MDBMİ-nin rektoru Anatoli Torkunov Azərbaycan Diplomatik Akademiyasının Fəxri doktoru adına layiq görülüb

Bakı:

25 °C

50 %

0 m/s

AZ RU EN

Ana səhifə / Siyasət / MDBMİ-nin rektoru Anatoli Torkunov Azərbaycan Diplomatik Akademiyasının Fəxri doktoru adına layiq görülüb

MDBMİ-nin rektoru Anatoli Torkunov Azərbaycan Diplomatik Akademiyasının Fəxri doktoru adına layiq görülüb

12.04.2013 [00:54]

Dünən Moskva Dövlət Beynəlxalq Münasibətlər İnstitutunun (MDBMİ) rektoru, akademik Anatoli Torkunov Azərbaycan Diplomatik Akademiyasının (ADA) birinci Fəxri doktoru adına layiq görülüb.
ADA-nın rektoru, Azərbaycanın xarici işlər nazirinin müavini Hafiz Paşayev deyib: “Biz ADA ilə MDBMİ arasındakı əməkdaşlığı çox yüksək qiymətləndiririk. Ali məktəblərimiz arasında tələbə-müəllim mübadiləsinə dair əməkdaşlıq mövcuddur. Belə əməkdaşlıq Azərbaycan ilə Rusiya arasında əlaqələrin möhkəmlənməsinə töhfə verir”.
Bu günlər Bakıda MDBMİ məzunlarının I Ümumdünya forumunun keçirildiyini bildirən H.Paşayev deyib: “Hesab edirəm ki, birinci forumun keçirilməsi yeri kimi Bakı təsadüfən seçilməmişdir. Ona görə ki, MDBMİ-nin çoxlu sayda məşhur məzunları arasında məhz Azərbaycan Prezidenti İlham Əliyev xüsusi yer tutur. O, MDBMİ-nin dövlət başçısı olan yeganə məzunudur. Prezidentimiz bu institutda oxumuşdur. O, ömrünün təxminən 15 ilini bu ali məktəbə həsr etmişdir.
ADA-nın rektoru deyib ki, bu gün həm də ona görə əlamətdardır ki, ADA-nın Elmi Şurasının qərarı ilə A.Torkunova akademiyanın Fəxri doktoru adı verilib. H.Paşayev bildirib ki, A.Torkunov da MDBMİ-nin məzunudur. O, həmin ali məktəbin beynəlxalq münasibətlər fakültəsini bitirib, müəllimlikdən MDBMİ-nin rektorunadək yüksəlib. A.Torkunov siyasi elmlər doktoru, çoxsaylı məqalə və kitabların müəllifidir. MDBMİ-nin rektorunun zəngin diplomatik fəaliyyət təcrübəsi də vardır. O, SSRİ-nin KXDR və ABŞ-dakı diplomatik nümayəndəliklərində işləyib.
Sonra H.Paşayev ADA-nın Fəxri doktoru diplomunu Anatoli Torkunova təqdim edib. A.Torkunov bu ada ADA Elmi Şurasının qərarı ilə elmin və təhsilin inkişafında xidmətlərinə, Azərbaycan ilə Rusiya arasında əlaqələrin möhkəmlənməsinə töhfəsinə görə layiq görülüb.
MDBMİ-nin rektoru deyib: “ADA-nın birinci fəxri doktoru şərəfinə layiq görülməyim məni çox mütəəssir etdi”.
Belə bir universitetin yaradılmasının böyük nailiyyət olduğunu vurğulayan A.Torkunov deyib: “Biz əməkdaşlıq haqqında Memorandum imzalayanda əvvəlcə tələbə-müəllim mübadiləsi səviyyəsində əməkdaşlıq aparmışıq. Lakin hazırda birgə tədris proqramları, ilk növbədə, magistr proqramları yaratmaq üçün hər cür şərait vardır. Bu, magistrlərimizə həm ADA-nın, həm də MDBMİ-nin diplomlarını almaq imkanı verəcəkdir”.
MDBMİ-nin rektoru ADA-nın tələbələri qarşısında “Böhrandan sonra dünyada beynəlxalq münasibətlər: Moskvadan baxış” mövzusunda mühazirə ilə çıxış edib. A.Torkunov Rusiya-Azərbaycan əlaqələrindən danışarkən vurğulayıb ki, bu əlaqələr möhkəm zəmin üzərində qurulub. Onun fikrincə, həmin münasibətlərin ən mühüm amili sabit humanitar əlaqələr, fəal iqtisadi əməkdaşlıqdır. O deyib: “Rusiya ilə Azərbaycan öz mənafelərinə sadiqliyi qoruyub saxlayır, beynəlxalq məsələlərdə kompromis əldə etmək sahəsində qonşu ölkələrə nümunə göstərirlər”.
A.Torkunovun fikrincə, dünya böhranı bir sıra meyil və proseslərin inkişafında müəyyən sərhəd rolunu oynayıb. O deyib: “Böhran zamanı bir sıra ölkələr, o cümlədən Rusiya, zənnimcə, Azərbaycan üçün “təhlükəsizlik balışı” energetikadan gələn gəlirlər olmuşdur”.
MDBMİ-nin rektoru hazırda Koreya yarımadasında yaranmış vəziyyətlə bağlı fikirlərini də bölüşüb.

Paylaş:

Baxılıb: 1145 dəfə