ölkələri səviyyəsindədir.
ölkəmizdə internet istifadəçilərinin sayı da artıb. Hesabat dövründə təkcə genişzolaqlı sürətli internet istifadəçilərinin sayı təxminən 30 faizə yaxınlaşıb ki, bu da ümumdünya orta göstəricisindən təxminən 2,5 dəfə yüksəkdir.
Digər mühüm addım kimi Azərbaycanın yerətrafı orbitə peyk çıxarmaq təşəbbüsünü də qeyd etmək lazımdır. Bu peyk ölkəmizin qlobal informasiya cəmiyyətinə inteqrasiya olunmasında, Qərblə Şərq arasında informasiya fərqinin aradan qaldırılmasında və regionun aparıcı dövlətlərindən birinə çevrilməsində əhəmiyyətli rol oynayacaq. Dövlət başçısının da qeyd etdiyi kimi, bu, həm də ölkənin nüfuzu üçün çox vacib olan məsələdir: “Biz indi çalışırıq ki, birinci peykin buraxılması ilə məhdudlaşmayaq. İkinci peykin orbitə buraxılması layihəsi də işlənilir. Bütövlükdə bu sahədə indi bizdə təcrübə yaranır. Xarici mütəxəssisləri də cəlb etmişik. Aparıcı xarici şirkətlərlə işləyirik və Azərbaycanda güclü kosmik sənayenin yaranmasına nail olacağıq”.
SEVİNC

Paylaş:

Baxılıb: 1342 dəfə