Salyanda Əli bəy Hüseynzadənin 150 illik yubileyi ilə bağlı konfrans keçirilib

Bakı:

2 °C

93 %

9 m/s

Əlaqə

AZ RU EN

Ana səhifə / Mədəniyyət / Salyanda Əli bəy Hüseynzadənin 150 illik yubileyi ilə bağlı konfrans keçirilib

Salyanda Əli bəy Hüseynzadənin 150 illik yubileyi ilə bağlı konfrans keçirilib

26.02.2014 [09:20]

Fevralın 24-də Salyan rayonunda rayon İcra Hakimiyyətinin, Azərbaycanlıların və digər Türkdilli Xalqların Əməkdaşlıq Mərkəzinin birgə təşkilatçılığı ilə Əli bəy Hüseynzadənin 150 illik yubileyinə həsr olunmuş konfrans keçirilib. Kütləvi informasiya vasitələri rəhbərlərinin, ziyalıların, elm xadimlərinin qatıldıqları tədbirin iştirakçıları öncə Ümummilli lider Heydər Əliyevin Salyan rayonunun mərkəzində ucaldılmış abidəsini ziyarət ediblər. Daha sonra Əli bəy Hüseynzadənin abidəsi önünə tər çiçəklər düzən iştirakçılar yubilyarın ev muzeyində də olublar.
Yubiley konfransını giriş sözü ilə açan Azərbaycanlıların və digər Türkdilli Xalqların Əməkdaşlıq Mərkəzinin (ATXƏM) sədri İlham İsmayılov bildirib ki, bir sıra KİV nümayəndələrinin Salyan rayon İcra Hakimiyyətinin başçısı ilə görüşü zamanı Əli bəy Hüseynzadənin 150 illik yubileyi ilə bağlı təşəbbüs irəli sürüldü. Dövlət başçısı dahi mütəfəkkirin 150 illik yubileyinin keçirilməsinə dair Sərəncam imzalamaqla həmin təşəbbüsə dəstək verdi: “Həyatını, varlığını türk birliyinə sərf etmiş Əli bəyin Türk dünyasının konsolidasiyasına yönələn çağırışları yaşadığımız müasir dövrlə də səsləşir. Demək, Əli bəyin ideyaları aktuallığını qoruyub saxlayır”.
Bakı Dövlət Universitetinin Jurnalistika fakültəsinin dekanı Şamil Vəliyev Əli bəy Hüseynzadənin həyat və yaradıcılığından bəhs edib. Görkəmli publisistin təkcə Azərbaycan deyil, bütövlükdə Türk və İslam dünyası üçün parlaq sima olduğunu söyləyən Ş.Vəliyev onu islahatçı şəxsiyyət kimi səciyyələndirib.
“Şərq” qəzetinin baş redaktoru Akif Aşırlı çıxışında əsasən yubilyarın qəzetçilik fəaliyyətində özünü göstərən ideoloji motivlər üzərində dayanıb.
MŞ İdarə Heyətinin üzvü, Demokratik Jurnalistlər Liqasının sədri Yadigar Məmmədli isə bildirib ki, Əli bəy Hüseynzadə ilk növbədə milli kimlik məsələsini gündəmə gətirib.
Tədbirdə çıxış edənlərdən Salyan rayon Ziyalılar Birliyinin sədri Qulam Sadiq, Əli bəy Hüseynzadənin Salyanda ucaldılmış abidəsinin müəllifi, heykəltaraş Nəriman Qəhrəmanoğlu, şair Oqtay Rza və başqaları Əli bəy Hüseynzadənin 150 illik yubileyinin keçirilməsi ilə bağlı Prezident İlham Əliyevin imzaladığı Sərəncamı dahi mütəfəkkirin yaradıcılığına yüksək qiymət kimi dəyərləndiriblər. Böyük şəxsiyyətin həyat yoluna dair müxtəlif məqamlardan geniş söz açıblar.
Sonda çıxış edən Salyan rayon İcra Hakimiyyətinin başçısı Tahir Kərimov Əli bəy Hüseynzadə şəxsiyyətinin formalaşmasında doğma yurduna bağlılığın mühüm amil olduğunu vurğulayıb. “Bildiyiniz kimi, Əli bəy Hüseynzadənin həyat yolu heç də asan olmayıb, bir çox təzyiqlərə məruz qalıb. Ancaq bütün bunlara baxmayaraq, xalq yolunda çalışmaqdan yorulmayıb. Belə bir insanın məhz salyanlı olması salyanlıların fəxridir” - deyən T.Kərimov Əli bəy Hüseynzadənin 150 illik yubileyini ölkə miqyaslı hadisə kimi dəyərləndirib.

Paylaş:

Baxılıb: 1220 dəfə