Kanadalı nazir hərbi caniləri dəstəkləyir...

Bakı:

26 °C

63 %

13 m/s

Əlaqə

AZ RU EN

Ana səhifə / Siyasət / Kanadalı nazir hərbi caniləri dəstəkləyir...

Kanadalı nazir hərbi caniləri dəstəkləyir...

24.09.2024 [09:13]

Bu, beynəlxalq hüquqa və bəşəri dəyərlərə açıq hörmətsizlikdir

Azərbaycanın öz ərazi bütövlüyünü və suverenliyini təmin etməsi Ermənistana havadarlıq edən beynəlxalq dairələri ciddi narahat edir. Bu səbəbdəndir ki, ölkəmizə qarşı qərəzli sənədlər qəbul olunur, eləcə də əsassız ittihamlar irəli sürülür. Sentyabrın 22-də Kanadanın xarici işlər naziri Melani Joli də Azərbaycana qarşı yalan və böhtan üzərində qurulmuş fikirlər səsləndirib. Melani Joli Azərbaycanın Qarabağda keçirdiyi antiterror tədbirlərinin “birinci ildönümü ilə əlaqədar” bəyanat verərək iddia edib ki, “Kanada Dağlıq Qarabağ məsələsinin danışıqlar yolu ilə həllini və gücdən istifadə etməmək prinsipini, eləcə də ərazi bütövlüyünə, xalqların öz müqəddəratını təyinetmə hüququna hörməti dəstəkləyir. Bu, erməni sakinlərinin təhlükəsiz və ləyaqətli qayıtmaq hüququnu, insan hüquqlarının qorunmasına təminatları və ərazidə erməni mədəni-tarixi irsinin qorunmasını nəzərdə tutmalıdır”.

Melani Jolinin yalan və böhtan bəyanatı...

Bu fikirlər onu göstərir ki, sanki kanadalı nazirin regionda baş verənlərdən xəbəri yoxdur. Əgər xəbəri olsaydı, bilməliydi ki, “Dağlıq Qarabağ” məsələsi çoxdan mövcud deyil. Hazırda gündəmin əsas mövzusu isə Azərbaycanla Ermənistan arasında sülh sazişinin imzalanmasıdır. Yəqin bu bəyanatın mətnini onun erməni dostları hazırlayıb.

Yeri gəlmişkən, Azərbaycan Xarici İşlər Nazirliyi də Kanadanın xarici işlər naziri Melani Jolinin sözügedən bəyanatını qətiyyətlə pisləyərək rədd edib. Nazirliyin mətbuat katibi Ayxan Hacızadə bildirib ki, Kanadanın xarici işlər naziri beynəlxalq hüququn norma və prinsipləri əsasında 4 il əvvəl Ermənistanla Azərbaycan arasında münaqişə bitdikdən sonra regiondakı reallıqlarla tanış olmaq əvəzinə, növbəti dəfə manipulyasiya və faktları təhrif etməklə məşğuldur. O, həmçinin 2023-cü ildə Ermənistan silahlı qüvvələrinin qanunsuz mövcudluğuna və onun ərazimizdə dəstək verib saxladığı separatçı rejimə son qoyulduğu Qarabağ bölgəsi üzərində Azərbaycanın suverenliyinin tam bərpa olunması faktından da xəbərsizdir.

XİN: Bəyanat Kanadanın Azərbaycana qarşı açıq qərəzinin göstəricisidir

XİN rəsmisinin qeyd etdiyi kimi, Kanada xarici işlər nazirinin Qarabağ bölgəsi ilə bağlı Azərbaycanın suverenliyini və ərazi bütövlüyünü hədəf alan, separatizmi dəstəkləyən iddiaları Kanadanın xarici siyasətinin nə qədər “dahi” və “uzaqgörən” olduğunu nümayiş etdirir. Təəssüflər olsun ki, Kanada rəsmiləri Ermənistanın 30 ilə yaxın hərbi təcavüzü zamanı azərbaycanlılara qarşı törətdiyi etnik təmizləmə, qırğınlar və bəşəriyyətə qarşı cinayətlər barədə susmaqla yanaşı, Azərbaycanın öz suveren ərazilərində heç bir mülki şəxsi hədəf almadan həyata keçirdiyi antiterror tədbirləri barədə erməni diasporu tərəfindən təbliğ olunan yalan rəvayətlər yayırlar. Kanadalı nazirin Azərbaycanın əvvəllər işğal olunmuş ərazilərindən olan 1 milyona yaxın məcburi köçkünün və Ermənistandan zorla deportasiya edilmiş şəxslərin vəziyyətinə və ayrılmaz hüquqlarına heç vaxt dəstək və maraq göstərmədiyi halda, regionda humanitar böhranla bağlı iddialar Kanadanın Azərbaycana qarşı açıq qərəzli mövqeyinin göstəricisidir. Kanadanın bölgəmizdə sülh və təhlükəsizliyin necə bərqərar olması barədə “moizə” oxumağa mənəvi haqqı yoxdur. Bu cür təxribatçı və qərəzli bəyanatlar regionun beynəlxalq hüququn prinsiplərinə hörmət əsasında gələcək inkişafı və tərəqqisinə maneədən başqa bir şey deyil.

İcma: Kanada Qərbi azərbaycanlıların öz yurdlarına qayıtmaq hüquqlarına hörmət etməlidir

Qərbi Azərbaycan İcması da Melani Jolinin Azərbaycana qarşı qərəz və böhtan dolu bəyanatını sərt şəkildə qınayıb. Qərbi Azərbaycan İcmasının bəyanatında qeyd olunub ki, kanadalı nazir öz bəyanatında ermənilərin Azərbaycanın Qarabağ bölgəsini guya məcburi şəkildə tərk etməsi barədə əsassız ittiham irəli sürür, Azərbaycanın ərazi bütövlüyünə zidd olan və regionda gərginlik yaratmağa xidmət edən mövqe nümayiş etdirir. “Ermənistanın bir milyon azərbaycanlını etnik təmizləməyə məruz qoymasına, Azərbaycan ərazilərini otuz il işğal altında saxlayaraq talan etməsinə və yüz minlərlə Qərbi azərbaycanlının geri qayıdışına imkan verməməsinə göz yuman Kanadanın humanitar məsələlərdən danışmağa mənəvi haqqı yoxdur”,-deyə İcmanın bəyanatında vurğulanıb.

Bütün bunlar göstərir ki, Kanada Azərbaycanın öz suverenliyini və ərazi bütövlüyünü tam bərpa edərək beynəlxalq hüququn aliliyini təmin etməsini qəbul etmək istəmir və bölgədə yenidən münaqişə yaratmağa çalışır. İcma artıq mövcud olmayan bir problemin həlli üçün “öz müqəddəratını təyinetmə” prinsipinə istinad edən kanadalı nazirin diqqətinə çatdırıb ki, bu prinsip onun iddia etdiyi məsələ üçün deyil, Ermənistandan qovulmuş azərbaycanlıların öz doğma yurdlarına qayıdışı və orada hüquqlarının təmin edilməsi məsələsi üçün aktualdır.

Qərbi Azərbaycan İcması Kanada hökumətindən həmin bəyanatı geri götürməyi, Azərbaycanın suverenliyi və ərazi bütövlüyünə, eləcə də Ermənistandan qovulmuş azərbaycanlıların təhlükəsiz şəkildə öz yurdlarına qayıtmaq hüquqlarına hörmət etməyi tələb edib.

Bir məqamı da vurğulayaq ki, kanadalı nazir bəyanatında Azərbaycan tərəfindən həbs edilən bütün etnik ermənilərin azad edilməsinə “çağırıb”. Əslində, bu “çağırış” separatizmə və müharibə cinayətlərinə dəstək verməkdir. Görünür, xanım Joli öz bəyanatının fərqində deyil. Əgər fərqində olsaydı, bəşəriyyətə və mülki şəxslərə qarşı müharibə cinayətləri törədən cinayətkarlara dəstək verməzdi.

Nardar BAYRAMLI

Paylaş:

Baxılıb: 639 dəfə