Novruz Məmmədov: Sərkisyan gec-tez hərəkətlərinin adekvat cavabını alacaq

Bakı:

24 °C

71 %

12 m/s

Əlaqə

AZ RU EN

Ana səhifə / Müsahibə / Novruz Məmmədov: Sərkisyan gec-tez hərəkətlərinin adekvat cavabını alacaq

Novruz Məmmədov: Sərkisyan gec-tez hərəkətlərinin adekvat cavabını alacaq

02.09.2011 [10:36]

Ermənistan prezidenti Serj Sərkisyan avqustun 29-da xarici ölkələrdəki səfirlərin Yerevan toplantısında bildirib ki, Dağlıq Qarabağın da Cənubi Sudan kimi müstəqil olacağı şübhəsizdir. Azərbaycan Prezidenti Administrasiyasının beynəlxalq əlaqələr şöbəsinin müdiri Novruz Məmmədov “Azadlıq” radiosuna açıqlamasında Serj Sərkisyanın iddiasını cavablandırıb:
- Dağlıq Qarabağı Cənubi Sudanla müqayisə etmək istər bugünkü beynəlxalq hüquqa, istər də real siyasi anlayışların heç birinə uyğun gəlmir. ümumiyyətlə, son zamanlar Ermənistan prezidenti prezident anlayışına uyğun gəlməyən bəyanatlar verir. Media, siyasi dairələr, digər təşkilatlar Ermənistan prezidentinin son vaxtlar verdiyi bəyanatları təhlil etsələr görərlər ki, onlar əslində prezident bəyanatlarına uyğun gəlmir. Sərkisyan bir tərəfdən danışıqlar aparır, beynəlxalq hüquqdan danışır, digər tərəfdən də cəfəng bəyanatlar verir. Bunların heç biri nə beynəlxalq hüquqa, nə siyasi etikaya, nə də ümumiyyətlə bugünkü beynəlxalq aləmdə olan ovqata uyğun gəlir. Bu, onun özünün faciəsidir və Sərkisyan gec-tez hərəkətlərinin adekvat cavabını alacaq.
- Kimsə Ermənistan prezidentini bu cür bəyanatlar verməyə sövq edə bilərmi?
- Yox. Kimsə dedirtmir. Sadəcə olaraq onların özlərinin xislətində, mahiyyətində bu var. Onlar sadəcə olaraq müəyyən situasiyada özlərini bu cür aparırlar. Arxalanmağa ola bilsin ki, kimlərsə var. Amma düşünmürəm ki, onlar bu dərəcəyə gətirib çıxarsın.
- Sərkisyan deyib ki, Azərbaycan yeni hərbi macəra axtarsa, Ermənistan düşməni sülhə məcbur etməkdən çəkinməyəcək.
- Azərbaycanın öz torpaqlarını bütün vasitələrdən istifadə edərək geri qaytarmaq hüququnun olması onları çox narahat edir. Məncə, nə demələrindən asılı olmayaraq onların ən böyük narahatlığı məhz bu məsələdəndir.
Onlar daxildə rahat ola bilmirlər. Gecə-gündüz düşündükləri odur ki, birdən Azərbaycan öz torpaqlarını hərbi əməliyyatlar vasitəsilə geri qaytarmaq istəyər. çünki onlar yaxşı bilirlər ki, gec-tez Azərbaycan öz torpaqlarını geri qaytaracaq. Ermənistan belə bir geopolitik siyasət mövcud olan yerdə heç bir vəchlə uzun müddət öz üstünlüyünü saxlaya bilməz. Onlar bunu yaxşı bilirlər.
- Dağlıq Qarabağın erməni icmasının Azərbaycanın tərkibində qalmaq istəyinə düşməsi ehtimalı nə dərəcədə böyükdür?
- Onlar belə bir istəyə düşə bilərlər. Hansı dövlət olursa olsun, onlar həmişə isti bucaq axtarırlar. Ermənilər torpaq sevən olsaydılar, öz torpaqlarında qalıb yaşayar, işləyərdilər.
- Dağlıq Qarabağda yalnız oranın əhalisinin iştirakı ilə referendum keçirilməsi ehtimalı nə qədər böyükdür?
- Əslində bu cəfəngiyyatdır. Onlar artıq bir dəfə öz aralarında referendum keçiriblər. İstəyirlər bundan sonra 10 dəfə də keçirsinlər. Bu, gəlin olmadığı halda özü özünə toy eləmək kimi boş bir şeydir.

Paylaş:

Baxılıb: 1190 dəfə