Azərbaycan-Laos münasibətlərində yeni əməkdaşlıq mərhələsi

Bakı:

20 °C

88 %

10 m/s

Əlaqə

AZ RU EN

Ana səhifə / Müsahibə / Azərbaycan-Laos münasibətlərində yeni əməkdaşlıq mərhələsi

Azərbaycan-Laos münasibətlərində yeni əməkdaşlıq mərhələsi

19.10.2026 [12:21]

Toğrul Zeynalov

YAP Ağdam rayon təşkilatının əməkdaşı

Azərbaycanın xarici siyasətində müxtəlif regionların dövlətləri ilə qarşılıqlı faydalı əlaqələrin qurulması və möhkəmləndirilməsi mühüm yer tutur. Oktyabrın 13-də Laos Xalq Demokratik Respublikasının Prezidenti Thonqlun Sisulitin ölkəmizə rəsmi səfəri və Prezident İlham Əliyevin səfər çərçivəsində mətbuata verdiyi bəyanat ikitərəfli münasibətlərin gələcək inkişafı baxımından əlamətdar hadisə oldu. Laos Prezidentinin Azərbaycana ilk rəsmi səfəri siyasi dialoqun genişləndirilməsi ilə yanaşı, iqtisadi və humanitar əməkdaşlığın yeni istiqamətlərinin müəyyənləşdirilməsi üçün də mühüm imkanlar yaratdı. Prezident İlham Əliyev iki ölkə arasında diplomatik münasibətlərin 30 ildən artıq tarixə malik olduğunu, əlaqələrin qarşılıqlı hörmət və beynəlxalq platformalarda əməkdaşlıq prinsipləri əsasında inkişaf etdiyini vurğuladı. Dövlət başçısının bəyanatında səsləndirilən fikirlər göstərdi ki, Azərbaycan mövcud siyasi münasibətləri konkret iqtisadi nəticələrlə möhkəmləndirməkdə maraqlıdır.

Görüş zamanı iqtisadi əməkdaşlığın genişləndirilməsi, qarşılıqlı investisiyaların təşviqi, kənd təsərrüfatı, energetika və nəqliyyat sahələrində imkanların araşdırılması diqqət mərkəzində oldu. Hazırkı ticarət dövriyyəsinin iki ölkənin potensialını tam əks etdirmədiyini bildirən Prezident İlham Əliyev bu sahədə yeni imkanların mövcudluğuna diqqət çəkdi. Bakıda Azərbaycan-Laos biznes-forumunun keçirilməsi də işgüzar dairələr arasında birbaşa əlaqələrin qurulması və perspektivli layihələrin müəyyənləşdirilməsi baxımından əhəmiyyətlidir. Digər tərəfdən, Azərbaycanın əlverişli coğrafi mövqeyi və beynəlxalq nəqliyyat dəhlizlərinin inkişafına verdiyi töhfə Laosla logistika sahəsində əməkdaşlıq üçün də yeni perspektivlər aça bilər. Bütün bunlarla yanaşı, humanitar əlaqələrin genişləndirilməsi də ikitərəfli münasibətlərin mühüm istiqamətlərindəndir. Vaxtilə Azərbaycanda iki mindən çox laoslu tələbənin təhsil alması xalqlarımız arasında formalaşmış əlaqələrin tarixi əsaslarını göstərir. Təhsil sahəsində yeni təşəbbüslərin həyata keçirilməsi, tələbə mübadiləsinin təşviqi və təqaüd imkanlarının yaradılması bu ənənənin davam etdirilməsinə xidmət edə bilər.

Səfər çərçivəsində mina təhlükəsi məsələsinə diqqət yetirilməsi də xüsusi əhəmiyyət daşıyır. İşğaldan azad edilmiş Azərbaycan ərazilərində minaların yaratdığı təhlükə insanların həyatına, təhlükəsizliyinə və bərpa-quruculuq prosesinə ciddi təsir göstərir. Bu sahədə təcrübə mübadiləsi və əməkdaşlıq imkanlarının araşdırılması problemin həllinə töhfə verə bilər. Ümumilikdə, Prezident İlham Əliyevin bəyanatı Azərbaycan-Laos münasibətlərinin yalnız siyasi dialoqla məhdudlaşmadığını, iqtisadi, humanitar və digər istiqamətlərdə geniş əməkdaşlıq imkanlarına malik olduğunu bir daha nümayiş etdirdi. Əsas məqsəd mövcud dostluq münasibətlərini konkret layihələr, qarşılıqlı sərmayələr və davamlı tərəfdaşlıq vasitəsilə daha da möhkəmləndirməkdir. Bu baxımdan Laos Prezidentinin Azərbaycana səfəri iki ölkə arasında əlaqələrin yeni mərhələyə yüksəlməsi üçün mühüm zəmin yaradır.

Paylaş:

Baxılıb: 146 dəfə

Xəbər lenti

Hamısına bax