Səbail rayonunda Xocalı faciəsinin 22-ci ildönümü ilə bağlı silsilə tədbirlər keçirilir

Bakı:

27 °C

59 %

6 m/s

Əlaqə

AZ RU EN

Ana səhifə / Siyasət / Səbail rayonunda Xocalı faciəsinin 22-ci ildönümü ilə bağlı silsilə tədbirlər keçirilir

Səbail rayonunda Xocalı faciəsinin 22-ci ildönümü ilə bağlı silsilə tədbirlər keçirilir

26.02.2014 [09:38]

Ölkənin hər yerində olduğu kimi, Bakı şəhərinin Səbail rayonunda da Xocalı faciəsinin 22-ci ildönümü ilə bağlı silsilə tədbirlər keçirilir. Səbail rayon İcra Hakimiyyəti tərəfindən hazırlanmış Tədbirlər planına uyğun olaraq keçirilən tədbirlər çərçivəsində fevralın 25-də rayonun ali və orta məktəblərində ilk dərslər Xocalı faciəsinə həsr edilib, həmçinin, Dövlət Gənc Tamaşaçılar Teatrında və Badamdar Mədəniyyət evində faciəyə həsr olunmuş tamaşalara ictimai baxış təşkil olunub.
Bundan başqa, Azərbaycan Vətən Müharibəsi Veteranları Birliyi Səbail rayon şöbəsinin Şəhidlər Xiyabanındakı qərargahında Xocalıdan köçkün düşərək Səbail rayonda məskunlaşmış 26 ailənin nümayəndələri ilə görüş keçirilib. Mərasimdə çıxış edən Səbail rayon İcra Hakimiyyətinin başçısı Asif Əsgərov Azərbaycan xalqının qan yaddaşı olan Xocalı faciəsi, ermənilərin zaman-zaman xalqımıza qarşı törətdikləri vəhşiliklər və Xocalı soyqırımı ilə bağlı həqiqətlərin dünya ictimaiyyətinin nəzərinə çatdırılması üçün görülməsi vacib olan işlər barədə ətraflı məlumat verib. Bildirilib ki, məhz xalqımızın Ümummilli lideri Heydər Əliyevin böyük əməyi sayəsində Xocalı faciəsi haqqında həqiqətlər dünya ictimaiyyətinə çatdırılıb. Məhz Onun təşəbbüsü ilə Azərbaycan Respublikasının Milli Məclisində ilk dəfə bu məsələyə siyasi qiymət verilib. Bu işlərin nəticəsidir ki, hər il faciənin ildönümü ilə əlaqədar istər respublikamızda, istərsə də Azərbaycanın hüdudlarından kənarda tədbirlər keçirilir, faciə qurbanlarının xatirəsi yad edilir, dünya ictimaiyyətinə ermənilərin iç üzü göstərilir.
Natiq, eyni zamanda, Azərbaycan Respublikasının Prezidenti İlham Əliyevin apardığı məqsədyönlü siyasət nəticəsində Xocalının, həmçinin, işğal altında olan bütün Azərbaycan torpaqlarının düşməndən azad ediləcəyinə, ölkəmizin ərazi bütövlüyünün bərpa olunacağına əmin olduğunu, lazım gələrsə ölkə başçısı, Ali Baş Komandanın əmri ilə silaha sarılaraq müharibə yolu ilə torpaqlarımızın azad olunması üçün bütün qüvvələrin səfərbər ediləcəyini bildirib.
O da qeyd olunub ki, fevralın 26-da rayonun sənaye, təhsil, səhiyyə və s. müəssisələrin kollektivlərinin “Xocalı harayı” abidəsini ziyarəti təşkil ediləcək. Həmin gün rayondakı məscidlərdə Xocalı faciəsi zamanı şəhid olmuş soydaşlarımızın ruhuna dualar oxunacaq, Bibiheybət və İçərişəhər Cümə məscidlərində ehsanlar veriləcək.
Tədbirdə çıxış edən Xocalı rayon İcra Hakimiyyətinin nümayəndəsi Xəlil Vəliyev və başqaları Xocalının işğaldan azad olunacağı günü səbrsizliklə gözlədiklərini və bu günün tezliklə gələcəyinə əmin olduqlarını bildiriblər.
Tədbirin sonunda Səbail rayonunda məskunlaşmış Xocalıdan olan köçkünlərə rayon İcra Hakimiyyəti tərəfindən maddi və ərzaq yardımları göstərilib.

Paylaş:

Baxılıb: 989 dəfə