Abay Kunanbayevin 175 illik yubileyi münasibətilə çap olunan poçt markalarının təqdimatı olub

Bakı:

21 °C

78 %

4 m/s

Əlaqə

AZ RU EN

Ana səhifə / Mədəniyyət / Abay Kunanbayevin 175 illik yubileyi münasibətilə çap olunan poçt markalarının təqdimatı olub

Abay Kunanbayevin 175 illik yubileyi münasibətilə çap olunan poçt markalarının təqdimatı olub

12.08.2021 [09:20]

Qazax mədəniyyəti və musiqisindən söz düşəndə, ilk növbədə böyük şair, yazıçı və bəstəkar Abay Kunanbayev yada düşür. O, təkcə qazax xalqının deyil, bütövlükdə türk dünyasının tarixində parlaq iz buraxıb. Təsadüfi deyil ki, Qazaxıstanın birinci prezidenti Nursultan Nazarbayev onu “Yol göstərən ulduz” kimi xarakterizə edib. Azərbaycanda da Abay Kunanbayevin xatirəsi həmişə əziz tutulur. 2011-ci ildə Bakının küçələrindən birinə Abay Kunanbayevin adı verilib. Həmin ilin mayında Bakı Dövlət Universitetində Abay Kunanbayev adına Qazax Mərkəzi fəaliyyətə başlayıb. Beynəlxalq Türk Mədəniyyəti və İrsi Fondu Abay Kunanbayevə həsr olunmuş kitab hazırlayır. Bu, böyük mədəniyyət və ictimai xadimə həsr edilən ilk kitab olacaq.
AZƏRTAC xəbər verir ki, bu sözləri Beynəlxalq Türk Mədəniyyəti və İrsi Fondunun prezidenti Günay Əfəndiyeva avqustun 10-da Qazaxıstanın və bütövlükdə türk dünyasının böyük şairi, yazıçısı, bəstəkarı, ictimai xadimi, müasir qazax yazılı ədəbiyyatının banisi Abay Kunanbayevə həsr olunan Abay Günü və onun 175 illik yubileyi münasibətilə buraxılan poçt markalarının təqdimat mərasimində deyib.
G.Əfəndiyeva Beynəlxalq Türk Mədəniyyəti və İrsi Fondunda keçirilən mərasimdə qeyd edib ki, keçən il Abay Kunanbayevin anadan olmasının 175 və xalqımızın böyük bəstəkarı Üzeyir Hacıbəylinin anadan olmasının 135 illiyi münasibətilə İspaniyada poçt markaları çap edilib.
Qazaxıstanın ölkəmizdəki səfiri Serjan Abdıkarimov görkəmli ictimai xadimin yaradıcılığından, türk dünyasında ona göstərilən böyük hörmət və ehtiramdan, ayrı-ayrı ölkələrdə onun xatirəsinin əbədiləşdirilməsi üçün görülən işlərdən söz açıb. O, yubiley münasibətilə nəşr edilən poçt markasının böyük şair və musiqiçinin xatirəsinə ehtiramın daha bir ifadəsi olduğunu bildirib.
Sonra poçt markaların möhürlənməsi mərasimi keçirilib.
Markalar Beynəlxalq Türk Mədəniyyəti və İrsi Fondunun himayəsi ilə türk dünyasının görkəmli nümayəndəsinin zəngin yaradıcılığını daha geniş beynəlxalq auditoriyaya çatdırılması məqsədilə çap edilib. Poçt markalarının üzərində Abay Kunanbayevin təsviri ilə yanaşı, onun yaradıcılıq nümunələri, həmçinin türk dünyasının mədəni dəyərləri və milli musiqi alətləri əks olunub.
Tədbirdə Əməkdar artist Şövqü Hüseynov, Azərbaycan Dövlət Akademik Filarmoniyasının artistləri Nəzrin Aslanlı və Yuliya Matorina, Qazax Milli İncəsənət Akademiyasının artisti Akberen Atabay və Amina Nurmuxammedova milli musiqi alətlərinin müşayiəti ilə Abay Kunanbayevin əsərlərindən ibarət mahnı və şeirlər oxuyublar.
Sonda xatirə şəkilləri çəkdirilib və hədiyyələr təqdim olunub.

Paylaş:

Baxılıb: 1184 dəfə