Beynəlxalq Türk Mədəniyyəti və İrsi Fondunda Türk Dünyası Mühəndislər və Memarlar Birliyinin nümayəndələri ilə görüş olub

Bakı:

18 °C

94 %

1 m/s

AZ RU EN

Ana səhifə / Mədəniyyət / Beynəlxalq Türk Mədəniyyəti və İrsi Fondunda Türk Dünyası Mühəndislər və Memarlar Birliyinin nümayəndələri ilə görüş olub

Beynəlxalq Türk Mədəniyyəti və İrsi Fondunda Türk Dünyası Mühəndislər və Memarlar Birliyinin nümayəndələri ilə görüş olub

05.02.2021 [09:37]

Fevralın 4-də Beynəlxalq Türk Mədəniyyəti və İrsi Fondunun prezidenti Günay Əfəndiyeva Türk Dünyası Mühəndislər və Memarlar Birliyinin nümayəndə heyəti ilə görüşüb.
AZƏRTAC xəbər verir ki, fondun prezidenti Günay Əfəndiyeva qonaqları salamlayaraq 44 günlük Vətən müharibəsi dövründə türkdilli ölkələrin, xüsusilə qardaş Türkiyənin Azərbaycanın əzəli torpaqlarının işğaldan azad olunması uğrunda apardığı haqlı mübarizəsində göstərdiyi dəstəyi vurğulayıb: “Bununla da Türkiyə-Azərbaycan dostluğunun, həmrəyliyinin əbədiliyi və sarsılmazlığı bütün dünyaya bir daha sübut olundu”.
O, eyni zamanda, fond və Türk Dünyası Mühəndislər və Memarlar Birliyi arasında konstruktiv əməkdaşlıq münasibətlərinin olduğunu qeyd edib: “Türk Dünyası Mühəndislər və Memarlar Birliyi tərəfindən 2016-cı ili Azərbaycan xalqının Ümummilli Liderinin xatirəsinə ehtiram əlaməti olaraq “Heydər Əliyev ili” elan edilmiş və Beynəlxalq Türk Mədəniyyəti və İrsi Fondu ilə birgə Ankarada ilin açılış mərasimi keçirilmişdi”.
Günay Əfəndiyeva, həmçinin Qarabağda olan Azərbaycanın tarixi, dini, mədəni abidələrinin mövcud vəziyyətinin acınacaqlı halda olması məsələsinə də toxunub. Fondun prezidenti Azərbaycanın maddi-mədəni irsinə, incəsənət nümunələrinə qarşı törədilən vandal əməllərin 30 illik tarixin nəticəsi olduğunu qeyd edib. O, Beynəlxalq Türk Mədəniyyəti və İrsi Fondunun Azərbaycanın işğaldan azad olunmuş torpaqlarına rəhbər səviyyəsində iki dəfə səfər edən ilk beynəlxalq təşkilat olduğunu bildirib.
Türk Dünyası Mühəndislər və Memarlar Birliyinin baş katibi İlyas Dəmirçi Azərbaycana səfərindən, eləcə də Beynəlxalq Türk Mədəniyyəti və İrsi Fondunda olmağından məmnunluq hissi keçirdiyini bildirib. O, Azərbaycanın qədim torpaqlarının işğalçılardan tamamilə təmizlənməsinin və qazanılan şanlı zəfərin bütün türk dünyasına böyük qürur yaşatdığını vurğulayıb. Baş katib tarixi Azərbaycan ərazilərinin geri qaytarılması ilə Azərbaycanın milli kimliyinin bir daha qoruyub saxladığını bildirib. İlyas Dəmirçi, həmçinin Qarabağda yerləşən memarlıq nümunələrinin dağıdılması, təhqir olunması əməllərini qətiyyətlə pisləyərək, abidələrin bərpa edilməsi istiqamətdə görülməsi planlanan işlər barədə məlumat verib.
Qeyd edək ki, birliyin nümayəndə heyəti Qarabağ bölgəsində yerləşən maddi-mədəni abidələrə dəyən zərəri, eləcə də bu istiqamətdə görülə biləcək işləri müzakirə etmək məqsədilə Beynəlxalq Türk Mədəniyyəti və İrsi Fondunda “Qarabağın keçmişi, bu günü və gələcəyi” mövzusunda keçiriləcək konfransda iştirak etmək üçün Azərbaycana səfər edib.
Daha sonra tərəflər bir-birilərinə hədiyyələr təqdim ediblər.

Paylaş:

Baxılıb: 1126 dəfə