“Qarabağı birlikdə quraq”

Bakı:

24 °C

56 %

4 m/s

Əlaqə

AZ RU EN

Ana səhifə / MEDİA / “Qarabağı birlikdə quraq”

“Qarabağı birlikdə quraq”

29.06.2024 [11:15]

Şuşada mühüm tədbir...

Sahibkarlar üçün imkanlar yaradılır

Yeganə BAYRAMOVA

Dünən Şuşada “Sahibkarlar üçün yeni imkanlar: Qarabağı birlikdə quraq” adlı tədbir keçirilib. İqtisadiyyat Nazirliyinin təşkilatçılığı ilə baş tutan tədbirin məqsədi sahibkarlıq subyektlərinə Qarabağ və Şərqi Zəngəzur iqtisadi rayonlarının investisiya imkanlarının və biznes perspektivlərinin təqdim edilməsi, dövlət-özəl əməkdaşlığı modeli üzrə müzakirələrin təşkilidir.

Tədbirdə işğaldan azad edilmiş ərazilərdə tətbiq olunan güzəşt və azadolmalar, digər dövlət dəstəyi tədbirləri, bu ərazilərin bərpa və iqtisadi reinteqrasiyasında sahibkarların rolu mövzularında panel müzakirələr təşkil olunub. Sahibkarlara bu ərazilərdə həyata keçirilməsi təklif edilən investisiya layihələri, məhsulların ixrac potensialı, logistika imkanları təqdim ediləcək, iştirakçıları maraqlandıran suallar cavablandırılıb. Həmçinin G2B (dövlət-biznes) formatında görüşlər keçirilib.

Sahibkarlar üçün yaxşı şərait yaradılır

Tədbirdə çıxış edən iqtisadiyyat naziri Mikayıl Cabbarov bildirib ki, nazirliyin tabeliyində olan strukturlar sahibkarların maliyyələşməyə çıxışını təmin edir. Nazirin sözlərin görə, hazırda Azərbaycanda sahibkarların bizneslə məşğul olmaları üçün çox yaxşı şərait yaradılır.

Nazirdən sahibkarlara çağırış...

Nazir qeyd edib ki, indiyədək özəl sahibkarlıq subyektləri tərəfindən işğaldan azad edilmiş ərazilərə 211 milyon manatdan artıq vəsait yatırılıb, 364 milyon manat vəsaitin isə yatırılması nəzərdə tutulur. Onun sözlərinə görə, özzəl təşəbbüsləri hərtərəfli təşviq etmək və dövlət-özəl tərəfdaşlığını inkişaf etdirməklə regiona investisiya qoyuluşunun artırılması hədəflənir.

M.Cabbarov həmçinin sahibkarları Qarabağ və Şərqi Zəngəzurda biznes imkanlarından səmərəli şəkildə yararlanmaqda və bölgənin iqtisadi reinteqrasiyasına töhfə verməkdə fəal olmağa dəvət edib.

Qeyd edək ki, tədbirin açılışı iyunun 27-də olub. İki gün davam edən tədbir çərçivəsində biznes nümayəndələri Ağdam Sənaye Parkında olublar.

25 sahibkarlıq subyektinə rezidentlik statusu verilib

Tədbirdə çıxış edən İqtisadi Zonaların İnkişafı Agentliyinin İdarə Heyətinin sədri Seymur Adıgözəlov qeyd edib ki, indiyədək Ağdam Sənaye Parkında ümumi investisiyalarının həcmi 216 milyon manatdan çox olan 25 sahibkarlıq subyektinə rezidentlik, 6 sahibkara isə qeyri-rezidentlik statusu verilib.

S.Adıgözəlovun sözlərinə görə, bu günədək rezidentlər tərəfindən Sənaye Parkına 35 milyon manatdan artıq investisiya yatırılıb, 300-dək daimi iş yeri yaradılıb: “Hazırkı layihələrlə Sənaye Parkında ümumilikdə 2000-dən çox iş yerinin yaradılması nəzərdə tutulur.

“Araz Vadisi İqtisadi Zonası” Sənaye Parkının isə hazırda 10 rezidenti və 2 qeyri-rezidenti var. İnvestorlar tərəfindən ümumi olaraq Parka 83,4 milyon manatdan artıq investisiyanın yatırılması, 700-dən çox iş yerinin yaradılması nəzərdə tutulur. Bugünədək Sənaye Parkına 14 milyon manatdan çox investisiya yatırılıb, 20-dən artıq iş yeri yaradılıb”.

“Hər iki sənaye parkı sahibkarların marağındadır”

S.Adıgözəlov qeyd edib ki, hər iki sənaye parkına sahibkarlar tərəfindən böyük maraq göstərilir: “2024-cü ilin birinci yarımilliyində Ağdam Sənaye Parkı üzrə ümumi investisiya dəyəri 68 milyon manat olan 9 layihənin, “Araz Vadisi İqtisadi Zonası” Sənaye Parkı üzrə ümumi investisiya dəyəri 42,7 milyon manat olan 6 layihənin rezidentliyi təsdiqlənib. Hazırda da Agentlik tərəfindən bir sıra investisiya layihələrinə baxılır”.

“Sahibkarları yararlanmağa dəvət edirik”

Azərbaycan Respublikası Prezidentinin xüsusi nümayəndəsi Aydın Kərimovun sözlərinə görə, indiyədək Şuşada 20-yə yaxın sahibkara şərait yaradılıb. O, bildirib ki, Şuşaya gələn turistlərin sayında artım müşahidə edilir: “Milli Qurtuluş Günü və Qurban bayramında Şuşaya 13 minə yaxın turist gəlib. Eyni zamanda, Daşaltı kəndi ərazisinə turizm infrastrukturunun qurulmasına başlanılıb. Sahibkarları Şuşada yaradılmış əlverişli investisiya mühitindən yararlanmağa dəvət edirik”.

Bundan başqa, tədbirin iştirakçıları Xankəndi şəhərinin iqtisadi imkanları ilə də tanış olublar. Xankəndi şəhərinin tarixi, burada görülən bərpa işləri və şəhərin sənaye mərkəzinə çevrilməsi istiqamətində aparılan işlər haqqında sahibkarlara və müvafiq dövlət qurumlarının nümayəndələrinə məlumat verilib. Bildirilib ki, işğal vaxtı separatçılar tərəfindən xarici görünüşü dəyişdirilmiş tikililərin əvvəlki siması qaytarılır, binalarda bərpa işləri aparılır, eləcə də biznes fəaliyyətinin genişləndirilməsi tədbirləri görülür.

Xankəndi şəhəri ilə tanışlıq çərçivəsində istehsal müəssisələrinə baş çəkən sahibkarlara şəhərin iqtisadi potensialı, yeni yaradılmış infrastruktur və həyata keçirilməsi təklif edilən investisiya layihələri barədə məlumat verilib.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azad sahibkarlığın və liberal iqtisadiyyatın təşviqi” istiqaməti üzrə hazırlanmışdır

Paylaş:

Baxılıb: 790 dəfə